Chapitre 122

Na popo ti Pilate na Hérode

JÉSUS atara ti honde na le ti Pilate pepee so lo yeke gbia, me lo fa so Rome alingbi ti sala mbito pepee ngbanga ti Royaume ti lo. Jésus atene: “Royaume ti mbi ayeke ti sese so pepee. Tongana royaume ti mbi ayeke fade ti sese so, ka azo ti mbi atiri si amu mbi na ti ti aJuif pepee. Me, baa, royaume ti mbi ayeke ti sese so pepee.” Tongaso, fani ota, Jésus ayeda so lo yeke na mbeni Royaume, me so a yeke ti sese so pepee.

Me Pilate akiri ahunda: “Tongaso mo yeke gbia?” So aye ti tene, mo yeke gbia ataa so Royaume ti mo ayeke ti sese so pepee?

Jésus atene na Pilate so lo gbu nda ti tene ni nzoni, tongana lo tene: “Mo mveni mo tene mbi yeke gbia. A du mbi teti ye so, na mbi ga na sese teti ye so, ti sala tene ti témoin ti taa tene. Azo kue so ayeke na mbage ti taa tene ama yanga ti mbi.”

Biani, nda ti fini ti Jésus na ndo sese ayeke ti sala tene ti témoin ti “taa tene”, na mbilimbili taa tene na ndo Royaume ti lo. Jésus ayeke ndulu ti ngba be-taa-zo na taa tene so, ataa lo lingbi ti glisa fini ti lo. Pilate ahunda: “Taa tene ayeke nyen?” me lo ku ti tene afa na lo mbeni tene pepee. Tene so lo ma alingbi awe ti tene lo fa ngbanga.

Pilate asigigi na gbele azo mingi so aku na gigi ti yangbo ti gbia. Jésus ayeke biani na tele ti lo, na lo tene na akota prêtre nga na ala so amu peko ti ala: “Mbi wara ye ti sioni oko pepee na tele ti koli so.”

Tene so Pilate afa aso be ti azo ni, na ala tene na ngangu: “Lo yengi be ti azo ni na fango ye na sese ti Judée kue, na a londo na Galilée, so lo tondani da, asi ge.”

Salango ye ti aJuif so ayeke na lege ni pepee apika be ti Pilate mingi. Ni laa, na ngoi so akota prêtre na a-ancien angba ti dekongo, lo vi le ti lo na mbage ti Jésus na lo hunda na lo: “Mo yeke ma pepee gba ti atene so ala yeke bi na li ti mo so?” Me Jésus atara nga ti kiri na lo tene pepee. Dutingo kpo ti lo na gbele asioni tene ti mvene asala si be ti Pilate ado.

Tongana lo manda so Jésus ayeke zo ti Galilée, Pilate abaa mbeni nzoni lege ti zi tele ti lo na ya tene ni. Zo ti komande Galilée, Hérode Antipas (molenge ti Hérode ti Kota), ayeke na Jérusalem teti Pâque, tongaso Pilate ato Jésus na lo. Ngu kete kozoni, Hérode asala si afa go ti Jean Wabatizengo zo, na mbito agbu lo na pekoni tongana lo ma tene ti aye ti kpene so Jésus asala, teti mbito agbu lo so Jésus ayeke Jean so azingo lo na popo ti awakinda.

Fadeso, Hérode ayeke na ngia mingi ti baa Jésus. A ye ti tene pepee so ye so ayeke si ande na Jésus agbu be ti lo wala so lo gi ti hinga wala atene so abi na li ti lo ayeke taa tene wala wataka. Nde na so, lo sala gi nzala ti baa lo na lo ku Jésus ti sala mbeni ye ti kpene.

Ye oko, Jésus ake ti sala ye so Hérode aku na mbage ti lo. Biani, tongana Hérode ahunda lo, lo kiri tene oko pepee. Tongana ala wara ye so ala ku pepee, Hérode na aturugu ti lo ahe Jésus na ngia. Ala yu na lo mbeni bongo so aza zango na ala he lo. Na ndani ala kiri na lo na Pilate. Na peko ti ye so, Hérode na Pilate, so ando ayeke awato, aga ataa ndeko.

Tongana Jésus akiri, Pilate ahiri akota prêtre, amokonzi ti aJuif na azo ti mara ni, na lo tene na ala: “I ga na mbi na koli so tongana mbeni zo so ayeke pusu azo ti ke yanga-ti-komande, na, baa! mbi hunda lo na gbele i, me mbi wara na ya koli so pepee mbeni ye so alingbi na tene so i bi na ndo lo. Hérode nga awara ye na ya lo pepee, teti lo kiri lo na e; na, baa! lo sala mbeni ye oko pepee so alingbi na kui. Tongaso, mbi yeke pika lo na fade mbi zi lo.”

Tongaso, ti fani use, Pilate atene Jésus ayeke na tene na li ti lo pepee. Lo ye ti zi lo, teti lo hinga so a yeke gi ngbanga ti kota be si akota prêtre amu lo na ti ti lo. Me, tongana Pilate ayeke sala ngangu ti zi Jésus, mbeni ye asi so apusu lo biani ti zi lo. Na ngoi so lo yeke duti na ngende ti ngbanga, wali ti lo atokua yanga na lo so atene: “Sala ye oko na zo ti mbilimbili so pepee, teti mbi hu pono mingi laso na ya suma [so Nzapa atokua] ngbanga ti lo.”

Me, tongana nyen Pilate alingbi ti zi zo ti mbilimbili so, tongana ti so lo hinga lo lingbi ti sala ni? Jean 18:36-38; Luc 23:4-16; Matthieu 27:12-14, 18, 19; 14:1, 2; Marc 15:2-5.

▪ Jésus akiri tene na hundango tene na ndo Royaume ti lo tongana nyen?

▪ Jésus asala tene ti témoin ti “taa tene” wa na ngoi so kue lo yeke na sese?

▪ Pilate afa ngbanga wa, na azo abaa ni tongana nyen, na Pilate asala nyen na Jésus?

▪ Hérode Antipas ayeke zo wa, ngbanga ti nyen lo yeke na ngia mingi ti baa Jésus, na lo sala nyen na lo?

▪ Ngbanga ti nyen Pilate aye ti zi Jésus?