Mbage 5
Ngangu ti sala ye ti be ti zo: mbeni pendere matabisi
1, 2. Pendere matabisi wa ayeke mbeni mbage ti azo?
KOZO ti hinga ngbanga ti nyen Nzapa azia lege na vundu nga na lege wa lo yeke ga ti leke ye, a yeke nzoni e hinga mbilimbili tongana nyen lo leke e. Lo leke e gi na tele nga na mongoli pepee. Lo leke nga e na angangu ti bibe so ayeke nde.
2 Ngangu ti sala ye ti be ti zo ayeke mbeni kota mbage ti dutingo ti e na lege ti mongoli nga na bibe. Biani, Nzapa azia na ya ti e ngangu ti soro lege ti be ti e. So aduti giriri taa pendere matabisi so lo mu na e.
A leke e tongana nyen
3-5. Ngbanga ti nyen e yekia ngangu ti sala ye ti be ti zo?
3 Zia e baa kamba so ayeke na popo ti ngangu ti sala ye ti be ti zo na so Nzapa azia lege na vundu. Ti tondani, bi be ti mo na ndo ahundango tene so: Mo yeke na ngia ti soro na be ti mo ye so mo ye ti sala wala tene so mo ye ti tene, kobe so mo ye ti te na bongo so mo ye ti yu ni, mara ti kusala so mo ye ti sala, na ndo wa nga tongana nyen mo ye ti duti na ya fini ti mo? Wala, mo ye ti tene mbeni zo afa na mo atene oko oko so alingbi mo tene nga na aye nde nde so mo lingbi ti sala na ngoi kue ti fini ti mo?
4 Mbeni nzoni zo oko ayeda pepee ti ke ti mu li ni na ya fini ti lo. Ngbanga ti nyen tongaso? Ngbanga ti lege so Nzapa asala na e. Mbeti ti Nzapa atene na e so Nzapa asala zo ‘na image ti lo, tongana lo’; na mbeni ngangu so Nzapa ayeke na ni ayeke ngangu ti soro lege ti be ti lo (Genèse 1:26; Deutéronome 7:6). Na ngoi so lo leke azo, lo mu na ala pendere ye so: ngangu ti sala ye ti be ti zo. A yeke ngbanga ti ye so si be ti e ayeke so tongana amokonzi ti sioni akomande e na ngangu.
5 Tongaso, nzala ti liberté aga gi tongaso pepee, teti Nzapa ayeke Nzapa ti liberté. Mbeti ti Nzapa atene: “Na ndo so yingo ti Jéhovah ayeke, liberté ayeke.” (2 aCorinthien 3:17). Tongaso, ngangu ti sala ye ti be ti zo so Nzapa azia na be ti e ayeke mbage ti tele ti e mveni. Lo hinga giriri tongana nyen fade yingo ti e na abibe ti e ayeke tambela; tongaso lo hinga giriri so fade e duti na ngia mingi tongana e yeke na ngangu ti sala ye ti be ti e.
6. Nzapa amu nyen na mongoli ti e si lo lingbi tambela lege-oko na ngangu ti sala ye ti be ti zo?
6 Na ndo matabisi ti ngangu ti sala ye so be ti zo aye, Nzapa azia ngangu ti gbu li, ti haka nda ti ye, ti mu ambeni lege nga ti baa popo ti nzoni na sioni (aHébreu 5:14). Tongaso a lingbi ngangu ti sala ye ti be ti zo aluti na ndo sorongo lege so zo agbu ndani. A sala e pepee tongana amasini so ayeke na hingango ndo pepee, so ayeke pepee na bibe ti fa lege na ala mveni. A sala nga e pepee tongana anyama, so amu gi peko ti ye so alu na ya be ti ala kozoni. Nde na so, aleke kpengba mongoli ti e ti sala kusala alingbi na ngangu ti soro lege ti be ti e.
Mbeni tongo ndani so ayeke nzoni mingi
7, 8. Pendere tongo nda ti fini wa Nzapa amu ni na akozo baba na mama ti e?
7 Ti fa tongana nyen Nzapa abi be ti lo na ndo ala, na ndo matabisi ti ngangu ti sala ye ti be ti zo so, akozo baba na mama ti e, Adam na Eve, awara nga ye kue so zo so ayeke na li alingbi ti sala nzala ni. A zia ala na ya mbeni kota paradis so ayeke tongana pendere jardin. Ala yeke giriri na ye mingi na lege ti mitele. Ala yeke giriri na yingo nga na tele so ayeke nzoni kue; tongaso asala ala pepee ti ga mbakoro, ti ti kobela wala ti kui: ala lingbi giriri ti duti na fini ti lakue lakue. Ala lingbi ando ti wara amolenge so alingbi kue na so gigi ti ala ti kekereke alingbi ti duti nzoni mingi ahon. Sewa ti azo so ayeke ga kota alingbi giriri ti duti na mbeni kusala ti nzoni mingi: ti leke na ndani sese kue ti ga paradis. — Genèse 1:26-30; 2:15.
8 Na ndo ye so amu na ala, Mbeti ti Nzapa atene: “Nzapa abaa ye kue so lo sala, na baa a yeke nzoni mingi.” (Genèse 1:31). Lo tene nga na ndo ti Nzapa: “Kusala ti lo ayeke mbilimbili.” (Deutéronome 32:4). Taa tene, Wasalango ye amu na sewa ti azo mbeni fini so atondani nzoni mingi. A lingbi ti wara mbeni nzoni ahon so pepee. Nzapa abi be ti lo biani na ndo ala!
Liberté ayeke na ndani
9, 10. Ngbanga ti nyen alingbi ti leke nzoni salango ye na lege ti ye so be ti zo aye?
9 Ye oko, Nzapa aleke giriri ti tene salango ye ti be ti zo aduti na ndani pepee? Bi be ti mo kete na ndo ye so alingbi ti si na ya mbeni kota gbata tongana aleke pepee tambelango ti akutukutu, tongana zo oko oko alingbi ti tambela na ndo kue so be ti lo aye nga na loro ti be ti lo. Fade mo yeda ti tambela na ya ye tongaso? Oko pepee, teti so fade tambelango ti azo ayeke gue kirikiri na biani andau mingi alingbi ti si.
10 A yeke nga lege-oko na ngangu ti sala ye ti be ti zo, matabisi ti Nzapa so. Mbeni liberté so ndani ayeke da pepee aye ti tene mbeni kodoro so ye ague kirikiri da. A lingbi andia ayeke da ti fa lege na kusala ti azo. Tene ti Nzapa atene: “I sala ye tongana azo so ayeke na liberté, me pepee tongana azo so akamata liberté ti sala ye ti sioni.” (1 Pierre 2:16, Crampon-Tricot). Nzapa aye si salango ye na liberté ti sala ye ti be ti zo aduti na ndani teti nzoni ti azo kue. Ye so lo leke ando na be ti lo ayeke pepee ti tene e duti na liberté so ndani ayeke da pepee, me na liberté so ndani ayeke da, so aduti na gbe ti ndia.
Andia wa?
11. Ti bata andia ti zo wa si aleke e?
11 A yeke ti kpe andia ti zo wa si aleke e? Na 1 Pierre 2:16 e wara, na mbeni mbage ti verset ni, tene ti “angbaa ti Nzapa”. A sala ge pepee tene ti dutingo na ngbaa ti sioni; a ye ti tene biani so aleke e ti duti na ngia mingi tongana e yeda na andia ti Nzapa (Matthieu 22:35-40). Andia ti lo afa lege nzoni mingi ahon andia kue so azo aleke ni. “Mbi, Jéhovah, mbi yeke Nzapa ti mo, Lo so afa ye na mo si mo wara nzoni da, Lo so afa na mo lege so alingbi mo tambela da.” — Esaïe 48:17.
12. E yeke na liberté wa ti soro lege na ya ti akatikati so andia ti Nzapa alu ni?
12 Na mbage, andia ti Nzapa, na ya akatikati so lo fa ni, amu kota liberté ti soro lege mingi. Ye so asala si aye nde nde asi, tongaso dutingo ti azo aga ye ti pendere mingi. Bi be ti mo na ndo amara nde nde ti kobe, abongo, amozoko, aye ti ndara, nga na ada so e wara na ndo le sese. Taa tene, e ye ti tene e mveni e soro ye ti be ti e na popo ti aye so, ahon ti baa mbeni zo afa ye so alingbi e sala.
13. A lingbi e yeda na andia ti nda-gigi wa teti nzoni ti e?
13 Tongaso aleke e ti tene e duti na ngia mingi ahon gi tongana e yeda na andia ti Nzapa so afa lege na asalango ye ti zo. E lingbi ti haka ni na yengo da na andia ti nda-gigi so Nzapa alu ni. Na tapande, tongana e bi be ti e pepee na ndo ndia ti nda-gigi so afa atene ye kue so abi na nduzu ayeke ti na sese, na e hulu na mbeni ndo so ayo na nduzu, fade e yeke wara ka wala e lingbi ti wara kua. Tongana e bi be ti e na ndo andia ti tele ti e pepee na e zia ti te kobe, ti nyon ngu na ti wo pupu, fade e kui.
14. E hinga tongana nyen so aleke azo pepee ti duti nde na Nzapa?
14 Lege-oko tongana ti so aleke e na nzala ti yeda na andia ti nda-gigi so Nzapa alu ni, a sala e na nzala ti duti na gbe ti andia ti nzoni tambelango nga ti nzoni dutingo ti lo (Matthieu 4:4). A sala azo pepee ti wara ye ti nzoni nde na Wasalango ala. Prophète ti lo atene tongaso: “A yeke na be ti zo so atambela ti fa lege na gere ti lo pepee. Ô Jéhovah, mo wa mbi.” (Jérémie 10:23, 24). Tongaso, na ya aye kue, asala azo ti duti na gbe ti komandema ti Nzapa, na pepee ti duti na gbe ti ngangu ti ala mveni.
15. Andia ti Nzapa alingbi giriri ti duti nenee kungba teti Adam na Eve?
15 Batango andia ti Nzapa alingbi giriri ti duti nengo kungba teti akozo baba na mama ti e pepee. Nde na so, a lingbi giriri ti ga na nzoni dutingo na ala nga na sewa ti azo kue. Tongana kozo koli na kozo wali angba giriri na ya akatikati so andia ti Nzapa afa ni, ka ye kue aduti nzoni mingi. Taa tene, ka e duti laso na ya pendere paradis ti nzoye mingi na e duti mbeni sewa ti azo so abungbi oko na kamba ti ndoyee. Ka sioye, pasi na kui aduti da la oko pepee.
[Foto na lembeti 11]
Wasalango ye amu na azo tongo nda ti fini ti nzoni kue.
[Foto na lembeti 12]
Fade mo yeda ti gboto kutukutu na popo ti akutukutu mingi na ngoi so zo oko akpe ndia ti kpengo na kutukutu pepee?