Mbage 10
Pendere fini sese so fade Nzapa aleke ni
1, 2. Fade ye nyen ayeke si na pekoni so bira ti Harmaguédon alungula sioni kue na ndo le sese?
YE NYEN ayeke si ande na peko ni so bira ti Harmaguédon alungula sioye na ndo le sese? Fade mbeni pendere fini ngoi ayeke zi na gbele azo. Fade ala so aso kua na Harmaguédon, na so afa dutingo be-taa-zo ti ala na yanga ti komande ti Nzapa, ayeke li na ya fini sese. Fade fini ngoi ti Mbaï so ayeke duti ye ti ngia mingi, na ngoi so Nzapa ayeke kangbi ande apendere nzoye na ndo sewa ti azo!
2 Na gbe ti ngangu ti Royaume ti Nzapa, fade ala so aso kua ayeke leke mbeni paradis. Fade ala bi tele ti ala kue na ya akusala so ayeke ga na nzoye na azo kue so aduti na fini na ngoi ni ka. Fade sese ayeke tondani ti ga mbeni pendere ndo ti siriri, so ayeke nzoni kue teti zo.
Mbilimbili aga na peko ti sioni
3. Fade dengo be wa e yeke wara fade fade na peko ti Harmaguédon?
3 Ye so kue ayeke ga ande taa tene na lege ti futingo sese ti Satan. Aye so aga na kangbi tongana alege ti vorongo ti wataka, dutingo ti azo wala ayanga ti komande ayeke duti da mbeni pepee. Fango tene ti Satan ayeke handa ande azo mbeni pepee; abungbi kue so ayeke kangbi ando ni ayeke hon lege-oko na aye ti Satan. Mo bi be ti mo kete: asioni pupu kue ti sese ti Satan ahunzi awe! Fade aduti taa ye ti dengo be!
4. Fa ambeni ye so ayeke ga ande nde na ya fango ye.
4 Fade abibe ti sioni so yanga ti komande ti azo afa ni ayeke hon ti zia ndo na fango ye ti kpengbango zo so alondo na Nzapa. “Fade Jéhovah afa nda ti tene na amolenge ti mo kue.” (Esaïe 54:13). Na lege ti ye ti nzoni so afa na ya angoi so ayeke ahon, “fade sese ni asi na hingango ye ti Jéhovah biani”. (Esaïe 11:9.) Fade azo amanda sioni mbeni pepee, me “fade awakodoro ti sese so ale lengo ayeke manda lege ti mbilimbili”. (Esaïe 26:9.) Tongaso fade ngoi asi teti abibe na akusala so akpengba zo. — Kusala 17:31; aPhilippien 4:8.
5. Ye nyen ayeke si ande na sioni nga na azo ti sioni kue?
5 Tongaso, fade fango zo ayeke mbeni pepee, wala ye ti ngangu, wala gbungo wali na ngangu, wala nzi, wala salango ye ti ngangu nde nde. Zo oko ayeke baa ande pasi pepee teti asioni salango ye ti mbeni zo. A-Proverbe 10:30 atene: “Fade alungula azo ti mbilimbili la oko pepee; me fade azo ti sioni aduti na sese ni pepee.”
Akiri na sava ti tele ti nzoni kue
6, 7. a) Fade yanga ti komande ti Royaume ayeke lungula ye ti sioni wa? b) Jésus afa ni tongana nyen na ngoi so lo yeke giriri na ndo le sese?
6 Na ya fini sese fade alungula aye ti sioni kue so aga na lege ti kengo yanga ti Adam na Eve. Na tapande, fade yanga ti komande ti Nzapa ayeke lungula kobela na gango mbakoro. Laso, ataa mo yeke na sava ti tele so ayeke nzoni kete, mawa ni ayeke so na ngoi so mo yeke ga mbakoro mo yeke baa ndo nzoni mbeni pepee, apembe ti mo abuba, me ti mo ama ndo nzoni mbeni pepee, poro ti tele ti mo anokpo, aye ti tele ti mo awoko nga, na ndani mo kui.
7 Ye oko, aye ti vundu so alondo na kozo baba na mama ti e ayeke duti ande gi tene ti mbaï. Mo da be ti mo na ye so Jésus afa giriri na ndo sava ti tele na ngoi so lo yeke na ndo le sese? Mbeti ti Nzapa atene: “Na azo mingi mingi aga na lo, ala ga na azo so gere ti ala azin, azo so ti ti ala azin, awaziba, awabuburu, na ambeni zo mingi, na ala zia ala na gbele lo, na lo lungula kobela ti ala; tongaso be ti azo mingi so ado tongana ala baa awabuburu asala tene, azo so gere ti ala azin atambela, na awaziba abaa ndo.” — Matthieu 15:30, 31.
8, 9. Fa tene ti ngia so ayeke duti ande na ya fini sese tongana akiri aleke sava ti tele ti nzoni kue.
8 Fade a yeke duti ande kota ngia na ya fini sese tongana aye ti vundu ti e kue ahon! Fade e baa pasi mbeni pepee tene ti songo tele. “Fade wakodoro oko atene pepee: ‘Mbi yeke na kobela.’ ” “Na la ni ka, fade le ti awaziba alungula, na me ti awabongi alungula nga. Na la ni ka, fade zo so azin ahulu tongana tagba, na menga ti awabuburu asala bia na ngia.” — Esaïe 33:24; 35:5, 6.
9 Fade a yeke duti tene ti kota ngia pepee ti zingo lakue na ndapelele na ti baa so fadeso mo yeke na nzoni sava ti tele mingi? Fade a yeke duti nzoni ye pepee teti ambakoro ti baa so ala ga pendere la na la, na ndani ti wara tele na yingo ti mbilimbili tongana ti so Adam na Eve ayeke na ni kozoni? Baa ye so Mbeti ti Nzapa amu zendo ni: “Fade mitele ti lo aga nzoni ahon mitele ti molenge, lo kiri na la ti pendere ti lo!” (Job 33:25). So taa ngia si ayeke duti ande tongana zo abi alunette, aye ti mango na ndo, akeke na apuse ti tambelango na ni, nga na ayoro! Fade e duti mbeni pepee na ada ti kaïngo kobela, awanganga wala azo ti kaïngo kobela ti pembe!
10. Fade ye nyen asi na kui?
10 Azo so ayeke duti na pendere sava ti tele tongaso ayeke ye mbeni pepee ti wara kua. Biani, fade ala kui pepee, teti fade azo awara mbeni pepee kpale so aga na lege ti siokpari nga na kui. “Teti a lingbi [Christ a] komande juska Nzapa azia awato ti lo kue na gbe ti gere ti lo. Wato ti ndani, so fade alungula lo, ayeke kui.” “Matabisi so Nzapa amu ayeke fini ti lakue lakue na lege ti Christ Jésus Seigneur ti e.” — 1 aCorinthien 15:25, 26; aRomain 6:23; baa nga Esaïe 25:8.
11. Buku ti Apocalypse abungbi anzoye so ayeke si ande na ya fini sese tongana nyen?
11 Tongana lo bungbi anzoye so Nzapa, na ya ndoyee ti lo, ayeke mu ande na sewa ti azo na ya Paradis, tanga ti buku ti Mbeti ti Nzapa atene: “Na fade [Nzapa] ambo ngule kue na le ti ala, na fade kui ayeke mbeni pepee; fade vundu, wala toto, wala sana ayeke mbeni pepee. Ye ti kozoni ahon awe.” — Apocalypse 21:3, 4.
Akinda akiri na fini
12. Tongana nyen Jésus afa ngangu so Nzapa amu na lo ti yaa na akinda?
12 Jésus asala mingi ahon gi ti sava azo ti kobela nga na ala so gere ti ala azin. Lo yaa nga azo na ya dukua. Tongaso, lo fa pendere ngangu so Nzapa amu na lo ti zingo awakinda. Mo da be ti mo na tene so Jésus ague na da ti mbeni zo so molenge wali ti lo akui? Jésus atene na molenge wali so akui: “Molenge wali, mbi tene na mo, mo londo!” Ye nyen asi na pekoni? “Fade fade molenge wali so alondo, na lo tambela.” Tongana azo abaa ye so, “ala yeke na taa kota ngia mingi”. Ala lingbi ti kanga ngia ti ala pepee! — Marc 5:41, 42; baa nga Luc 7:11-16; Jean 11:1-45.
13. Fade ayeke zingo na popo ti awakinda mara ti azo wa?
13 Na ya fini sese, “fade ayaa na popo ti awakinda azo ti mbilimbili nga na azo ti kirikiri”. (Kusala 24:15.) Na ngoi ni so, fade Jésus asala kusala na ngangu so Nzapa amu na lo ti yaa akinda na dukua, alingbi na atene ti lo: “Mbi yeke londongo ti awakinda, na mbi yeke na fini. Zo so ama na be na mbi, même tongana lo kui, fade lo yeke na fini.” (Jean 11:25). Lo tene nga: “Azo kue so ayeke na dukua [azo so Nzapa ada be lo na ala] fade ala ma yanga ti lo [ti Jésus] na ala sigigi.” — Jean 5:28, 29.
14. Teti so kui ayeke duti ande mbeni pepee, fade ayeke lungula aye wa?
14 Mbeni kota ngia ayeke duti ande na ndo le sese kue na ngoi so, na lege ti abungbi nde nde, akinda ayeke kiri na fini ti wara azo so ala ndoyee mingi! Fade atene ti mawa ayeke mu vundu mbeni pepee na ala so aso kua. Nde na so, e lingbi ti baa ande: atokua so adi iri ti azo so azingo ala fade fade na dukua, teti ngia ti ala so andoyee ala mingi. Tongaso, lungo kua ayeke mbeni pepee, ndo ti zôngo akua nde nde ayeke mbeni pepee, na ando ti lungo kua ayeke mbeni pepee!
Sese so ayeke biani na siriri
15. Fade prophétie ti Michée ayeke ga taa tene tongana nyen?
15 Fade ayeke baa taa siriri na ambage kue ti fini. Abira, aye so aga na tiri nga na ada ti lekengo ngombe ayeke duti ande tene ti mbaï. Ngbanga ti nyen tongaso? Ngbanga ti so atene ti kodoro, na ti amara, so ayeke lingu ti kangbi, ahon awe. Tongaso, taa na lege ni, “fade ala yaa épée na tele ti mbeni mara pepee, na ala manda ti sala bira mbeni pepee”. — Michée 4:3.
16. Fade Nzapa ayeke bata tongana nyen si abira aduti mbeni pepee?
16 Zendo so alingbi ti do be ti zo tongana e baa Mbaï ti zo so asi na mene na so asi singo lakue na bira. Ye oko, ye ni asi tongaso ngbanga ti so azo aduti na gbe ti yanga ti komande ti azo nga na ti ayingo sioni. Baa ye so ayeke duti ande na ya fini sese, na gbe ti yanga ti komande ti Royaume: “I ga, i baa kusala ti Jéhovah (...). Lo sala si bira awe juska na nda ti sese. Lo fa ngindi, na lo fa ya ti likongo; lo zô apuse ti mbarata na wa.” — Psaume 46:8, 9 [46:9, 10 sg.].
17, 18. Na ya fini sese, fade akiri aleke siriri wa na popo ti azo na anyama?
17 Fade azo aduti nga na siriri na anyama, tongana ti so ayeke giriri na Eden (Genèse 1:28; 2:19). Nzapa amu zendo so: “Fade mbi te mbele na anyama ti benyama, na andeke ti nduzu, na anyama so ahara na sese; (...) na fade mbi sala si ala duti na siriri.” — Osée 2:18 [2:20 sg.].
18 Fade siriri so ayeke duti tongana nyen? “Fade ikaï aduti teti kete ngoi na ndo oko na molenge ti ngasangbaga, na molenge ti ngasa na ze alango na ndo oko, na molenge ti bagara, na pendere bamara, na nyama ti mafuta, fade ala kue alango na ndo oko; na fade kete molenge ti koli afa lege na ala.” Fade anyama ayeke duti mbeni pepee mbeni ye ti mungo mbito teti zo wala teti ambeni nyama. Fade “bamara ate pele tongana bagara”. — Esaïe 11:6-9; 65:25.
Sese aga Paradis
19. Fade aleke sese ti ga nyen?
19 Fade sese kue aga mbeni paradis teti azo. A yeke teti tene so si Jésus alingbi ti tene na mbeni koli so ama na be na lo: “Fade mo duti na mbi na ya Paradis.” Baa tene so e diko na ya Mbeti ti Nzapa: “Fade yando na kuru sese ayeke na ngia, na fade yando ayeke na taa ngia na ambumba tongana safran. (...) Teti fade ngu asigigi na yando, na fade akete ngu asua na yando.” — Luc 23:43; Esaïe 35:1, 6.
20. Ngbanga ti nyen fade nzala ayeke sala ngangu na azo mbeni pepee?
20 Na gbe ti Royaume ti Nzapa, fade ayeke baa mbeni pepee azo kutu mingi so abaa pasi tene ti nzala. “Fade le-kobe ayeke mingi na sese na li ti ahoto.” “Fade keke ti yaka ale le-keke, na sese ale le-kobe, na fade ala duti na siriri na sese ti ala.” — Psaume 72:16; Ezéchiel 34:27.
21. Fade ye nyen ayeke si teti tene ti da, ti ada so ayeke nzoni pepee nga na avaka so ayeke sioni?
21 Fade nzinga ahunzi, nga na azo so ayeke na da pepee, ada so ayeke nzoni pepee wala avaka so ye ti ngangu asi singo da. “Biani, fade azo asala da, na ala duti na ya ni; fade ala lu vigne na yaka, na ala te le ni. Fade azo asala da si mbeni zo aduti na ya ni pepee; na fade ala lu ye si mbeni zo ate pepee.” “Fade azo oko oko kue aduti na gbe ti vigne ti ala mveni, na gbe ti keke ti fige ti ala mveni, na zo oko ti mu mbito na ala ayeke pepee.” — Esaïe 65:21, 22; Michée 4:4.
22. Mbeti ti Nzapa asala tene ti adeba nzoni so fade yanga ti komande ti Nzapa ayeke ga na ni tongana nyen?
22 Aye so kue, nga na ambeni mingi, ayeke duti ande na ya ti Paradis, tongana deba nzoni teti azo. Psaume 145:16 atene: “Mo [Nzapa] lungula maboko ti mo na mo mu ye alingbi na nzala ti ye kue so ayeke na fini.” Ni laa ayeke tene ti dongo be pepee tongana prophétie ti Mbeti ti Nzapa atene: “Azo so ayeke na taa-be-ti-molenge, fade sese ni aga ye ti ala, na fade ala wara taa ngia na ya siriri so awu mingi. (...) Sese ni aga ye ti héritier ti azo ti mbilimbili, na fade ala duti da lakue.” — Psaume 37:11, 29.
A lungula ye ti giriri
23. Tongana nyen fade Royaume ti Nzapa ayeke ga ti lungula apasi kue so azo awara ni?
23 Fade yanga ti komande ti Royaume ti Nzapa ayeke kanga ndo ti aye ti sioni so asi na sewa ti azo na ya angu saki omene so ahon. Angia ti ngoi so ayeke kanga ande biani ndo ti apasi kue so azo awara ni. Fade bibe ti vundu ti apasi so ahon ayeke buba ande fini pepee. Abibe na akusala ti kpengba zo so ayeke duti ande na ya fini ti la oko oko ayeke lungula ande yeeke yeeke abibe ti vundu.
24, 25. a) Esaïe atene nyen kozoni? b) Ngbanga ti nyen e lingbi ti duti na beku so fade abibe ti ye ti giriri ayeke hunzi?
24 Nzapa, so abi be ti lo na ndo ti e, atene: “Fade mbi sala afini yayu [mbeni fini yanga ti komande na yayu teti azo] na mbeni fini sese [mbeni bungbi ti azo so ayeke mbilimbili]; na fade azo adabe ala na kozo ye pepee, na ala bi be ti ala da mbeni pepee. Sala ngia, na i duti na ngia lakue na ya ye so mbi sala.” “Sese ni kue aga na siriri, na aduti kpo. Ala sala bia na ngia.” — Esaïe 14:7; 65:17, 18.
25 Tongaso, na lege ti Royaume ti lo, Nzapa ayeke ga ti leke biaku ye so abuba na so aninga mingi. Teti lakue lakue, fade lo fa tongana nyen lo bi be ti lo na ndo ti e na tukungo adeba nzoni so ayeke kanga ande ndo ti asioni kue so e wara na ya fini ti e so ahon. Fade akpale so azo awara na ya angoi so ahon ayeke ga ande gi ngbele tene senge, tongana e ye biani ti da be ti e na ni.
26. Ngbanga ti nyen Nzapa ayeke ga ti futa e teti apasi so e wara?
26 A yeke na lege so si fade Nzapa ayeke futa ye teti apasi so e wara ni na ya sese ti laso. Lo hinga so a yeke e pepee si asala ti tene adu e na ya siokpari, teti e wara siokpari na lege ti akozo baba na mama ti e. Adu e na ya sese ti Satan, ye oko, a yeke e si aye tongaso pepee, teti tongana Adam na Eve aduti giriri be-taa-zo, ka adu e na ya mbeni paradis. Na lege ti kota ndoyee, fade Nzapa ayeke sala ande ye mingi ahon gi ti kanga ndo ti ye ti ngangu so e wara.
27. Aprophétie wa ayeke ga ande taa tene nzoni mingi na ya fini sese?
27 Na ya fini sese, fade azo atara liberté so asala tene ni na aRomain 8:21, 22: “Teti création mveni aku si azi lo na ya ye ti futi so asala lo na ngbaa, na a zia lo na ya liberté ti gloire ti amolenge ti Nzapa. Teti e hinga ye kue ti création abima na abaa pasi juska fadeso.” Fade azo ayeke baa taa gango taa tene ti sambela so: “Zia royaume ti mo aga! Zia asala na sese ye so be ti mo aye lege-oko tongana asala ni na yayu!” (Matthieu 6:10). Aye ti pendere so ayeke duti ande na ndo le sese ayeke duti gbede ti aye so ayeke na yayu.
[Afoto na lembeti 23]
Na ya fini sese, fade ambakoro ayeke wara ngangu ti la ti pendere.
[Foto na lembeti 24]
Fade alungula akobela na tele kue so azin na ya fini sese.
[Foto na lembeti 25]
Na ya fini sese, fade akiri na akinda na fini.
[Foto na lembeti 26]
“Fade ala manda ti sala bira mbeni pepee.”
[Afoto na lembeti 27]
Na ya ti Paradis, fade azo na anyama ayeke duti na siriri na popo ti ala.
[Foto na lembeti 27]
‘Fade Nzapa ayeke lungula maboko ti lo na lo mu ye alingbi na nzala ti ye kue so ayeke na fini.’
[Foto na lembeti 28]
Royaume ti Nzapa ayeke sala ande mingi ahon gi ti futa ye ti vundu so e wara ni.