Gigi ti e ti kekereke ayeke duti ande tongana nyen?
NGBANGA TI NYEN A YEKE KOTA YE TI KIRI TËNË NA HUNDANGO TËNË SO? Lege so zo ayeke bâ na gigi ti kekereke alingbi ti sara ngangu na ndo ti lege so lo yeke sara na ye laso. Na tapande, azo so ayeke na beku mingi pëpe alingbi ti tene na bê ti ala atene: “Zia e te na nyon, teti kekereke e yeke kui.” (1 aCorinthien 15:32). Fani mingi, mara ti bibe tongaso ayeke pusu azo ti te ye ahon ndo ni, ti nyon sämba ahon ndo ni nga ti gi bê ti ala ahon ndo ni, na aye so ayeke sara si zo ayeke wara tâ siriri ti bê pëpe.
Biani, tongana fade gigi ti kekereke ti azo aluti gi na ndo ti angangu so azo ayeke sara, ka beku ayeke dä pëpe. Laso, azo ayeke buba nzoni pupu, ngu nga na sese ti fango na yaka ahon ti kozo. Azo ayeke na mbeto mingi ti tene azo asara kua na anene lê ti ngombe na yâ ti bira nga ala yeke na mbeto mingi ti aterroriste ahon ti kozo. Na ndo ti sese kue, azo ngbundangbu mingi ayeke na kobela nga ala yeke na yâ ti yere. Ye oko, ambeni raison ayeke dä ti tene e duti na beku.
Atâa so azo alingbi pëpe ti fa tâ na lege ni ye so ayeke si kekereke, Jéhovah Nzapa afa so lo yeke zo so ‘alingbi fa nda ti ye na lâ ni so ye ni akomanse; na lâ ti giriri, lo fa tënë ti ye so ade asi pëpe.’ (Esaïe 46:10). Jéhovah atene nyen na ndo ti gigi ti kekereke?
Bible atene ti lo nyen?
Jéhovah ayeke zia ande lege pëpe na azo ti tene ala buba sese biani biani. Lo yeke zia ande lege pëpe ti tene a futi biani biani azo, anyama nga na akeke so ayeke na ndo ti sese. Ti tâ tënë ni, Bible amû zendo so fade Nzapa ayeke “futi ala so afuti sese.” (Apocalypse 11:18). Na lege ti Royaume wala ngorogbia ti lo so ayeke na yayu, Jéhovah ayeke zi ande aye ti sioni kue na ndo ti sese na lo yeke sara si sese aga tongana ti so lo ye lani (Genèse 1:26-31; 2:8, 9; Matthieu 6:9, 10). Aversê so ayeke na gbe ni ge amû lege na e ti hinga ye so ayeke si ande, na a fa aye so ayeke ndu ande fini ti zo oko oko kue na ndo ti sese na yâ ti kete ngoi.
Psaume 46:9, 10. “Ga, i bâ kusala ti L’Eternel, bâ lege so Lo futi ndo na sese so. Lo sara si bira awe juska na nda ti sese; Lo fâ ngindi, na Lo fâ yâ ti likongo; Lo zö apuse ti mbarata na wâ.”
Esaïe 35:5, 6. “Na lâ ni kâ, fade lê ti awaziba alungula, na mê ti awambongi alungula nga. Na lâ ni kâ, fade zo so azin ahuru tongana tagba, na menga ti awabuburu asara bia; fade ngu asigigi na yando, na fade akete ngu asua na désert.”
Esaïe 65:21, 22. “Fade azo asara da, na ala duti na yâ ni; fade ala lu vigne na yaka, na ala te lê ni. Fade azo asara da si mbeni zo aduti na yâ ni pëpe; fade ala lu ye si mbeni zo ate pëpe”.
Daniel 2:44. “Fade Nzapa ti yayu ayä royaume so afuti lâ oko pëpe, na Lo zia royaume ni na tïtî ambeni zo nde pëpe; me fade royaume so afâ mbeni royaume so kue nduru nduru, na a sara si royaume nde nde so kue awe; na fade royaume so angbâ lakue lakue.”
Jean 5:28. “L’heure ayeke ga so azo kue so ayeke na du-kua, fade ala mä yanga ti [Jésus], na ala sigigi.”
Apocalypse 21:3, 4. “Nzapa mveni ayeke na popo ti ala, . . . fade lo mbô ngule kue na lê ti ala, na kui ayeke mbeni pëpe. Vundu, wala toto, wala sana, ayeke mbeni pëpe teti kozo ye ni ahon awe.”
Lege so kiringo tënë ti Bible asara biani si zo awara siriri ti bê
Gi na bango ni, zo alingbi ti tene hio so atënë ti yâ ti aversê so ge akpa ti ga tâ tënë pëpe. Me a yeke Nzapa la amû azendo so, a yeke azo pëpe. Na ndo ni, Jéhovah Nzapa “alingbi [ti tene] mvene pëpe”.—Tite 1:2.
Tongana mo gi ti zia bê ti mo kue na azendo ti Nzapa nga mo gi ti sara ye ague oko na andia ti lo, a yeke sara si mo ngbâ ti duti na siriri ti bê atâa ngangu kpale wa mo yeke tingbi na ni. Atâa a yeke bira, yere, kobela, na même akpale so gango mbakoro ayeke ga na ni wala mo bâ so mo ga nduru ti kui, mbeni oko ti akpale so ayeke kanga ande lege lakue lakue na mo pëpe ti duti na siriri ti bê. Ndali ti nyen? Ndali ti so mo hinga na bê ti mo kue so Royaume ti Nzapa ayeke sara ande si akpale so kue ahunzi.
Nyen la ayeke mû maboko na mo ti duti na mara ti beku ti kekereke tongaso? A lingbi mo gi ti duti na “bibe ti fini” nga mo gi ti hinga “ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.” (aRomain 12:2). Kite ayeke dä pëpe so mo yeke na bezoin ti hinga ambeni ye so ayeke pusu zo ti zia bê ti lo kue na ndo ti azendo ti Nzapa. Mo yeke wara aye ti nzoni tongana mo gi ti hinga aye ni so. So ayeke oko ti aye so mo lingbi ti sara na yâ ti gigi ti mo ti mû lege na mo ti wara siriri ti bê ahon ti kozo.
[Afoto na lembeti 7, 8]
Bible atene nyen na ndo ti gigi ti kekereke?