Chapitre 126

“Biani, zo so ayeke Molenge ti Nzapa”

A KANGA Jésus na ndo ti keke, ade ti ninga pepee, tongana asi na bikombite mbeni bingo, so zo ahinga ndani pepee, amu sese kue teti ngbonga ota. A yeke nze si akanga le ti la pepee, teti ye tongaso ayeke si gi na ngoi ti fini nze, na Pâque ayeke duti lakue na ngoi so nze afa tele ti lo kue na gigi. Na nga nze ayeke kanga le ti la teti gi kete ngoi. Bingo so ayeke biani ye so Nzapa aga na ni! A mu lege na awahengo Jésus ti gbu li ti ala na ti kaï même hengo ngia ti ala.

Tongana bingo amu ndo sese kozoni si zo ti sioni asuku na mba ti lo na ahunda Jésus ti dabe lo na lo, biani a lingbi ti duti mbeni oko ti aye so apusu lo ti sanze be ti lo. A yeke peut-être na ngoi ti bingo so si awali osio, so ti tene mama ti Jésus na ita ti lo Salomé, na nga Marie Madeleine na Marie, mama ti Jacques ti Kete ni, ague ndulu na keke ti pasi. Jean, bazengele so Jésus andoyee lo mingi, ague na peko ti ala.

Tongana mama ti Jésus abaa, na ya kota pono na tele ti keke, molenge so lo mu na lo me na so lo bata lo, a yeke lege-oko tongana épée ‘akpo be’ ti lo! Jésus abi be ti lo na mama ti lo mingi ahon pono so lo yeke hu. Lo sala ngangu, lo fa Jean na lege ti li ti lo na lo tene na mama ti lo: “Wali, baa! Molenge ti mo laa!” Na pekoni, lo yengi li ti lo na mbage ti Marie, na lo tene na Jean: “Baa! Mama ti mo!”

Jésus amu mama ti lo, so aga womua awe, na bazengele so lo ndoyee lo mingi. Lo sala tongaso teti ambeni molenge koli ti Marie ade ti fa na gigi mabe ti ala na lo pepee. Tongaso Jésus azia na e nzoni tapande na lege so lo leke ye ti bata mama ti lo na lege ti aye ti mitele nga na lege ti aye ti yingo.

Ndulu na ngbonga ota ni ti lakui, Jésus atene: “Mbi yeke na nzala ti ngu.” Jésus ahinga so Baba ti lo azi ngangu so ayeke bata lo, si atara dutingo be-taa-zo ti lo mbilimbili. Tongaso lo tene na kongo: “Nzapa ti mbi, Nzapa ti mbi, teti nyen mo zia mbi?” Na mango lo, ambeni na popo ti ala so aluti ka atene: “Baa! Lo hiri Elie.” Oko ti ala akpe loro hio, ti mu ndokoro so ayoro ni na kpingo vin, lo kanga ni na yanga ti pepe ti hysope na lo yoro ni na Jésus ti tene lo nyon ni. Me ambeni atene: “Zia lo! Fade e baa wala Elie ayeke ga ti zia lo na sese.”

Tongana Jésus awara kpingo vin so, lo dekongo: “Ye so aga taa tene awe!” Biani, lo hunzi ye kue so Baba ti lo ato lo na ndo sese ti sala. Ti hunzi tene ti lo, lo tene: “Baba, mbi mu yingo ti mbi na maboko ti mo.” Na lege ti atene so, Jésus akiri na Nzapa ngangu ti lo so amu na lo fini, na lo hinga so fade Nzapa ayeke kiri ni na lo. Na pekoni lo dengi li ti lo na lo kui.

Na ngoi so Jésus aga ti kui, sese ayengi ngangu mingi na akota tene asuru. Sese ayengi na ngangu ti kota ahon na a kungbi adu-kua so ayeke na gigi ti Jérusalem na abi akua na gigi. Azo so ayeke hon na lege abaa akua so, na tongana ala li na ya gbata, ala sala tene ti aye so ala baa.

Na ngoi so Jésus ayeke kui, kota bongo so akangbi popo ti Ndo ti Nzoni Kue na Ndo ti Nzoni Ahon Kue na ya ti temple ti Nzapa asuru use, alondo na nduzu a suru juska na sese. Bongo so ti pendere nzoroko ayo na nduzu mètre bale oko na ndoni miombe na a ne mingi! Na lege ti ye ti kpene so, Nzapa afa gi ngonzo ti lo na tele ti ala so afa Molenge ti Lo pepee, me lo fa nga so kui ti Jésus azi lege ti li na Ndo ti Nzoni Ahon Kue, yayu mveni.

Tongana azo abaa so sese ayengi ala na ala baa ambeni ye so asi nga, mbito asala ala mingi. Turugu ti kota kamba so abaa lege ti fango Jésus amu gloire na Nzapa. Lo tene: “Biani, zo so ayeke Molenge ti Nzapa.” Peut-être lo yeke da, tongana ague na Jésus na ngbanga na gbele Pilate, na azo atene Jésus atene lo yeke Molenge ti Nzapa. Fadeso, lo hinga na be ti lo kue so Jésus ayeke Molenge ti Nzapa, biani, lo yeke koli so ahon tanga ti azo kue.

Aye ti kpene so asala si be ti ambeni ado ngangu. Tongaso ala tonda ti kiri na ndo ti ala na ala pika libe ti ala ti fa so ala yeke na vundu mingi na kamela asala ala. Awali so ayeke adisciple ti Jésus aluti na mbeni ndo yongoro, na ala baa na dongo be aye ti kota mingi so asi. Bazengele Jean ayeke da nga. Matthieu 27:45-56; Marc 15:33-41; Luc 23:44-49; 2:34, 35; Jean 19:25-30.

▪ Ngbanga ti nyen a yeke pepee nze si akanga le ti la na a ga na bingo teti ngbonga ota na ndo sese?

▪ Ngoi kete kozoni na kui ti lo, Jésus azia nzoni tapande wa na azo so baba na mama ti ala aga kangba?

▪ Atene osio wa Jésus atene kozoni si lo kui?

▪ Yengingo ti sese asala nyen? Bongo ti temple so asuru use aye ti fa nyen?

▪ Turugu ti kota kamba so abaa lege ti fango Jésus atene nyen tongana lo baa aye ti kpene so asi?