Ye ti Manda 14

Lege so Aleke na Bungbi ti A-Témoin ti Jéhovah

Mbaï ti aTémoin ti Jéhovah ti laso ato nda ni lawa? (1)

Tongana nyen a mu li ni na abungbi ti aTémoin ti Jéhovah? (2)

A wara nginza ti futa na aye tongana nyen? (3)

Azo wa amu li ni na yâ ti kongrégation oko oko? (4)

Akota bungbi wa ayeke sala na ngu oko oko? (5)

Kusala wa ayeke sala na kota ndokua nga na afiliale ti ala? (6)

1. Mbaï ti aTémoin ti Jéhovah ti laso ato nda ni na ngu 1870. Kozoni, a di iri ti ala Awamandango Mbeti ti Nzapa. Me na ngu 1931 ala mu iri ti aTémoin ti Jéhovah so alondo na yâ Tene ti Nzapa. (Esaïe 43:10) Na tongo nda ni kete kete, bungbi ni akono ti si na aTémoin kutu mingi, so abi tele ti ala kue na yâ kusala ti fango tene na yâ akodoro ahon 230.

2. Mingi ti akongrégation ti aTémoin ti Jéhovah asala abungbi fani ota na yâ yenga oko. A tisa mo ti ga na mbeni. (aHébreu 10:24, 25) Mbeti ti Nzapa ayeke na gunda ti ye so ala fa. Abungbi ni ato nda ni nga ako nda ni na sambela. A yeke he nga na bê kue “abia ti yingo” na yâ mingi ti abungbi ni. (aEphésien 5:18, 19) Zo alingbi ti gue dä senge, na ayeke fono ti ro nginza pepe.​—Matthieu 10:8.

3. Mingi ti akongrégation asala bungbi ti ala na yâ mbeni Da ti Royaume. A-Témoin so amu tele ti ala teti kusala asala ada so lekengo ni akpengba pepe. Fade mo yeke ba pepe ayanda, a-croix, wala ambeni ye nde tongaso na yâ Da ti Royaume. A wara nginza ti futa na aye so atia kongrégation na lege ti offrande so amu na bê kue. Sanduku ti offrande ayeke dä teti ala so aye ti mu ye.​—2 aCorinthien 9:7.

4. Na yâ kongrégation oko oko, a wara a-ancien, wala asurveillant. Ala mu li ni na yâ fango ye na kongrégation. (1 Timothée 3:1-7; 5:17) Aserviteur ti mungo maboko asala kusala na tele ti ala. (1 Timothée 3:8-10, 12, 13) A yä pepe akoli so na ndo ti tanga ti kongrégation. (2 aCorinthien 1:24) A mu na ala pepe ambeni iri so ayeke nde. (Matthieu 23:8-10) Yungo bongo ti ala ayeke nde pepe na ti ambeni zo. Nga a futa ala pepe teti kusala ti ala. Na bê ti ala mveni a-ancien aba lege ti aye ti yingo so atia kongrégation. Ala lingbi ti lungula vundu na ti fa lege na ngoi ti kpale.​—Jacques 5:14-16; 1 Pierre 5:2, 3.

5. A-Témoin ti Jéhovah asala nga akota bungbi ngu oko oko. Na ngoi ni so, akongrégation mingi aga na ndo oko teti mbeni programme ti fango tene na ndo Bible so ayeke nde. Batême ti afini disciple ayeke mbeni mbage ti programme ti assemblée oko oko.​—Matthieu 3:13-17; 28:19, 20.

6. Kota ndokua ti aTémoin ti Jéhovah ayeke na New York (Amérika). Na ndo so, a wara Wabatango Bungbi, bungbi ti a-ancien so ahinga ye mingi, so ayeke bata kongrégation ti sese kue. Afiliale ahon 100 ayeke na ndo nde nde ti sese. Na ando so, azo so amu tele ti ala teti kusala ayeke sala ambeti na ndo Bible na ala yeke tokua ni na ndo nde nde. A yeke fa nga lege ti lekengo kusala ti fango tene. Ngbanga ti nyen mo gue pepe ti ba filiale so ayeke ndulu na mo?