Chapitre 97

Azo ti kusala na yaka ti vigne

“AZO MINGI so ayeke azo ti li ni, fade ala ga azo ti ndani, na fade azo ti ndani aga azo ti li ni.” Fadeso Jésus amu mbeni tapande ti fa nda ti tene ti lo: “Teti royaume ti yayu ayeke tongana mveni ti da so asigigi fade na ndapelele ti gi azo ti kusala teti yaka ti vigne ti lo.”

Jésus akiri atene: “Tongana [mveni ti da] aleke tene ti futa ala denier oko na la oko, na ala yeda, lo to ala na yaka ti vigne ti lo. Lo sigigi ndulu na ngbonga ota, lo baa ambeni so aduti senge na gala; lo tene na ala: ‘I gue na yaka ti vigne ti mbi nga, na fade mbi mu na i ye so ayeke mbilimbili.’ Na ala gue da. Ndulu na ngbonga omene na ndulu na ngbonga gumbaya nga, lo kiri lo sigigi, na lo hiri ambeni zo tongaso. Ndulu na ngbonga bale oko na ndoni oko ni, lo sigigi, na lo wara ambeni zo aduti senge, na lo tene na ala: ‘Teti nyen i duti senge na ndo so la so kue?’ Ala tene na lo: ‘Teti mbeni zo amu kusala na e pepee.’ Lo tene na ala: ‘I so nga, i gue na yaka ti vigne ti mbi.’ ”

Mveni ti da, wala mveni ti vigne ni, ayeke Jéhovah Nzapa, na yaka ti vigne ayeke mara ti Israël. Azo ti kusala so ato ala na yaka ti vigne ni ayeke azo so amu lege na ala ti li na ya mbele ti Ndia; mbilimbili ala yeke aJuif so aduti na fini na ngoi ti abazengele. Aleke tene ti futa nginza teti la oko gi na azo so ahiri ala ti sala kusala na ya lango ni kue. Futa ni ayeke denier oko teti kusala ti la oko. Teti so “ngbonga ota ni” ayeke ngbonga gumbaya ti ndapelele, azo so ahiri ala na ngbonga ota ni, omene ni, gumbaya ni, na ngbonga bale oko na ndoni oko ni asala kusala gi teti ngbonga gumbaya, ngbonga omene, ngbonga ota na ngbonga oko.

Azo ti kusala so asala kusala ngbonga bale oko na ndoni use, wala teti la oko, aduti fa ti amokonzi ti aJuif so asala kusala ti Nzapa lakue. Ala yeke nde na adisciple ti Jésus so, na ya kota mbage ti fini ti ala, amu tele ti ala kue ti sala kusala ti gingo susu wala ambeni kusala ti mitele. “Mveni ti da ni” ato Jésus Christ ti bungbi azo so ti ga adisciple ti lo gi na ndani ti ngu 29. A yeke tongaso si ala ga “azo ti ndani”, azo ti kusala so ahiri ala ti sala kusala na yaka ti vigne na ngbonga bale oko na ndoni oko ni.

Na ndani, la ti kusala ti parabole ahunzi na kui ti Jésus, na ngoi asi ti futa azo ti kusala. Nde na ye so ayeke sala ni lakue, afuta azo ti ndani kozoni. Ye ni asi tongaso: “Tongana la akui awe, mveni ti yaka ti vigne so atene na wabatango-ye ti lo: ‘Hiri azo ti kusala, mo mu na ala nginza ti ala, mo commencé na azo ti ndani juska na azo ti kozoni.’ Tongana ala so lo mu kusala na ala ndulu na ngbonga bale oko na ndoni oko ni aga, ala kue awara denier oko oko. Na tongana azo ti kozoni aga, be ti ala atene fade ala wara nginza ahon; me ala kue awara denier oko oko nga. Tongana ala wara nginza tongaso, ala dema tele ti ala na mveni ti da, ala tene: ‘Azo ti ndani so ala sala kusala gi ngbonga oko, na mo sala si ala wara alingbi na e so ayo kungba ti kota la, tongana ndo ayeke wa mingi!’ Me lo kiri tene na mbeni zo ti ala lo tene: ‘Ndeko, mbi sala kirikiri na mo pepee. Mo yeda kozoni ti sala kusala teti denier oko pepee? Kamata ye so ayeke ti mo, mo gue. Be ti mbi aye ti mu nginza na azo ti ndani so lege-oko tongana mbi mu na mo. Mbi lingbi ti sala ye so mbi ye na ye ti mbi pepee? Wala le ti mo ayeke sioni teti so mbi yeke nzoni?’ ” Ti hunzi tene ni, Jésus akiri afa tene so lo tene kozoni: “Tongaso, fade azo ti ndani aga azo ti kozoni, na azo ti kozoni aga azo ti ndani.”

Azo awara denier ni pepee na la ni so Jésus awara kua, me na la ti Pentecôte ti ngu 33, na la ni so Christ, “wabatango ye”, asa yingo ti nzoni-kue na ndo adisciple ti lo. Adisciple ti Jésus ayeke giriri tongana “azo ti ndani”, azo so ahiri ala ti sala kusala na ngbonga bale oko na ndoni oko ni. Denier ni aduti fa ti matabisi ti yingo ti nzoni-kue pepee. Denier ni ayeke mbeni ye so adisciple alingbi ti sala kusala na ni na ndo sese ge. A yeke mbeni ye so andu fini ti ala, fini ti ala ti lakue lakue. A yeke matabisi ti ga oko ti aIsraélite ti yingo, ala so asa yingo na ndo ti ala ti fa tene ti Royaume ti Nzapa.

Azo so ahiri ala ti sala kusala kozoni abaa fade so adisciple awara futa ti ala awe, na ala baa adisciple asala kusala na denier ti parabole ni. Me ala ye ti wara pepee gi yingo ti nzoni-kue na amatabisi na ya Royaume so aga na lege ti yingo so. Demango tele na ahundango tene ti ala ayeke na lege so ala sala aye ti ngangu na adisciple ti Christ, so ayeke “azo ti ndani” ti sala kusala na yaka ti vigne.

Parabole ti Jésus so aga taa tene gi na ngoi ti akozo chrétien? Oko pepee, na ngoi ti e amokonzi ti nzapa ti chrétiente aduti, na lege ti kota ndo ti ala, “azo ti kozoni” so ahiri ala ti sala kusala na yaka ti vigne ti Nzapa ti parabole ni. Ala baa awakua so amu tele ti ala kue na Nzapa na so asala kusala lege-oko na Watch Tower Bible and Tract Society tongana “azo ti ndani” ti wara nzoni kungba na ya kusala ti Nzapa. Me, kamême na so, a yeke azo so amokonzi ti nzapa ti chrétienté ake ala so awara denier ni: kungba ti ga awalembe ti Royaume ti Nzapa so ayeke na yayu so asa yingo na ndo ti ala. Matthieu 19:30–20:16.

▪ Yaka ti vigne aduti fa ti nyen? Mveni ti yaka ti vigne ni, azo so asala kusala ngbonga bale oko na ndoni use, na azo so asala kusala ngbonga oko, ala duti fa ti azo nyen?

▪ La ti kusala ti parabole so akonda ni lawa, na afuta nginza ni la nyen?

▪ Futango zo na denier aduti fa ti nyen?