Chapitre 110

Kusala na temple ahunzi

JÉSUS asi na temple teti ndangba ngoi ni. Biani, lo yeke hunzi kusala ti lo na ndo sese, angba gi akpale so andu guengo na lo na gbe ti ngbanga na fango lo, ye so ayeke si na peko ti lango ota. Fadeso lo ngba ti suku na awafango ndia na aFarizien.

Lo kiri lo tene fani ota: “Vundu aga na i, awafango ndia na aFarizien, awandendia!” Kozoni, lo diko vundu na ndo ala teti ala sukula “tele ti kopo na sembe, me ya ni asi na tene ti nzi na nzala ti tele so i kanga pepee”. Tongaso lo mu wango so: “Sukula ya ti kopo na sembe kozoni, si tele ni alingbi ga nzoni nga.”

Na pekoni lo hiri vundu ti ga na ndo awafango ndia na aFarizien teti ye ti sioni na ti futi so ayeke na ya ala so ala gi lege ti honde ni na lege ti ye ti mbilimbili so ala sala teti le ti zo. Lo tene: “I yeke tongana sende ti kua so avulu, so tele ni ayeke pendere mingi, me ya ni asi na bio ti akua na sioye kue.”

Na ndani, a baa ndendia ti ala na lege so ala yeke na nzala ti leke du ti kua teti aprophète na ti leke tele ti du ti kua ni ti bi le ti azo na ndo nzoni kusala ti ala mveni. Ye oko, tongana Jésus afa, ala “yeke amolenge ti ala so afa aprophète giriri”. Biani, mbeni zo so afa ndendia ti ala na gigi ayeke wara ye ti sioni!

Na pekoni, Jésus atene kpengba tene ti lo ti ke sioni ti ala: “I angbo, i amolenge ti alongo, fade i kpe ngbanga ti Géhenne tongana nyen?” Géhenne ayeke mbeni popo-hoto na ndo so azo ti Jérusalem abi saleté ti ala da. Tongaso Jésus atene teti so ala ngba ti sala ye ti sioni lakue, awafango ndia na aFarizien ayeke wara ande futingo ti lakue lakue.

Na ndo ti azo so lo to ala na iri ti lo, Jésus atene: “Fade i fa ambeni, na fade i fa ambeni na keke ti pasi, fade i se ambeni na ya synagogue ti i, na i sala ngangu na ala, atondani na kodoro oko juska na ambeni kodoro; si mene ti azo kue ti mbilimbili so asa na sese alingbi ti ga na ndo i, atondani na Abel zo ti mbilimbili, ti si na mene ti Zacharie molenge ti Barachie [so ahiri lo Jehoïada na use mbeti ti Chronique], so i fa lo na popo ti temple na balaga. Biani, mbi tene na i: Fade ye so kue aga na ndo awagame so.”

Teti so Zacharie asuku na amokonzi ti Israël, “ala leke tene na lingo ti ke lo na ala bolo lo na tene na ya sedu ti da ti Jéhovah na lege ti ndia ti gbia”. Me, tongana Jésus afa kozoni, Israël ayeke futa ande mene ti azo ti mbilimbili kue so ala sa na sese. Ala futa ni ngu bale ota na ndoni mbasambala na pekoni, na ngu 70 ti ngoi ti e, tongana aturugu ti Rome afuti Jérusalem na aJuif ahon koto oko akui.

Tongana Jésus abi be ti lo na kota ye ti mbito so, vundu asala lo. Lo kiri lo tene: “Jérusalem, Jérusalem, lege mingi mbi ye ti bungbi amolenge ti mo lege-oko tongana mama ti kondo abungbi amolenge ti lo na gbe ti kpangbi ti lo! Me i ye pepee. Baa! Azia da ti i na i awe.”

Jésus atene na pekoni: “Fade i baa mbi mbeni pepee, juska la ni so i tene: ‘Sala tene nzoni na lo so aga na iri ti Jéhovah!’ ” La ni so ayeke na ngoi ti singo ti Christ tongana lo wara Royaume ti lo na yayu na azo abaa lo na le ti mabe.

Fadeso Jésus ague na mbeni ndo na ndo so lo lingbi ti baa asanduku ti nginza na ya temple na azo so ayeke bi nginza na ya ni. Azo ti mosoro mingi atuku gba ti nginza da. Me na pekoni mbeni womua so ayeke zo ti nzinga abi ti lo akete pata use so ayeke na ngere ngangu pepee.

Jésus ahiri adisciple ti lo si lo tene na ala: “Biani mbi tene na i womua so ayeke zo ti nzinga abi nginza na ya ti sanduku ti nginza ahon atanga ni kue.” Ala hunda nda ti tene so. Tongaso Jésus afa ndani: “Atanga ni abi ti ala nginza so ala yeke na ye ti sala na ni pepee, gi ndo ti nginza ni. Me ti lo, na ya ti mawa ti lo, lo bi tanga ti nginza so kue lo yeke na ni, tanga ti nginza so fade lo lingbi ti bata tele ti lo na ni.” Na peko ti tene so, Jésus asigigi na temple na lo yeke kiri da mbeni pepee.

Mbeni oko ti adisciple ti lo abaa pendere na kota ti temple ni, na lo tene: “Wafango ye, baa ye! So pendere tene ti nyen! So salango da ti nyen!” Biani, yongo ti atene ahon mètre bale oko na ndoni oko, kota ni ahon mètre oku, na yongo ni na nduzu ahon mètre ota!

Jésus akiri tene tongaso: “Mo baa akota da so? Fade mbeni tene ni ayeke duti na ndo ti mbeni ande pepee. Fade abi kue na sese.”

Na peko ti tene so, Jésus na abazengele ti lo ahon Popo-hoto ti Cédron na ala ma hoto ti Oliviers. Na ndo so ala lingbi ti baa na gbele ala pendere temple ni. Matthieu 23:25–24:3; Marc 12:41–13:3; Luc 21:1-6; 2 Chronique 24:20-22.

▪ Na ngoi ti ndani so Jésus ague na temple lo sala nyen?

▪ Na lege wa afa na gigi ndendia ti awafango ndia na aFarizien?

▪ “Ngbanga ti Géhenne” aye ti tene nyen?

▪ Ngbanga ti nyen Jésus atene so nginza so womua abi ni ahon nginza so azo ti mosoro abi?