Asango ti Royaume No. 36

Fini Ngoi ti Ngu Saki Oko—A Bata Mbeni Kekereke Wa Teti Mo?

Fini Ngoi ti Ngu Saki Oko—Tongo Nda ti Mbeni Fini Ngoi?

NA BEBI ti lango 31 ti décembre 1999, siècle 20 ni ako la ni nda ni.a A yeke mbeni siècle so aba aye ti wusuwusu mingi. Me a ba nga tongo nda ti afini senda-kode, maïngo ti kaïngo kobela so adö bê, guengo na li ni mingi ti asango, nga mbeni maïngo na loro ti konomi na ndo kue. Azo mingi ayamba fini ngu saki oko ni tongana fä ti beku na ti gbiango ye. Fade a yeke ba peut-être hunzingo ti bira, nzinga, bubango aye so angoro e, na kobela?

Mingi ti azo aku ti tene a duti tongaso. Me biani fini ngu saki oko ni alingbi ande ti gbian aye teti nzoni ti mo, agbiango ye so asala si fini ayeke duti nzoni teti mo na sewa ti mo? Zia e ba kota ni gi ti ambeni oko oko ti akpale so ayeke na gbele e.

Bubango Aye ti Ndagigi

Akodoro so ayeke na andokua ti masini mingi ayeke “na gunda ti kota bubango ti aye so angoro e na ndo kue, ti bubango na ti gbiango lege so aye ti ndagigi atingbi tele ti bata ye kue na lege ni.” Tongana ala ngbâ ti sala tongaso, “a yeke sala ande ngangu mingi na ndo ti aye ti ndagigi so angoro e.”—“Global Environment Outlook—2000,” Ndokua ti Bendo ti Gigi ti aye so angoro e.

Kobela

“Ti si na ngu 2020, a ku ti tene akobela so agbu zo gbungo pepe afâ azo 7 na ndo ti 10 na yâ ti akodoro so ague na li ni, tongana a haka ni na ti laso so wungo ti azo ni asi pepe na 5 na ndo ti azo 10.”—“The Global Burden of Disease,” Harvard University Press, 1996.

Ambeni wakode atene, “ti si na ngu 2010, na yâ ti akodoro 23 so kobela ti futi kodoro [SIDA] aga ngangu dä mingi, fade wungo ti azo ni ayeke kiri na peko kutu 66.”—“Confronting AIDS: Evidence From the Developing World,” mbeni tondo ti Commission européenne nga na ti Banque mondiale.

Nzinga

“Nginza so azo ndulu na ngbundangbu 1 na kutu 3 ayeke na ni ti duti na fini lâ oko oko ahon ngbangbo na bale use pepe, na ndulu na azo ngbundangbu 1 alingbi pepe ti wara aye so atia ala.”—“Human Development Report 1999,” Ndokua ti Bendo ti Gigi teti semaïngo (PNUD).

Bira

“Salango ngangu na yâ ti [akodoro nde nde] alingbi ti gue na li na mbeni lege so ade ti si kozoni pepe. Mara ti salango ngangu tongaso, . . . so [akangbi] na lege ti mara, akete mara na ti alege ti vorongo ayeke na gunda ni, . . . a yeke duti ande mara ti bira so ayeke mu ndo kue na yâ ti angu 25 so ayeke ga . . . , na a yeke fâ azo saki mingi mingi ngu oko oko.”—“New World Coming: American Security in the 21st Century,” U.S. Commission on National Security/21st Century.

Tongaso, adekongo na adongo tele ndali ti fini ngoi ti ngu saki oko ni ahonde ndo ti bubango aye ti ndagigi, kobela, nzinga na bira so angbâ lakue akota kpale. Aye so ayeke na gunda ti akpale so ayeke salango bê, ziango bê na ndo ti zo pepe, na bibe ti kion: aye so alingbi ti zi ni pepe gi na lege ti agingo ye ti senda-ye, senda-kode wala poroso.

Ngoi ti Ngu Saki Oko so Ayeke Ga Ande na Adeba Nzoni na Azo

Mbeni wasungo mbeti ti giriri atene mbeni lâ: “Lege ti zo ayeke na tïtî lo mveni pepe; na a yeke na bê ti zo so atambela ti fa lege na gere ti lo nga pepe.” (Jérémie 10:23) A yeke gi pepe kode ti komande sese si atia zo me a mu nga na lo pepe lege ti sala ni. Wasalango e, Jéhovah Nzapa, gi lo oko si ayeke na lege nga na kode ti leke akpale ti azo.—aRomain 11:33-36; Apocalypse 4:11.

Me lawa? Tongana nyen? Fä so e yeke ndulu na hunzingo ti “lâ ti nda ni” ayeke polele mingi. Tongana mo ye, zi Bible ti mo, na diko 2 Timothée 3:1-5 (New World Translation). A sala tene polele ti alengo so azo ayeke fa na gigi na “ngoi ti kpale” so. Na Matthieu 24:3-14 nga na Luc 21:10, 11 a sala nga tene ti “lâ ti nda ni.” A gboto lê ge na ndo ti aye so asi so lê aba ngbele ye na ngu 1914, tongana abira so amu sese kue, akobela ti futi kodoro, na akota nzala na ndo kue.

Na yâ ngoi kete “lâ ti nda ni” ayeke hunzi. Daniel 2:44 atene: “Fade Nzapa ti yayu ayä royaume so afuti lâ oko pepe, . . . me fade royaume so afâ mbeni royaume [ti sese] so kue ndulu ndulu, na a sala si royaume nde nde so kue awe; na fade royaume so angbâ lakue lakue.” Tongaso, a fa kozoni so Nzapa ayeke leke gere ti mbeni Royaume, wala ngorogbia, ti komande na ndo ti sese. Na lege ti Apocalypse 20:4, ngorogbia so ayeke komande teti ngu saki oko: mbeni ngoi ti ngu saki oko! Ba gi ambeni ye so alege so zo aduti na fini ayeke ga ande nzoni ahon teti azo kue na ngoi ti pendere Ngoi ti Ngu Saki Oko so:

Konomi. “Fade azo asala da, na ala duti na yâ ni; fade ala lu vigne na yaka, na ala te lê ni. Fade azo asala da si mbeni zo aduti na yâ ni pepe; fade ala lu ye si mbeni zo ate pepe.”—Esaïe 65:21, 22.

Seni. “Na lâ ni kâ fade lê ti awaziba alungula, nga mê ti awambongi azi. Na lâ ni kâ zo so azin ahulu ande tongana tagba, na fade menga ti wabuburu adekongo na ngia.” “Na fade mbeni wakodoro oko atene pepe: ‘Tele ti mbi aso.’”—Isaïe 33:24, NW; 35:5, 6, NW.

Aye so Angoro E. Fade Nzapa ‘afuti ala so afuti sese.’—Apocalypse 11:18.

Asongo na Popo ti Azo. “Fade ala sala sioni oko pepe wala asala pepe si afuti ye na yâ hoto ti mbi kue ti nzoni-kue; teti fade sese asi singo biani na hingango ye ti Jéhovah.”—Isaïe 11:9, NW.

Azo kutu mingi amä na bê na azendo ti Bible so na tongaso ala yeke na mbeni nzoni bango ndo ti gigi ti kekereke. Tongana ye ti pekoni, ala lingbi ti luti nzoni ahon na gbele angangu nga na akpale ti fini. Tongana nyen Bible alingbi ti ga mbeni ngangu so afa lege na yâ fini ti mo?

Hingango Ye so Ague na Fini!

Senda-Ye na senda-kode alingbi ngoi na ngoi ti sala si bê ti zo apika! Ye oko, hingango ye ti zo asala pepe si fini ti azo mingi aduti nzoni nga na ngia. A sala tene ti oko hingango ye so alingbi ti sala ni na yâ ti Bible na Jean 17:3 (NW), so atene: “So ayeke fini ti lakue lakue: ti tene ala manda ti hinga mo, oko tâ Nzapa, na lo so mo to lo, Jésus Christ.”

A wara mara ti hingango ye tongaso na yâ ti Bible. Atä so azo mingi ayeke na angangu bibe na ndo ti buku so ti nzoni-kue, mingi pepe agi awe nda ni ala mveni. Ti mo a yeke tongana nyen? Biani, dikongo Bible ahunda ti sala ngangu mingi. Me a lingbi biani na ni. Bible ayeke oko buku so “alondo na yanga ti Nzapa, na a yeke nzoni ti fa nda ti ye, ti zingo na azo, ti leke ye na lege ni, na ti mu wango tene na azo na yâ ye so ayeke na lege ni.”—2 Timothée 3:16, NW.

Tongaso, tongana nyen mo lingbi ti to nda ti manda Bible mo mveni? Ngbanga ti nyen pepe ti yeda na mungo maboko ti aTémoin ti Jéhovah? Ala yeke fa ye na azo kutu mingi na da ti ala mveni, na ala hunda pata oko pepe. Ti mu maboko na mo na ndo ye so, ala sala kusala na ambeti nde nde so aluti na ndo ti Bible, tongana brochure Ye Wa Nzapa Ahunda na E? Brochure ni amu akiringo tene so ayeke ndulu na ahundango tene mingi so peut-être mo yeke na ni so andu Bible, tongana: Nzapa ayeke zo wa? Ye wa Nzapa aleke ti sala teti sese? Royaume ti Nzapa ayeke nyen? Tongana nyen Bible alingbi ti sala si fini ti sewa ti mo aga nzoni ahon?

Tongana mo ye ti tene mbeni oko ti aTémoin ti Jéhovah aga na da ti mo, sû tene na ndo mbeti so ayeke na gbe ni ge. Ala yeke duti ande na ngia ti fa na mo ye mingi ahon na ndo ti pendere Komandema ti Ngu Saki Oko ti Royaume ti Nzapa!

□ Mbi ye ti wara brochure Ye Wa Nzapa Ahunda na E? Fa na yanga ti kodoro wa mo ye ti wara ni

□ I ba mbi teti mbeni mandango Bible senge senge na da

[Tene na Gbe Ni]