Chapitre 119

A gue na lo na Anne, na pekoni na Caïphe

TONGANA a kanga lo tongana senge zo ti kengo ndia, ague na Jésus na gbele Anne, ngbele mokonzi ti aprêtre so ayeke kota zo mingi. Anne ayeke ando mokonzi ti aprêtre na la ni so, tongana lo yeke na ngu bale oko na ndoni use, Jésus apika be ti awafango ye ti arabbin na ya temple na hingango ndo ti lo. Ambeni molenge ti Anne aga mokonzi ti aprêtre na pekoni, na fadeso a yeke kogara ti lo, Caïphe, si ayeke sala kusala so.

A gue na Jésus biani kozoni kue na ndo ti Anne, teti prêtre ti kota so ayeke na kota kungba a ninga na ya kusala ti nzapa ti aJuif. Guengo na ndo ti Anne amu ngoi na mokonzi ti aprêtre, Caïphe, ti bungbi azo ti Sanhédrin, kota ndo ti fango ngbanga ti aJuif, so li ti ala ayeke bale mbasambala na ndoni oko, na ti bungbi nga atémoin ti wataka.

Anne, prêtre ti kota, ahunda fadeso Jésus na ndo ti adisciple ti lo nga na ndo ti fango ye ti lo. Me Jésus akiri tene na lo: “A yeke na kota la si mbi sala tene na azo. Mbi fa ye lakue na ya synagogue nga na ya temple, ndo so aJuif kue abungbi tele da; na mbi sala tene na lingo pepee. Ngbanga ti nyen mo hunda mbi? Hunda ala so ama ye so mbi tene na ala. Baa! Ala so ahinga ye so mbi tene.”

Na mbeni zo ti kusala so aluti ndulu apika Jésus na maboko ti lo, na lo tene: “A yeke tongaso si mo kiri tene na prêtre ti kota?”

Jésus akiri tene na lo: “Tongana mbi sala tene na lege ni pepee, fa na mbi sioni ni; me tongana mbi sala tene na lege ni, ngbanga ti nyen mo pika mbi?” Na peko ti kete papa so, Anne akanga Jésus na kamba na lo to lo na Caïphe.

Na ngoi ni so, akota prêtre kue, a-ancien na awafango ndia, biani Sanhédrin kue, atonda ti bungbi tele ti ala. Bungbi so aduti na ndo ti Caïphe. Ataa so ndia ti aJuif agbanzi mara ti ngbanga so na bi ti Pâque, a kanga lege pepee na amokonzi ti nzapa ti sala sioni ye so ala leke na be ti ala.

Ayenga mingi kozoni, tongana Jésus azingo Lazare na popo ti awakinda, Sanhédrin awa tele ti ala awe so a lingbi lo kui. Na a sala gi lango use fadeso, na mercredi, amokonzi ti nzapa ama tele ti gbu lo na lege ti mayele na ti fa lo. I baa kete, a fa ngbanga ti kua na ndo Jésus kozoni si lo hon na gbe ti ngbanga!

A yeke gi fadeso ti wara atémoin so ayeke ndulu ti sala mvene si awara tene ti tene na tele ti Jésus. Ye oko, a lingbi ti wara pepee azo so tene ti témoin ti ala ague lege-oko. Na ndani, ambeni témoin use asigigi na ala tene: “I ma lo la ni, lo tene: ‘Fade mbi yeke kinda temple so asala na maboko, si na ya ti lango ota mbi yeke sala mbeni nde so asala ni na maboko pepee.’ ”

Caïphe ahunda lo: “Mo kiri tene pepee? Atene wa azo so atene na ndo mo?” Me Jésus akanga yanga ti lo. Kota kamela ayeke ti Sanhédrin, teti na ya tene ti mvene so atene ti atémoin use so agbu tele pepee. Tongaso mokonzi ti aprêtre atara mbeni mayele nde.

Caïphe ahinga aJuif ayeke sala ngonzo mingi tongana mbeni zo atene lo yeke taa Molenge ti Nzapa. Fani use awe ala tene Jésus ayeke zo so azonga Nzapa so alingbi na kui ngbanga ti so ala baa lo tene lo lingbi na Nzapa. Na lege ti mayele Caïphe ahunda fadeso na Jésus: “Na iri ti Nzapa ti fini, mbi hunda na mo ti tene na e tongana mo yeke Christ, Molenge ti Nzapa!”

Wala bibe ti aJuif na ndo ti tene so ayeke tongana nyen, ye oko, Jésus ayeke biani Molenge ti Nzapa. Tongana lo duti kpo, fade lo fa so lo bele so lo yeke Christ. Tongaso Jésus akiri tene na mbito pepee: “Biani, mbi yeke lo; na fade i baa Molenge ti zo aduti na koti ti ngangu na lo ga na ambinda ti yayu.”

Na ndo tene so, Caïphe asuru ya ti bongo ti lo na lo tene na kongo: “Lo zonga Nzapa awe! Ye nyen e ku mbeni na mbage ti atémoin? Baa! Fadeso i ma lo zonga Nzapa awe. Ti be ti i ayeke nyen?”

Sanhédrin akiri tene: “Lo lingbi na kui.” Na fade fade ala tonda ti he lo na ti zonga lo. Ambeni apika me ti lo na aku soro na le ti lo. Ambeni akanga le ti lo na apika lo na maboko na ala he lo na ala tene: “Tene na e, Christ! Zo wa apika mo?” Baa ye ti zonga na ye so ayeke na lege ni pepee so asala na Jésus na ngoi ti ngbanga so afa na ndo ti lo na bi. Matthieu 26:57-68; 26:3, 4; Marc 14:53-65; Luc 22:54, 63-65; Jean 18:13-24; 11:45-53; 10:31-39; 5:16-18.

▪ A gue na Jésus kozoni na ndo wa, na nyen asi na lo ka?

▪ Na pekoni a gue na Jésus na ndo wa, na ngbanga ti nyen?

▪ Caïphe asala tongana nyen ti tene Sanhédrin adiko tene ti kua na ndo Jésus?

▪ Ye ti sioni wa so ake ndia, asala na ngoi so ague na Jésus na gbe ti ngbanga?