Chapitre 113

Na taa-be-ti-molenge na Pâque ti ndani

NA LEGE so Jésus akomande ala, Pierre na Jean ague na Jérusalem ti leke Pâque. Jésus na ambeni bazengele bale oko asi na Jérusalem na pekoni. La aye ti linda tongana Jésus na azo ti lo azu na ndo hoto ti Oliviers. Jésus ayeke duti na ndo hoto so ti baa gbata so na kota la mbeni pepee juska ayaa lo na du-kua.

Ngoi kete na pekoni, Jésus na azo ti lo ali na ya gbata ni, ala gue na da so ala yeke sala matanga ti Pâque da. Ala ma na ya kota da-nduzu, na ndo so ala baa aleke ye kue awe si ala lingbi sala matanga ni na lingo. Jésus aku ngoi so mingi, teti lo tene: “Mbi ye mingi ti te Pâque so na i kozoni si mbi hu pono.”

Na lege ti ye so azo asala lakue, na matanga ti Pâque, azo anyon kopo ti vin osio. Tongana lo kamata kopo ota ni awe, Jésus akiri singila, na lo tene: “I kamata kopo so, i kangbi na popo ti i; teti mbi tene na i, fade mbi nyon ngu ti le ti vigne pepee juska royaume ti Nzapa asi.”

Tongana ala yeke te kobe, Jésus alondo, lo lungula kota bongo ti lo, lo kamata serviette, na lo zia ngu na du-sembe. A yeke zo so ahiri azo ti te kobe na da ti lo si ahiri wakua ti sukula gere ti agene ti lo. Me na ngoi so Jésus alondo ti sala ye so lo mveni teti ala yeke gene ti mbeni zo pepee. Mbeni oko ti abazengele alingbi ti londo ti sala kusala so; ye oko, peut-être teti tene ti papa ade na popo ti ala, mbeni zo oko alondo ti sala ye so pepee. Fadeso kamela asala ala tongana ala baa Jésus atonda ti sukula gere ti ala.

Tongana Jésus asi na Pierre, lo ke na lo tene na Jésus: “Fade mo sukula gere ti mbi la oko pepee.”

Jésus atene na lo: “Tongana mbi sukula gere ti mo pepee, fade mo wara ye na ya mbi pepee.”

Pierre atene na lo: “Seigneur, mo sukula gi gere ti mbi pepee, me maboko ti mbi na li ti mbi nga.”

Jésus atene: “Zo so asukula tele ti lo awe, a lingbi lo sukula gi gere ti lo, teti tele ti lo avulu kue. Na i vulu awe, me i kue pepee.” Lo sala tene so teti lo hinga Judas Iscariote aye ti ka lo.

Tongana lo sukula gere ti abazengele ti lo bale oko na ndoni use awe, so ti tene nga gere ti Judas, lo so ayeke ka lo, Jésus ayu bongo ti lo, lo kiri lo duti na table. Lo hunda na ala: “I hinga ye so mbi sala na i? I hiri mbi ‘Wafango ye’ na ‘Seigneur’, na i sala tene nzoni, teti mbi yeke tongaso. Tongana mbi, Seigneur na Wafango ye, mbi sukula gere ti i, a lingbi i sukula gere ti i na popo ti i nga. Mbi mu tapande na i, si i lingbi sala ye lege-oko tongana ye so mbi sala na i. Biani, biani, mbi tene na i: wakua ahon mveni ti lo pepee, na lo so ato lo ahon lo so ato lo pepee. Tongana i hinga ye so, ngia ayeke na i tongana i sala ye so.”

Ye so ayeke mbeni nzoni tapande ti dutingo na taa-be-ti-molenge! A lingbi abazengele agi kozo ndo pepee. A lingbi ala baa tele ti ala kota si zo asala na ala lakue pepee. A yeke ngbanga ti ala ti mu peko ti tapande ti Jésus. Ye so ayeke mbeni kutume ti sukula gere senge pepee. Me a yeke nzala ti sala na azo kue, ataa a yeke senge kusala wala a nzere na be ti e pepee. Matthieu 26:20, 21; Marc 14:17, 18; Luc 22:14-18; 7:44; Jean 13:1-17.

▪ Ye nyen ayeke nde tongana Jésus abaa Jérusalem tongana lo li na gbata ni ti sala matanga ti Pâque?

▪ Na ngoi ti Pâque, na peko ti so lo sambela, kopo wa Jésus akangbi na abazengele ti lo bale oko na ndoni use?

▪ Na ngoi so Jésus ayeke na ndo sese, zo so ahiri azo ti te kobe na da ti lo ahiri wakua ti lo ti sala nyen teti ala? Ngbanga ti nyen asala ni pepee na matanga ti Pâque so Jésus na abazengele asala?

▪ Ngbanga ti nyen Jésus asala senge kusala ti sukula gere ti abazengele ti lo?