Chapitre 106
A fa nda ti ala na lege ti atoli ti yaka ti vigne
JÉSUS ayeke na ya temple. Lo bi kamela fade na le ti amokonzi ti nzapa so agi ti hinga na iri ti zo wa lo yeke sala ye so. Kamela ti ala ade ti hunzi pepee tongana Jésus ahunda ala: “Be ti i atene nyen?” Na lege ti mbeni toli, lo fa nda ti ala na gigi.
Jésus atene: “Mbeni zo ayeke na amolenge use. Lo si na kozo molenge ni, lo tene: ‘Molenge, mo gue mo sala kusala na yaka ti vigne laso.’ Molenge ni akiri tene tongaso: ‘Mbi yeke gue, seigneur’, me lo gue pepee. Lo si na molenge use ni, lo sala tene so na lo nga. Lo kiri tene: ‘Mbi yeke gue pepee.’ Na pekoni, lo sanzé be ti lo na lo gue. Jésus ahunda: “Zo nyen na popo ti ala asala ye so Baba ti lo aye?”
“Use molenge ni”, awato ti lo atene.
Tongaso Jésus afa nda ti tene ni na ala: “Biani, biani mbi tene na i, azo ti kamata lapo na awali ti pitan ayeke li na royaume ti Nzapa kozoni na i.” Azo ti kamata lapo na awali ti pitan ayeke azo so kozoni ake ti sala ye so Nzapa aye. Me, lege-oko tongana use molenge ni, na pekoni ala sanzé be ti ala na ala sala na lo. Nde na ala, amokonzi ti nzapa, lege-oko tongana kozo molenge ni, atene so ala sala na Nzapa, me, tongana Jésus atene: “Jean [Wabatizengo zo] aga na i na lege ti mbilimbili, na i ma lo pepee. Me azo ti kamata lapo na awali ti pitan ama na be na lo, même na pekoni, tongana i baa ye so awe, i sanzé be ti i pepee, si i lingbi ma lo.”
Na pekoni, Jésus afa so sioni ti amokonzi ti vorongo nzapa so ayeke pepee gi so ala ke ti sala na Nzapa, me ala yeke biani azo ti sioni mingi. Jésus atene: “Giriri mbeni zo so ayeke mveni ti da, lo sala yaka ti vigne, lo sala gbagba na tele ni kue, lo sala du ti petengo le ti vigne na ya ni, lo sala tour, lo zia yaka so na ti ti azo ti fango yaka, na lo gue na mbeni sese nde. Tongana ngoi ti fa le ti vigne aga ndulu awe, lo to angbaa ti lo ti kamata le ti vigne na ti ti azo ti fango yaka. Azo ti fango yaka agbu angbaa ti lo, ala pika oko, ala fa mbeni, na ala bolo mbeni na tene. Lo kiri lo to ambeni ngbaa mingi ahon ala ti kozoni, na ala sala tongaso na angbaa so nga.”
“Angbaa” ayeke aprophète so “mveni ti da”, Jéhovah Nzapa, ato ala na “azo ti fango yaka ti vigne” ti lo. Azo ti fango yaka so ayeke akota mokonzi ti mara ti Israël. Mbeti ti Nzapa afa so mara so ayeke “yaka ti vigne” ti Nzapa.
Jésus afa nga ye so asi teti so “azo ti fango yaka” asala sioni na afa “angbaa”: “Me na ndani [mveni ti yaka ti vigne] ato molenge ti lo na ala, lo tene: ‘Fade ala kpe mbito ti molenge ti mbi.’ Me tongana azo ti fango yaka abaa molenge so, ala tene na popo ti ala: ‘Lo so ayeke ga ande mveni ti yaka ni. E fa lo, si fade yaka ni aga ande ti e!’ Na ala gbu lo, ala bi lo na gigi na peko ti yaka ti vigne, ala fa lo.”
Fadeso, Jésus ahunda na amokonzi ti nzapa: “Tongana mveni ti yaka ti vigne aga, fade lo sala nyen na azo so abata yaka so?”
Amokonzi ti nzapa akiri tene tongaso: “Fade lo sala si azo ti sioni so awara kui ti sioni, na fade lo zia yaka ni na ti ti ambeni wakua, si ala lingbi ti mu na lo le ni na ngoi ni.”
Na lege so ala hinga pepee, ala fa ngbanga na ndo ala mveni, teti ala yeke na popo ti aIsraélite so ayeke “azo ti bata yaka ti vigne” ti Nzapa so ayeke mara ti Israël. Lengo so Jéhovah ahunda na awakua so ayeke ti ma na be na Molenge ti lo so ayeke taa Messie. Teti so ala le lengo so pepee, Jésus azingo na ala tongaso: “I diko tene so na Mbeti ti Nzapa pepee [na Psaume 118:22, 23]: ‘Tene so azo ti sala da ake awe, tene so aga li ti mbundu ti da. So ayeke kusala ti Jéhovah, na a yeke ye ti kpene na le ti e’? Teti tene so mbi tene na i: Fade alungula royaume ti Nzapa na ti ti i, na a mu na mbeni mara so ale le ni. Zo so ati na ndo tene so, fade afa tele ti lo. Zo so tene so ati na ndo lo, fade asala si lo ga pupu sese.”
Fadeso awafango ndia na akota prêtre ahinga nzoni so Jésus asala tene ti ala, na ala ye ti fa lo, lo so ayeke taa “héritier” ti yaka ni. Teti tene so, mara ti aIsraélite ti mitele aglisa matabisi ti komande na ya Royaume ti Nzapa, na fade mbeni fini mara ti ‘azo ti bata yaka ti vigne’ ayeke baa gigi, mara so ayeke le lengo so alingbi.
Teti so ala sala mbito ti gba ti azo so atene Jésus ayeke mbeni prophète, amokonzi ti nzapa agi lege ti fa lo na la ni ka pepee. Matthieu 21:28-46; Marc 12:1-12; Luc 20:9-19; Esaïe 5:1-7.
▪ Amolenge use na ya kozo toli ti Jésus aduti fa ti azo wa?
▪ Na ya use toli ni, aye so aduti fa ti azo wa: “mveni ti da”, “yaka ti vigne”, “azo ti fango yaka”, “angbaa” na “zo ti héritier”?
▪ Fade ye nyen asi na ‘azo ti fango yaka ti vigne’? Fade azo wa ayeke mu place ti ala?