Chapitre 13
Ngbanga ti Nyen Batango Tene ti Nzapa Aga na Ngia
JÉHOVAH ayeke “Nzapa so ayeke na ngia,” na lo ye si mo wara ngia na ya fini. (1 Timothée 1:11) Na tambelango na ya lege ti lo, mo lingbi ti baa nzoni mo mveni nga mo wara siriri ti be so ali na aninga, tongana mbeni ngu so asua lakue. Ti tambela na ya lege ti Nzapa ayeke pusu zo ti sala lakue akusala ti mbilimbili, so aga “tongana amapo ti kota ngu ti ingo.” Ye so ayeke ga na taa ngia.—Ésaïe 48:17, 18.
2 Ambeni zo alingbi ti ke, ala tene, ‘Ngoi na ngoi azo abaa pasi teti ala sala ye so ayeke mbilimbili.’ Biani, na a yeke ye so asi na abazengele ti Jésus. Ye oko, ataa so asala ngangu na ala, ala yeke na ngia na ala ngba “ti fa nzo tene na ndo Christ.” (Kusala 5:40-42) E lingbi ti manda ye mingi na ya ye so. Oko ni ayeke so batango tene ti Nzapa ti e aye ti tene pepee so fade ayeke sala lakue gi nzoni na e. Bazengele Paul asu na mbeti: “Biani, azo kue so aye ti tambela na lege ti batango tene ti Nzapa na ya Christ Jésus, fade ala hu pono ti ye ti ngangu.” (2 Timothée 3:12) Nda ni ayeke so Satan na sese ti lo ake ala so atambela na lege ti batango tene ti Nzapa. (Jean 15:18, 19; 1 Pierre 5:8) Ye oko, taa ngia aga pepee na lege ti aye so angoro e. Nde na so, a ga na lege ti hinga na be kue so e yeke sala ye so ayeke mbilimbili so ndali ni e yeke wara be-nzoni ti Nzapa.—Matthieu 5:10-12; Jacques 1:2, 3; 1 Pierre 4:13, 14.
3 Ambeni zo ayeke so abaa atene ala lingbi ti wara be-nzoni ti Nzapa na lege ti sala ngoi na ngoi kusala ti batango tene ti Nzapa me na ambeni ngoi nde ala lingbi ti glisa lo. Taa lege ti vorongo Jéhovah Nzapa ayeke tongaso pepee. A ndu tambela ti mbeni zo na ya ngoi kue so lo lango pepee, la na la, ngu na ngu. A yeke teti ye so nga si a di iri ni “Lege So.” (Kusala 19:9; Ésaïe 30:21) A yeke lege ti batango tene ti Nzapa so ahunda na e ti sala tene na ti sala ye alingbi na Tene ti Nzapa.
4 Tongana afini zo ti mandango Mbeti ti Nzapa abaa so a lingbi ala gbian ambeni ye na fini ti ala ti nzere na Jéhovah, peut-être ala hunda tele ti ala, ‘A lingbi biani ti tene zo abata tene ti Nzapa?’ A lingbi mo hinga biani a yeke tongaso. Ngbanga ti nyen? Ngbanga ti so “Nzapa ayeke ndoyee,” na alege ti lo ayeke teti nzoni ti e. (1 Jean 4:8) Nzapa ayeke nga na ndara na lo hinga ye so ayeke nzoni ahon teti e. So Jéhovah Nzapa ayeke na ngangu ahon kue, lo lingbi ti kpengba e ti sala ye alingbi na nzala ti be ti e ti nzere na lo na ziango lege ti mbeni sioni tambela. (aPhilippien 4:13) Zia e baa ambeni kpengba ndia ti ya ti batango tene ti Nzapa nga e baa tongana nyen salango ye alingbi na ni ayeke ga na taa ngia.
SALANGO YE NA LEGE NI AYEKE DU NGIA
5 Jéhovah ayeke “Nzapa ti taa tene.” (Psaume 31:6 [31:5, NW]) Kite ayeke pepee so, mo ye ti mu peko ti tapande ti lo si ahinga mo tongana mbeni zo so atene taa tene. Salango ye na lege ni aga na nengo tele na mbeni nzoni duti. Ye oko, teti salango ye na lege ni pepee ayeke ye so amu ndo ti sese ti kirikiri so kue, a lingbi aChrétien adabe na ye so: “I kue i tene taa tene na azo so ayeke ndulu na i . . . Zia wanzi anzi mbeni pepee, me zia lo sala kusala ngangu . . . si lo wara ye ti mu na zo so ye atia lo.” (aÉphésien 4:25, 28, NW) Chrétien so asala kwa ti nginza ayeke sala kusala ti la oko oko na lege ni. Ala yeke mu aye ti patron ti ala gi tongana lo mu lege na ala ti sala ni. Ataa na ndo ti kusala, na ekole, wala na da, zo so avoro Jéhovah alingbi tambela ‘na lege so alingbi na ya ye kue.’ (aHébreu 13:18) Zo so lakue ayeke tene mvene wala asala nzi alingbi wara be-nzoni ti Nzapa pepee.—Deutéronome 5:19; Apocalypse 21:8.
6 Ti sala ye na lege ni ayeke ga na adeba nzoni mingi. Selina ayeke mbeni womua ti Afrika so ayeke nga wanzinga, lo ndoyee Jéhovah Nzapa nga ambilimbili kpengba ndia ti lo. Mbeni la, lo wara mbeni kete bozo so na ya ni mbeti ti banque na kota nginza ayeke da. Na lege ti mbeni mbeti ti singa, lo wara wa ni—mbeni zo ti batango kungba si azo anzi lo. Li ti koli ni akpe na ngoi so Selina, ataa na kobela na tele ti lo, aga ti baa lo na akiri na lo aye kue ti ya ti bozo ni. Lo tene: “A lingbi a futa mara ti salango ye na lege ni so,” na lo mu na lo mbeni wungo ti nginza. Ye ti kota ahon, koli so agonda mingi lege ti vorongo ti Selina. Biani, salango ye na lege ni ayeke mu ye ti sepela na fango ye ti Mbeti ti Nzapa, a mu gonda na Jéhovah Nzapa, na a mu ngia na awavorongo lo so asala ye na lege ni.—Tite 2:10; 1 Pierre 2:12.
TI MU YE NA ZO AGA NA NGIA
7 Ngia ayeke ti mu ye na zo, me zo so ayeke na nzala ti wara ye mingi ayeke ga ande “héritier ti royaume ti Nzapa pepee.” (1 aCorinthien 6:10) Mbeni lege ti wara ye mingi so azo ahinga ayeke angia ti nginza, so ayeke ti gi ti wara nginza so ambeni aglisa. Jéhovah aye pepee ala so “ayeke na nzala ti wara faïda sioni.” (1 Timothée 3:8) Même na ndo so si andia amu lege na ngia ti nginza na mbeni zo asala ni tongana ye ti ngia senge, lo lingbi ti ga zo so aye tene ni mingi na so ayeke ga na mbeni salango ye so abuba fini ti azo mingi. Mingi ngia ti nginza aga na akpale na sewa ti lo so asala ni, so alingbi ti zia nginza gi kete teti ambeni ye tongana kobe na bongo.—1 Timothée 6:10.
8 Teti ala mu ye na zo na lege ti ndoyee, aChrétien awara ngia na mungo maboko na ambeni zo, mbilimbili afo ala awamabe so ye atia ala. (Jacques 2:15, 16) Kozo si Jésus aga na sese, lo baa nzala ti Nzapa ti mu ye na azo. (Kusala 14:16, 17) Jésus mveni amu ngoi ti lo, kode ti lo, na même fini ti lo teti azo. Na lege so, lo lingbi biani ti tene: “Ngia ayeke na zo so amu ye, ahon ngia ti zo so akamata ni.” (Kusala 20:35) Jésus asala nga nzoni tene ti womua so ayeke wanzinga so na nzala ti mu ye, azia kete nginza use na ya sanduku ti nginza ti temple, teti lo mu “ye kue so ayeke na lo.” (Marc 12:41-44) Azo ti Israël ti giriri nga na akozo Chrétien azia atapande ti nzala ti mu ye na ngia na gango na aye ti mitele ti mu maboko na kongrégation nga na kusala ti Royaume. (1 Chronique 29:9; 2 aCorinthien 9:11-14) Na ndo ti mungo aye na offrande teti aye tongaso, aChrétien ti laso asepela nga Nzapa na ngia na amu fini ti ala na ya kusala ti lo. (aRomain 12:1; aHébreu 13:15) Jéhovah adeba ala nzoni teti ala mu ngoi ti ala, ngangu na ambeni ye ti ala, na popo ni anginza ti ala, ti mu maboko na taa lege ti vorongo nga na kusala so amu sese kue ti fango nzo tene ti Royaume.—aProverbe 3:9, 10.
AMBENI YE SO AGA NA NGIA
9 Ti duti na ngia, a lingbi nga aChrétien ‘abi be ti ala na lege ni.’ (aProverbe 5:1, 2) Ye so ahunda ala ti diko na ti gbu li na ndo Tene ti Nzapa nga na ambeni nzoni buku so afa nda ti Bible. Me aye ti kpe ni ayeke da. Na tapande, nyongo samba ahon ndo ni alingbi ti sala si mbeni zo alingbi bi be ti lo na lege ni pepee. Tongana samba asala ala, mingi ti azo ati na ya ye ti pitan, salango ye na ngangu, nga ala ga na andau so azo akui da. A yeke ye ti dongo be pepee so Mbeti ti Nzapa atene angbaa ti samba ayeke li pepee na ya Royaume ti Nzapa! (1 aCorinthien 6:10) Na lekengo na be ti ngba “ti bi be ti ala na lege ni,” ataa Chrétien akpe ti nyon samba ahon ndo ni, na ye so aga na ngia na popo ti ala.—Tite 2:2-6.
10 Tele so ayeke nzoni ayeke ga na ngia. Ye oko, azo mingi aga angbaa ti asioni yoro. Na tapande, zia e baa tene ti nyongo manga na alege nde nde. Bungbi so abaa tene ti se-tele na ndo sese kue afa so nyongo manga “afa azo kutu ota ngu oko oko.” Ti zia lege ti nyongo manga fade fade a lingbi ti duti ngangu teti so na kozo ngoi a yeke ga na songo tele. Na mbage, mingi ti angbele zo ti nyongo manga abaa so ala wara seni ti nzoni ahon na ala bata nginza mingi ahon teti aye so atia sewa. Biani, ti hon ndo ti tene ti nyongo manga na alege nde nde wala ti duti ngbaa ti ambeni sioni yoro ayeke ga ande na nzoni tele, nzoni yingo-ti-hinga, nga na taa ngia.—2 aCorinthien 7:1.
NGIA NA YA MARIAGE
11 Ala so aduti koli na wali alingbi ti baa nzoni ti tene azia dutingo ti ala biani na ya mbeti ti azo ti komande. (Marc 12:17) A lingbi nga ala baa mariage tongana mbeni nenee kungba. Taa tene, kangbingo tele alingbi ti si teti ake na mbana ti bata sewa, apika zo ahon ndo ni, wala aga taa na mbeni sioni ye teti dutingo ti zo na lege ti yingo. (1 Timothée 5:8; aGalate 5:19-21) Me tene ti bazengele Paul na 1 aCorinthien 7:10-17 awa koli na wali ti kangbi pepee. Biani, ti wara taa ngia, a lingbi ala duti be-taa-zo na popo ti tele. Paul asu na mbeti: “A lingbi azo kue ayekia tene ti mariage, na a lingbi tange ti mariage aga sioni pepee, teti fade Nzapa afa ngbanga na li ti azo ti pitan na ti azo so asala lango sioni.” (aHébreu 13:4) Tene so atene “tange ti mariage” afa bungbingo ti koli na wali so amu tele na lege ti ndia. A lingbi pepee ti sala tene ti ambeni bungbingo ti koli na wali, tongana ti duti na awali mingi, tongana mbeni ye so “azo kue ayekia.” Na ndo ni, Mbeti ti Nzapa ake bungbingo ti koli na wali kozo na mariage nga na bungbingo ti koli na koli wala wali na wali.—aRomain 1:26, 27; 1 aCorinthien 6:18.
12 Pitan alingbi ti ga na mbeni kete ngoi ti nzerengo tele, me a lingbi pepee ti ga na taa ngia. A nzere na Nzapa pepee nga a lingbi ti buba yingo-ti-hinga ti zo. (1 aThessalonicien 4:3-5) Aye ti vundu so aga na lege ti bungbingo ti koli na wali so ayeke na lege ni pepee alingbi ti duti SIDA nga na ambeni kobela so awara na lege ti bungbingo ti koli na wali. Mbeni mbeti ti awanganga atene: “A baa so wungo ti azo ahon kutu 250 na ndo sese ayeke wara kobela ti sobisi ngu oko oko, nga ndulu na kutu 50 ayeke wara daveke.” Tene ti akpale ti mungo ngo so zo aye pepee ayeke da nga. Mbeti ti kota bungbi so abaa tene ti dungo na ndo sese kue afa so, na ndo sese kue, amolenge-wali ahon kutu 15 so ngu ti ala ayeke na popo ti 15 na 19 ame ngo ngu oko oko, na oko na popo ti ala ota atuku ngo. Mbeni gingo nda ti ye afa so na ya mbeni kodoro ti Afrika, na popo ti amaseka ngbangbo oko so awara kua, 72 akui tene ti kpale ti tukungo ngo. Ambeni zo ti pitan alingbi kpe akobela nga na ti mu ngo, me ala lingbi pepee ti kpe sioni ti gingo be. Mingi ti ala abaa tele ti ala na nenee ni mbeni pepee, même ake tele ti ala.
13 Ataa so a lingbi ti mu pardon teti lango sioni, a yeke mbeni ye so alingbi na Tene ti Nzapa teti lo so tene ni ayeke na li ti lo pepee ti kangbi mariage. (Matthieu 5:32; baa nga Osée 3:1-5.) Tongana mara ti ye ti pitan tongaso aga na mbeni kangbingo mariage, ye so alingbi mu ngangu vundu na lo so asala sioni pepee nga na amolenge. Teti nzoni ti asewa, Tene ti Nzapa afa so sioni ngbanga ti lo ayeke ga ande na ndo azo ti pitan nga azo ti lango sioni so agbian be ti ala pepee. Na ndo ni, a fa polele so ala so ayeke sala ye ti pitan fade ala “ga ahéritier ti royaume ti Nzapa pepee.”—aGalate 5:19, 21.
“TI SESE SO PEPEE”
14 Ala so aye ti nzere na Jéhovah nga ti wara adeba nzoni ti Royaume ayeke kpe alege nde nde kue ti vorongo yanda. Mbeti ti Nzapa afa so a yeke sioni mingi ti sala na ti voro a-image, na popo ni ala ti Christ, wala ti Marie, mama ti Jésus. (Exode 20:4, 5; 1 Jean 5:21) Tongaso, ataa Chrétien alingbi pepee ti voro afoto, a-croix, na a-image. Ala kpe nga alege ti mayele ti vorongo ayanda, tongana aye so asala ti voro abendere nga na hengo ambeni bia ti gonda kodoro. Tongana apusu ala na ngangu ti sala mara ti aye so, ala dabe ala na kiringo tene ti Jésus na Satan: “A lingbi mo sambela [Jéhovah, NW] Nzapa ti mo, na mo sala gi na lo oko.” (Matthieu 4:8-10) Jésus atene so adisciple ti lo “ayeke ti sese so pepee.” (Jean 17:14) So aye ti tene ala duti nde na ya ye ti poroso nga ala duti na ya ti siriri alingbi na Ésaïe 2:4, so atene: “Fade lo [Jéhovah Nzapa a, NW] fa ngbanga na popo ti amara, fade lo leke tene ti azo mingi. Fade ala pika épée ti ala si a ga soc, na likongo ti ala si a ga zeme ti fa ti keke. Fade mara ayaa épée na tele ti mbeni mara pepee, na fade ala manda lege ti sala bira mbeni pepee.”
15 Ti mu mbage na “sese so pepee” aye ti tene nga ti zia alege kue ti salango na “Babylone ti Kota,” kota bungbi ti alege ti vorongo ti wataka ti sese kue. Sioni lege ti vorongo so alondo na Babylone ti giriri akangbi juska aga na sioni komandema na lege ti yingo na ndo azo ti sese kue. “Babylone ti Kota” abungbi alege ti vorongo kue so afango ye nga na asalango ye ni ague nde na hingango ye ti Nzapa. (Apocalypse 17:1, 5, 15) Mbeni wavorongo Jéhovah so ayeke be-taa-zo ayeke sala beoko pepee na akusala ti ambeni lege ti vorongo nde nde wala na dutingo oko na lege ti yingo na mbeni mbage ti Babylone ti Kota. (Nombre 25:1-9; 2 aCorinthien 6:14) Ni laa, mingi ti afini zo so amanda Mbeti ti Nzapa atokua mbeti ti sigingo ti ala na ya bungbi ti vorongo so ala yeke da kozo. Ye so asala si ala ga ndulu mingi ahon na taa Nzapa, a lingbi na zendo so: “ ‘I sigigi na popo ti ala, i duti nde,’ [Jéhovah, NW] atene, ‘i ndu ye ti sioni oko pepee’; ‘na fade mbi kamata i.’ ” (2 aCorinthien 6:17; Apocalypse 18:4, 5) So ayeke nzala ti be ti mo pepee ti tene Baba ti e ti yayu ayeda na mo?
BAA MBILIMBILI ALANGO TI MATANGA TI NGU OKO OKO
16 Batango tene ti Nzapa azi e na ya salango amatanga ti sese so mingi aga na anenee kungba. Na tapande, Mbeti ti Nzapa afa na e pepee mbilimbili lango ti dungo Jésus. Ambeni alingbi ti tene: ‘Mbi baa ti mbi so adu Jésus na lango 25 ti décembre!’ So ayeke na lege ni pepee teti lo kui na printemps ti ngu 33 N.E, tongana lo yeke na ngu 33 na ndambo. Na ndo ni, na ngoi ti dungo lo, aberger “aduti na benyama ti bata anyama ti ala na bi.” (Luc 2:8) Na sese ti Israël, na hunzingo ti nze ti décembre de ayeke mingi na ngu apika mingi, tongaso na bi na ngoi ti sioni so, abata angasangbaga na ya da. Biani, azo ti Rome abaa lango 25 ti décembre tongana lango ti dungo nzapa ti ala so ayeke la. Ngu ngbangbo mingi na peko ti so Jésus ayeke na sese, aChrétien so ake lege ni amu lango so teti matanga ti dungo Christ. Tongaso, ataa Chrétien asala pepee matanga ti Noël wala ambeni nde so aluti na ndo atene ti vorongo ti wataka. Teti ala voro gi Jéhovah oko, ala bata nga pepee ambeni la ti matanga so avoro azo ti siokpari wala akodoro.
17 Mbeti ti Nzapa asala tene gi ti amatanga use ti la ti dungo zo, so ala use kue andu akoli so asala na Nzapa pepee. (Genèse 40:20-22; Matthieu 14:6-11) So Mbeti ti Nzapa afa pepee la ti dungo koli ti mbilimbili kue Jésus Christ, ngbanga ti nyen ti mu na nenee ni alango ti dungo azo so ayeke mbilimbili pepee? (Zo-ti-fa-tene 7:1) Ni laa, ababa na mama so abata tene ti Nzapa aku pepee mbeni lango so aleke ti fa ndoyee na amolenge ti ala. Mbeni molenge-wali Chrétien ti ngu 13 atene: “Mbi na sewa ti mbi ayeke sala ngia mingi. . . . Mbi yeke ndulu mingi na baba na mama ti mbi, na tongana ambeni molenge ahunda mbi ngbanga ti nyen mbi sala pepee ambeni matanga, mbi tene na ala mbi yeke sala matanga la na la.” Mbeni pendere Chrétien ti ngu 17 atene: “Na ya da ti e, e yeke mu amatabisi fani mingi na ya ti ngu oko.” Ngia ayeke mingi ahon tongana zo amu ye na be ti lo mveni.
18 Teti ala so agi ti bata tene ti Nzapa, mbeni lango oko na ya ngu oko oko ayeke da so ala bata ni. A yeke Kobe ti Lakui ti Seigneur, so mingi ahiri ni La ti Dabe na kui ti Christ. Na ndo ni, Jésus atene na azo so aga na peko ti lo: “I sala so ti dabe i na mbi.” (Luc 22:19, 20; 1 aCorinthien 11:23-25) Tongana Jésus azia na sese kobe so na bi ti lango 14 ti Nisan ngu 33 N.E, lo mu mapa so mama ni ayeke da pepee nga na bengba vin, so aduti fa ti tele ti lo ti zo so ayeke na siokpari oko pepee na mene ti lo ti mbilimbili kue. (Matthieu 26:26-29) A kangbi mapa na vin so na aChrétien so asa yingo ti nzoni-kue ti Nzapa na ndo ala. A zia ala na ya fini mbele nga na mbele teti Royaume, nga ala yeke na mbeni beku ti gue na yayu. (Luc 12:32; 22:20, 28-30; aRomain 8:16, 17; Apocalypse 14:1-5) Ye oko, ala kue so ayeke da na bi so alingbi na 14 Nisan na ngbele calendrier ti aJuif awara anzoye mingi. A da be ti ala na ndoyee so Jéhovah Nzapa na Jésus Christ afa na lege ti sadaka ti kota ngele so ahonde siokpari, so azi lege na azo so Nzapa ayeda na ala ti wara fini ti lakue lakue.—Matthieu 20:28; Jean 3:16.
KUSALA NA ANGOI TI NGIA
19 Ataa Chrétien ayeke na kungba ti sala kusala ngangu na ti mu ye so alingbi na tele ti ala. Salango tongaso amu ngia na amokonzi ti sewa. (1 aThessalonicien 4:11, 12) Taa tene, tongana kusala ti mbeni Chrétien alingbi na Mbeti ti Nzapa pepee, ye so alingbi ti lungula ngia ti lo. Ye oko, ngoi na ngoi a yeke ngangu teti mbeni Chrétien ti wara kwa so alingbi na ye so Mbeti ti Nzapa ahunda. Na tapande, a hunda na ambeni zo ti kusala ti handa aclient. Na mbeni mbage, mingi ti amveni ti kusala ayeke leke ye nde ti lingbi na yingo-ti-hinga ti mbeni zo ti kusala so asala ye na lege ni, teti ala ye pepee ti glisa nzoni zo ti kusala tongaso. Ye oko, ataa ye ni ayeke tongana nyen, a lingbi mo hinga biani so Nzapa ayeke deba nzoni na ndo ngangu so mo sala ti wara kusala so azia mo na nzo yingo-ti-hinga.—2 aCorinthien 4:2.
20 Teti Nzapa aye awakwa ti lo aduti na ngia, a lingbi e leke nzoni angoi ti ngangu kusala na anzoni ngoi ti sala ngia na ti wo tele. (Marc 6:31; Zo-ti-fa-tene 3:12, 13) Sese ti Satan amu aye ti ngia so ake Nzapa. Me ti nzere na Nzapa, a lingbi e soro ya ti abuku so e diko, aprogramme ti radio na ti mozoko so e yeke ma, na abia, alimon, athéâtre, aprogramme ti televizion nga ti vidéo so e yeke baa. Tongana ngia so e soro giriri alingbi pepee na agbotongo me ti Mbeti ti Nzapa tongana ti Deutéronome 18:10-12, Psaume 11:5, na aÉphésien 5:3-5, e yeke nzere ande na Jéhovah nga e yeke duti na ngia mingi ahon tongana e gbian ni.
BAANGO FINI NA MENE NA NENEE NI
21 Ti wara taa ngia, a lingbi e baa fini ti zo tongana ye so ayeke nzoni-kue, legeoko tongana ti so Jéhovah asala. Tene ti lo akanga lege na e ti fa zo. (Matthieu 19:16-18) Biani, Ndia ti Nzapa so amu na Israël afa so lo baa ngo tongana pepee mbeni ye ti futi—me tongana mbeni fini so ayeke na ngele ngangu. (Exode 21:22, 23) Legeoko nga, a lingbi pepee e mu fini tongana mbeni senge ye na lege ti nyongo manga, bubango tele ti e na lege ti ambangi wala samba, wala ti bi tele na ya ti ambeni ye so alingbi sala sioni na e. Ni laa, a lingbi e li pepee na ya mbeni salango ye so aga na kua wala e glisa pepee aye ti bata tele, ye so alingbi ti ga na ngbanga ti mene na li ti zo.—Deutéronome 22:8.
22 Jéhovah atene na Noé nga na sewa ti lo giriri so mene aduti fa ti âme, wala fini. Tongaso, Nzapa ake na ala ti te mene kue. (Genèse 9:3, 4) Teti e yeke amolenge ti ala, ndia so abaa e kue. Jéhovah atene na amolenge ti Israël so a yeke nzoni ti tuku mene na sese na pepee ti sala na mbeni ye ti be ti zo. (Deutéronome 12:15, 16) Nga, a kiri asala tene ti ndia ti Nzapa na ndo mene na ngoi so atene na aChrétien ti kozo siècle: “I ke . . . mene.” (Kusala 15:28, 29) Teti ala baa fini na nenee ni, azo so abata tene ti Nzapa aye pepee ti mu mene na ya tele, même tongana ambeni atene na ngangu so a lingbi ti so fini ti zo. Mingi ti alege ti savango zo so aTémoin ti Jéhovah ayeda na ni asala kusala nzoni mingi na azia zo na ya akpale pepee so aga na lege ti mungo mene na ya ti tele. A-Chrétien ahinga so gi mene ti Jésus oko so atuku alingbi biani ti so fini ti zo. Ti ma na be na ye so, ayeke ga na pardon nga na beku teti fini ti lakue lakue.—aÉphésien 1:7.
23 Biani, ti bata tene ti Nzapa ahunda ti sala ngangu. Peut-être e lingbi ti ga ye ti he teti azo ti sewa ti e wala akamarade. (Matthieu 10:32-39; 1 Pierre 4:4) Ye oko, futa ti duti na mara ti fini so ayeke kota mingi ahon akpale so alingbi ti si. Batango tene ti Nzapa aga na nzoni yingo-ti-hinga na a mu na e anzoni kamarade so ayeke awavorongo Jéhovah. (Matthieu 19:27, 29) Tongaso, bi be ti mo na ndo fini ti lakue lakue na ya fini sese ti mbilimbili ti Nzapa. (Ésaïe 65:17, 18) Na so kota ngia ti sala ye alingbi na awango ti Mbeti ti Nzapa na tongaso ti zia ngia na be ti Jéhovah! (aProverbe 27:11) A yeke senge pepee si batango tene ti Nzapa aga na ngia!—Psaume 128:1, 2.
TARA HINGANGO YE TI MO
Ambeni nda ti ye so afa ngbanga ti nyen batango tene ti Nzapa aga na ngia ayeke so wa?
Ti bata tene ti Nzapa alingbi ti hunda ti gbian aye wa?
Ngbanga ti nyen mo ye ti duti zo so abata tene ti Nzapa?
[Ahundango Tene ti Manda na Ye]
1. Ngbanga ti nyen e lingbi ti tene so lege ti Jéhovah aga na ngia?
2. Tongana nyen aChrétien alingbi ti duti na ngia ataa so ngoi na ngoi asala ngangu na ala?
3. A lingbi vorongo Jéhovah andu fini ti mbeni zo tongana nyen?
4. Ngbanga ti nyen a yeke nzoni ti gbian ye na ya fini ti lingbi na alege ti Nzapa?
5. Mbeti ti Nzapa atene nyen na ndo mvene na nzi?
6. Tongana nyen salango ye na lege ni ti mbeni zo so abata tene ti Nzapa alingbi ti mu gonda na Jéhovah?
7. Ye ti sioni wa ayeke na ya angia ti nginza?
8. Tongana nyen si Jésus afa mbeni nzoni tapande ti mungo ye na zo, nga na lege wa e lingbi ti duti azo so amu ye?
9. Ye ti sioni wa ayeke na nyongo samba ahon ndo ni?
10. (a) Ngbanga ti nyen aChrétien anyon manga pepee? (b) Aye ti nzoni wa aga na kengo ti duti ngbaa ti ambeni sioni ye?
11. Ti wara mbeni nzoni mariage so aninga na so alingbi na ndia ti kodoro a hunda nyen?
12. Ambeni sioni lengo so aga na lege ti pitan ayeke so wa?
13. Ambeni kpale so aga na lege ti lango sioni ayeke nyen, na ye nyen ayeke si ande teti ala so angba ti sala pitan na lango sioni?
14. (a) Ambeni lege ti voro ayanda so zo ti batango tene ti Nzapa alingbi ti ke ayeke so wa? (b) Fango lege wa azia na ya Jean 17:14 na Ésaïe 2:4?
15. Babylone ti Kota ayeke nyen, na mingi ti afini zo so amanda Mbeti ti Nzapa asala nyen ti sigigi na ya ni?
16. Ngbanga ti nyen ataa Chrétien asala matanga ti Noël pepee?
17. Ngbanga ti nyen azo so abata tene ti Nzapa amu mbage pepee na matanga ti la ti dungo zo, nga ngbanga ti nyen amolenge so ayeke Chrétien angba ti wara ngia?
18. Oko matanga ti ngu oko oko so Jésus akomande adisciple ti lo ti bata ayeke so wa, na a dabe e na nyen?
19. Kpale wa aChrétien ayeke wara na ya kusala so ala sala ti wara na kobe?
20. Ngbanga ti nyen a lingbi e baa ya ti angia so e soro ti sala?
21. Mungo fini na nenee ni alingbi ti ndu lege so e baa tukungo ngo nga na tambela legeoko na asalango ye ti e tongana nyen?
22. (a)Baango ndo ti Nzapa na ndo ti mene nga na aye so asala na ni ayeke so wa? (b) Gi mene ti zo wa aso fini biani?
23. Ambeni futa wa lege ti bata tene ti Nzapa aga na ni?
[Foto na alembeti 124, 125]
Lekengo nzoni akusala ti yingo nga na angoi ti wongo tele ayeke mu ngia na ala so abata tene ti Nzapa