Sese aga paradis

Jéhovah ayeke zi ande asioni ye kue so Satan asara. Jéhovah azia Jésus Gbia ti dunia kue. Na gbe ti komandema ti Jésus, sese ayeke ga ande paradis.—Daniel 7:13, 14; Luc 23:43.

Jéhovah amû zendo ti aye so:

• KOBE AYEKE SI SINGO: “Sese ayeke lë ande; Nzapa, so ayeke Nzapa ti e, ayeke sara tufa na ndö ti e.” “Alê ti kobe ayeke dü mingi na ndö ti sese; a yeke sigi gbani gbani na li ti ahoto.”—Psaume 67:6; 72:16.

• BIRA AYEKE DUTI DÄ ENCORE APE: “Ala ga abâ akusala so Jéhovah asara, ala bâ tongana nyen lo sara na ndö ti sese aye so apika bê ti zo. Lo yeke sara si abira ahunzi na ndö ti sese kue.”—Psaume 46:8, 9.

• AZO TI SIONI AYEKE DÄ ENCORE APE: “Ndali ti so a yeke futi azo ti sioni . . . Na yâ ti kete ngoi, azo ti sioni ayeke duti dä encore ape; mo yeke bâ ande place so ala yeke lani dä, me ala yeke duti dä encore ape.”— Psaume 37:9, 10.

• 

  KOBELA, VUNDU NA KUÂ AYEKE DÄ ENCORE APE: “Na ngoi ni so, lê ti awaziba ayeke zi, nga azo so mê ti ala akanga ayeke mä ndo. Na ngoi ni so, azo so gere ti ala abuba ayeke huru tongana lekpa, nga azo so yanga ti ala akanga ayeke dekongo na ngia.”—Ésaïe 35:5, 6.

  “Nga Nzapa wani ayeke duti ande na ala. Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:3, 4.

Satan na adémon ti lo ayeke tene mvene, me Jéhovah atene mvene lâ oko ape. Aye kue so lo mû zendo ni ayeke ga tâ tene (Luc 1:36, 37). Jéhovah aye mo na lo ye si mo duti na yâ ti Paradis so lo yeke leke ni ande. Tongaso, gi ti wara aTémoin ti Jéhovah ti tene mo hinga ye mingi na ndö ti apendere tâ tënë so ayeke na yâ ti Bible. Tongana mo sara ye alingbi na tâ tënë na yâ ti fini ti mo, ayeke zi mo na gbe ti afango ye ti mvene, ti atënë ti mvene so alondo na adémon nga ayeke zi lê ti mo. Na nda ni, a yeke zi mo na gbe ti siokpari na kuâ. Jésus atene: “Ala yeke hinga ande tâ tënë, na tâ tënë ayeke zi ala.”—Jean 8:32.