Chapitre Bale Use
Tïtî Jéhovah Aga Ndulu Pepe
1. Dutingo ti Juda ayeke tongana nyen, na azo mingi ahunda tele ti ala na nyen?
MARA ti Juda atene so lo yeke na yâ mbeni mbele so ayeke nde na Jéhovah. Ye oko, kpale ayeke na ndo kue. A yeke ngangu ti wara mbilimbili, kengo ndia na salango ngangu amu ndo kue, na beku ayeke pepe ti tene aye ni aga nzoni ahon. Mbeni ye ayeke na lege ni oko pepe. Azo mingi ayeke hunda wala fade Jéhovah ayeke leke atene ni. So ayeke dutingo ti aye na ngoi ti Isaïe. Me tondo ti Isaïe ti ngoi ni so ayeke pepe gi senge ngbele mbaï. A wara na yâ atene ti lo agbotongo mê ti prophétie teti azo kue so atene ala voro Nzapa me ake ti bata andia ti Lo. Nga prophétie so a sû na gbe ti yingo, so ayeke na Esaïe chapitre 59, amu pendere tene ti wa zo teti ala kue so ayeke sala ngangu ti sala na Jéhovah atä so ala duti na yâ ngoi ti ngangu na ti sioni.
Yongoro na Tâ Nzapa
2, 3. Ngbanga ti nyen Jéhovah ayeke bata pepe Juda?
2 Bi bê kete si. Azo so Jéhovah ate mbele na ala atï na yâ kengo tene ti mabe! Ala vi peko na Wasalango ala, na tongaso ala zi tele ti ala mveni na gbe ti tïtî lo so abata ala. Ndali ni, ala yeke wara akota vundu. Peut-être ala bi tene na li ti Jéhovah teti akpale ti ala? Isaïe atene na ala: “Ba, tïtî L’Eternel ayeke ndulu pepe, tongaso Lo lingbi sö azo; na mê ti Lo akanga pepe, tongaso Lo lingbi mä ndo nzoni; me sioye ti i akangbi i na Nzapa ti i, na siokpari ti i ahonde lê ti Lo na i, tongaso Lo mä i pepe.”—Esaïe 59:1, 2.
3 Atene so ayeke polele me tâ tene. Jéhovah ayeke lakue Nzapa ti salut. Teti lo yeke ‘Lo so amä sambela,’ lo mä asambela ti awakua be-ta-zo ti lo. (Psaume 65:3 [65:2, NW]) Ye oko, lo hiri deba nzoni pepe na ndo azo ti sioni. Azo ni mveni ayö kungba ti guengo yongoro ti ala na Jéhovah. Sioni ti ala mveni asala si lo kanga lê ti lo na ala.
4. Atene wa a bi na li ti Juda?
4 Tâ tene ni ayeke so Juda asala ye ti sioni mingi. Prophétie ti Isaïe afa molongo ti ambeni tene so ayeke na li ti azo ni: “Maboko ti i aga sioni na lege ti mênë, na li tïtî i aga sioni na lege ti sioye, yanga ti i asala tene ti wataka, na menga ti i asala tene ti ye ti kirikiri.” (Esaïe 59:3) Azo ni atene mvene na asala tene ti kirikiri. Salango tene ti “maboko . . . aga sioni na lege ti mênë” afa so ambeni même afâ zo. So ye ti kamela teti Nzapa, lo so Ndia ti lo ake gi pepe fango zo, me ake nga ‘kengo ita ti mo na bê ti mo’! (Lévitique 19:17) A lingbi salango siokpari kirikiri ti awakodoro ti Juda nga ye so ayeke si biani na nda ni adabe ti zo oko oko na popo ti e laso, so a lingbi e hon ndo ti abibe ti siokpari. Tongaso pepe, na nda ni e yeke sala asioni ye so ayeke kangbi e na Nzapa.—aRomain 12:9; aGalate 5:15; Jacques 1:14, 15.
5. Bubango ti Juda ague juska asi na ndo wa?
5 Kobela ti siokpari agbu mara ni kue. Prophétie ni atene: “Zo oko ague na ngbanga pepe na tene ti mbilimbili, na zo oko asala tene ti lo na lege ti tene-biani pepe; ala zia bê ti ala na ye senge, na ala sala mvene; ala më ngo ti ye ti kirikiri, na ala dü sioye.” (Esaïe 59:4) Zo oko ti sala tene ti mbilimbili ayeke pepe. Atä na yâ afango ngbanga, a yeke ngangu ti wara mbeni zo so a zia bê na ndo lo wala so ayeke be-ta-zo. Juda avi peko ti lo na Jéhovah na lo zia bê na ndo ambele so lo te na amara, même na ayanda so ayeke na fini pepe. Atä a yeke tongana nyen, ye so kue ayeke “ye senge,” na ngele oko pepe. (Esaïe 40:17, 23; 41:29) Ye ti pekoni ayeke so ala diko gbâ ti atene, me kue ayeke ye senge. Ala leke ti sala ambeni ye, me a ga na kpale nga na songo bê.
6. Tongana nyen salango ye ti Chrétienté ayeke tongana ti Juda?
6 Kirikiri na salango ngangu na yâ Juda akpa tele mingi na ti Chrétienté. (Ba “Jérusalem so Ake Tene ti Mabe: Mbeni Foto ti Chrétienté,” na lembeti 294.) A tiri asioni bira use so amu sese kue na yâ amara so a tene ala yeke ti aChrétien. Juska laso, vorongo ti Chrétienté ayeke na ngangu oko pepe ti kanga lege na zingo mbeni mara ti zia mbeni nde na place ni, nga fango tele na popo ti azo ti akete mara ti lege ti vorongo so. (2 Timothée 3:5) Atä so Jésus afa ye na adisciple ti lo ti zia bê na ndo Royaume ti Nzapa, amara ti Chrétienté angbâ lakue ti zia bê na ndo gbâ ti angombe ti bira nga na ndo ambele so lo te na azo ti poroso ti bata tele ti lo. (Matthieu 6:10) Biani, mingi ti akota walekengo angombe ayeke na popo ti amara ti Chrétienté! Biani, tongana Chrétienté azia bê na ndo angangu ti azo nga na andokua so a zia na sese ti bata zo, lo yeke zia nga bê na ndo “ye senge.”
Kongo Lengo so Asui
7. Ngbanga ti nyen aye so Juda aleke aga gi na ye so ayeke sioni?
7 Vorongo yanda na salango ye na lege ni pepe alingbi ti ga pepe na mbeni nzoni bungbi ti azo. Teti ala sala kusala na mara ti aye tongaso, aJuif so ayeke be-ta-zo pepe ayeke ko fadeso kpale so ala mveni alu. E diko: “Ala lungula wonzebira na para ni, na ala sala kamba ti tere; zo so ate para ti ala, fade lo kui; na tongana a fâ para ni, longo asigigi.” (Esaïe 59:5) A londo na ziango gere ni ti si na lekengo ni kue, aye so Juda aleke ti sala alë nzoni ye oko pepe. Asioni bibe ti ala aga gi na sioni, legeoko tongana ti so apara ti sioni ngbo adü gi asioni ngbo. Na mara ni aba pasi.
8. Ye wa afa so bingo bê ti Juda atambela nzoni pepe?
8 Ambeni wakodoro ti Juda asoro ti sala ye peut-être na lege ti ngangu na gingo kue ti bata tele ti ala mveni, me fade a yeke sala ye oko pepe. Ngangu ti mitele alingbi pepe ti mu place ti ziango bê na ndo Jéhovah na ti akusala ti mbilimbili tongana ye ti bata zo, legeoko tongana akamba ti tere alingbi pepe ti duti na place ti tâ bongo tongana ye ti bata tele na dê. Isaïe atene: “Fade kamba ti ala alingbi ga bongo pepe, na kusala ti ala alingbi honde tele ti ala pepe. Kusala ti ala ayeke kusala ti sioye, na maboko ti ala asala ye ti ngangu na zo. Gere ti ala akpe ti sala sioni, na ala sala fade fade ti sa mênë ti azo ti mbilimbili; ala bi bê ti ala gi na sioye; ye ti sala si ye aga yangbato na ye ti futi ye ayeke na lege ti ala.” (Esaïe 59:6, 7) Ye atambela nzoni pepe na yâ bingo bê ti Juda. Na salango kusala na ngangu ti gi ti leke akpale ti lo, lo fa na gigi mbeni bibe so ake Nzapa. A yeke ye oko na lê ti lo pepe so mingi ti azo so lo sala sioni na ala ayeke na tene na li ti ala pepe, nga so ambeni ayeke atâ wakua ti Nzapa.
9. Ngbanga ti nyen amokonzi ti Chrétienté alingbi pepe ti wara tâ siriri?
9 Atene so a sû na gbe ti yingo adabe ti e na sango mênë so ayeke na li ti Chrétienté. Biani, fade Jéhovah ayeke hunda lo ti kiri tene teti so lo fa oko pepe nzoni lege ti vorongo ti aChrétien! Legeoko tongana aJuif ti ngoi ti Isaïe, Chrétienté amu peko ti lege ti salango ye so ague kirikiri teti amokonzi ti lo aba so a yeke gi oko nzoni lege. Atä so ala sala tene ti siriri, ala sala ye kirikiri. Tâ so yanga use! Teti so amokonzi ti Chrétienté angbâ lakue ti sala kusala na kode so, fade ala wara tâ siriri pepe. A yeke legeoko tongana ti so prophétie ni akiri atene: “Ala hinga lege ti siriri pepe, na fango ngbanga ti mbilimbili ayeke na lege ti ala pepe. Ala sala si lege ti ala mveni angoro, zo so atambela dä ahinga siriri pepe.”—Esaïe 59:8.
Tatarango Ndo na yâ Bingo ti Yingo
10. Fango sioni na gigi wa Isaïe asala na iri ti Juda?
10 Jéhovah alingbi pepe ti hiri deba nzoni na ndo alege ti Juda so ague nde na abuba ye. (Psaume 11:5) Tongaso, na salango tene na iri ti mara ni kue, Isaïe afa na gigi sioni ti Juda: “Fango ngbanga ti mbilimbili ayeke yongoro na e, na mbilimbili asi na e pepe; e ku ti ba lumière, me, ba, bingo ayeke; e ku ti ba sungo ti lâ, me e tambela na bingo so avuko pitipiti. E tatara ndo ti gi tele ti da tongana awaziba; biani, e tatara ndo tongana zo so ayeke na lê pepe. E pika gere ti e na kota lâ legeoko tongana zo apika gere ti lo na lakui; e yeke tongana akuâ na popo ti akpengba koli. E kue e toto tongana a-ours, e bima mingi tongana abungu.” (Esaïe 59:9-11a) A-Juif azia pepe si Tene ti Nzapa aga lampe teti gere ti ala nga lumière teti lege ti ala. (Psaume 119:105) Tongana ye ti pekoni, aye aga bingo. Atä na kota bê ti lâ, ala tatara ndo mo ba mo tene a yeke bï. Ala duti tongana azo so akui awe. Na yâ kota nzala ti ala ti wara hungo tele, ala bima na kota go tongana a-ours so ayeke na nzala wala so awara kä. Ambeni atoto na mawa tongana abungu so aduti gi ala oko.
11. Ngbanga ti nyen abeku ti Juda teti mbilimbili na salut ayeke ye senge?
11 Isaïe ahinga nzoni so nda ti sioni dutingo ti Juda ayeke kengo Nzapa. Lo tene: “E ku ti ba fango ngbanga ti mbilimbili, me a yeke pepe; e ku salut, me a yeke yongoro na e. Teti kengo-ndia ti e awu na gbele Mo, na siokpari ti e asala tene ti témoin ti ke e; teti kengo-ndia ti e ayeke na e, na e hinga sioye ti e: e ke ndia, e bele tene ti L’Eternel, e vi peko ti e na Nzapa ti e, e sala tene ti salango ngangu na azo na ti kengo tene, na e bi bê ti e ti sala tene ti wataka.” (Esaïe 59:11-13) Teti so awakodoro ti Juda agbian bê ti ala pepe, asiokpari ti ala angbâ lakue na li ti ala. Mbilimbili akpe kodoro ni awe teti so azo ni azia Jéhovah. Na yâ aye kue ala fa so ala yeke azo ti mvene, ala sala même ngangu na aita ti ala. Ba tongana nyen a yeke legeoko na azo so ayeke na yâ Chrétienté laso! Mingi ake gi pepe mbilimbili, me na wâ, ala yeke sala ngangu na aTémoin be-ta-zo ti Jéhovah, so agi ti sala ye so bê ti Nzapa aye.
Jéhovah Asala Ye Alingbi na Fango Ngbanga
12. Bango ndo wa azo so ayö kungba ti sala ye alingbi na mbilimbili na Juda ayeke na ni?
12 A ba so fango ngbanga ti mbilimbili, mbilimbili, wala tâ tene ayeke na Juda pepe. “Fango ngbanga ti mbilimbili akiri na pekoni, na mbilimbili aluti yongoro; teti tene-biani atï na sese na gala, na mbilimbili alingbi lï dä pepe.” (Esaïe 59:14) Na peko ti ayanga-da ti agbata na Juda, a yeke wara akota ndo ti duti so ambakoro ayeke tingbi tele dä ti fâ ngbanga. (Ruth 4:1, 2, 11) A lingbi akoli so afâ ngbanga ti mbilimbili na atomba peko ti mbilimbili, a lingbi ala yeda pepe na goro. (Deutéronome 16:18-20) Nde na so, ala fâ ngbanga alingbi na abibe ti ala mveni ti kion. Ye ti sioni mingi ahon ayeke so ala ba azo kue so agi na tâ bê kue ti sala nzoni tongana ye so alingbi ti gbu ni na ngangu oko pepe. E diko: “Biani, tene-biani amanke; na zo so azia lege ti sioye ti lo, lo ga zo so azo anzi ye ti lo.”—Esaïe 59:15a.
13. Teti so awafango ngbanga ti Juda asala kusala ti ala na lege ni pepe, fade Jéhovah asala nyen?
13 Azo so asala tene polele pepe ti ke bubango nzoni salango ye aglisa so Nzapa ayeke pepe waziba, zo so ahinga ye pepe, wala so ayeke na ngangu pepe. Isaïe asû na mbeti: “L’Eternel aba ye so, na a yeke sioni na lê ti Lo, teti fango ngbanga ti mbilimbili ayeke pepe. Lo ba zo oko ayeke pepe, na bê ti Lo adö teti wasalasongo ayeke pepe; tongaso tïtî Lo mveni asala na Lo, mbilimbili ti Lo abata Lo.” (Esaïe 59:15b, 16) Teti so awafango ngbanga so a hiri ala na kusala asala kusala ti ala na lege ni pepe, fade Jéhovah ayôro yanga na yâ tene ni. Tongana lo sala ni, fade lo sala na yâ mbilimbili nga na ngangu.
14. (a) Bango ndo wa azo mingi laso ayeke na ni? (b) Tongana nyen Jéhovah aleke tele ti lo mveni ti sala ye?
14 Mara ti ye tongaso ayeke laso. E yeke na yâ mbeni sese so ‘kamela asala azo mingi mbeni pepe.’ (aEphésien 4:19) Azo mingi pepe amä na bê so fade Jéhovah ayeke sala ye mbeni lâ ti lungula sioni na ndo sese. Me prophétie ti Isaïe afa so Jéhovah ayeke ba akusala ti azo nzoni. Lo fâ angbanga, nga na ngoi so lo mveni adiko, lo sala ye alingbi na afango ngbanga so. Afango ngbanga ti lo ayeke na lege ni? Isaïe afa so a yeke tongaso. Na yâ ye so asi na mara ti Juda, lo sû na mbeti: “[Jéhovah a] yü mbilimbili tongana bongo ti wen na libe ti Lo, na Lo yü casque ti salut na li ti Lo; Lo yü futango kula tongana bongo, na Lo yü nzala ti sala ye tongana kota bongo.” (Esaïe 59:17) Atene ti prophétie so afa Jéhovah tongana mbeni walombe so ayü bongo teti bira. Lo leke na bê ti lo ti tene ye so lo leke ti sala aga nzoni. Lo hinga na bê ti lo kue so mbilimbili ti lo ayeke kota ahon kue, na zo alingbi ti dë kite na ni pepe. Na fade lo yeke duti na mbito pepe nga na wâ na yâ akusala ti lo ti fango ngbanga. Fade mbilimbili ayeke hon biani na ngangu.
15. (a) Fade atâ Chrétien ayeke sala ye tongana nyen na ngoi so Jéhovah asala ye alingbi na fango ngbanga? (b) A lingbi ti tene nyen na ndo afango ngbanga ti Jéhovah?
15 Laso na yâ ti ambeni kodoro, awato ti tâ tene atara ti sala si kusala ti awakua ti Jéhovah akiri na peko na kangbingo atene ti wataka nga na bingo zonga na ndo ti ala. Atâ Chrétien agi bê ti ala pepe ti luti na mbage ti tâ tene, me ala gi lâ oko pepe ti futa kula ala mveni. (aRomain 12:19) Atä na ngoi so Jéhovah ayeke ba Chrétienté so ake tene ti mabe, awavorongo lo na ndo sese ayeke mu ande pepe mbage na yâ futingo Chrétienté ni. Ala hinga so Jéhovah abata futango kula teti lo mveni na so fade lo yeke sala ye so alingbi tongana ngoi ni aga. Prophétie ni adë bê ti e: “Fade Lo futa ala na lege ti kusala ti ala; zo so ake Lo, fade Lo futa lo na ngonzo ti wâ, na Lo futa kula na wato ti Lo. Fade Lo futa kula na azoa nga.” (Esaïe 59:18) Legeoko tongana na ngoi ti Isaïe, fade afango ngbanga ti Jéhovah aduti pepe gi na lege ni, me fade ala lingbi kue. Fade ala yeke si même na “azoa,” na ayongoro ndo. Fade akusala ti fango ngbanga ti Jéhovah asi même na zo so aduti na yongoro ndo mingi wala zo so aduti gi lo oko yongoro.
16. Fade azo wa ayeke sö kuâ na ya akusala ti fango ngbanga ti Jéhovah, na fade ala manda nyen na lege ti salut ti ala?
16 Jéhovah ayeke fâ ngbanga na lege ni na ndo azo so asala ngangu ti sala ye mbilimbili. Isaïe afa kozoni so na ndo sese kue fade mara ti azo tongaso ayeke sö kuâ. Nga fade batango ndo ti Jéhovah ayeke kpengba mbito na gonda so ala yeke na ni teti lo. (Malachie 1:11) E diko: “Tongaso fade ala kpe mbito ti iri ti L’Eternel na mbage ti do, na fade ala kpe mbito ti gloire ti Lo na mbage so lâ alondo dä. Fade Lo ga tongana ngu so asua na ngangu, so mbö ti L’Eternel asala si a sua.” (Esaïe 59:19) Legeoko tongana so mbeni kota pupu so apusu na gbele lo mbeni kpengba ngu so afuti ye na alungula ye kue so ayeke na ndo lege ti lo, fade yingo ti Jéhovah alungula aye kue so akanga lege na gango tâ tene ti ye so bê ti lo aye. Yingo ti lo ayeke ngangu ahon angangu kue so zo ayeke na ni. Tongana lo sala kusala na ni ti sala ye alingbi na fango ngbanga na ndo azo nga na amara, fade lo hon biani na ngangu.
Beku na Deba Nzoni Teti Azo so Agbian Bê ti Ala
17. Zo ti Ton Sion ayeke zo wa, na lo ton Sion lawa?
17 Na gbe ti Ndia ti Moïse, mbeni zo nde alingbi ti kiri ti vo mbeni zo ti Israël so akä tele ti lo mveni na ngba. A fa Jéhovah kozoni awe na yâ buku ti prophétie ti Isaïe tongana Zo ti Ton azo so agbian bê ti ala. (Esaïe 48:17) Ge nga, a kiri a fa lo tongana Zo ti Ton azo so agbian bê ti ala. Isaïe asû na mbeti zendo ti Jéhovah: “L’Eternel atene, Fade Zo Ti Ton azo asi na Sion; fade Lo si na azo ti Jacob so azia lege ti kengo-ndia.” (Esaïe 59:20) Zendo ti dengo bê so aga tâ tene na ngu 537 K.N.E. Me lo yeke na mbeni gango tâ tene nde. Bazengele Paul afa peko ti atene so ayeke na yâ Septante na lo tingbi ni na aChrétien. Lo sû na mbeti: “Tongaso, fade azo kue ti Israël awara salut, legeoko tongana Mbeti ti Nzapa atene, Fade Sauveur alondo na Sion, a ga; fade Lo lungula, na popo ti azo ti Jacob, ye kue so ake Nzapa; na so ayeke mbele ti Mbi so fade Mbi te na ala na lâ ni so Mbi lungula siokpari ti ala.” (aRomain 11:26, 27) Biani prophétie ti Isaïe ayeke na kota gango tâ tene, so andu ngoi ti e na a hon so. Tongana nyen?
18. Lawa na tongana nyen Jéhovah adü “Israël ti Nzapa”?
18 Na kozo siècle, mbeni kete tanga ti mara ti Israël ayeda na Jésus tongana Messie. (aRomain 9:27; 11:5) Na lâ ti Pentecôte ti ngu 33 N.E., Jéhovah asa yingo ti lo ti nzoni-kue na ndo awamabe ndulu na 120 na lo ga na ala na yâ fini mbele ti lo so Jésus Christ ayeke wasala-songo ni. (Jérémie 31:31-33; aHébreu 9:15) Na lâ ni so “Israël ti Nzapa” aba gigi, mbeni fini mara so a hinga azo ti yâ ni, pepe ndali ti so ala yeke ahale ti Abraham na lege ti mitele, me ndali ti so a dü ala na lege ti yingo. (aGalate 6:16) A to nda ni na Corneille, a wara nga na yâ fini mara so aGentil so afâ ganza pepe. (Kusala 10:24-48; Apocalypse 5:9, 10) Tongaso Jéhovah Nzapa akamata ala tongana amolenge ti lo ti yingo, afon héritier na Jésus.—aRomain 8:16, 17.
19. Mbele wa Jéhovah ate na Israël ti Nzapa?
19 Jéhovah ate fadeso mbele na Israël ti Nzapa. E diko: “L’Eternel atene, So ayeke tene ti mbele ti Mbi so Mbi te na ala: Yingo ti Mbi so Mbi zia na ndo mo, na tene ti Mbi so Mbi zia na yanga ti mo, fade a zia yanga ti mo pepe, wala a zia yanga ti ahale ti mo pepe, wala a zia yanga ti ahale ti ahale ti mo pepe, a to nda ni laso juska lakue lakue, L’Eternel atene.” (Esaïe 59:21) Atä tongana aye so aga tâ tene na ndo Isaïe mveni wala pepe, ala ga biani tâ tene na ndo Jésus, so a dë bê ti lo so ‘lo yeke ba ahale ti lo.’ (Esaïe 53:10) Jésus asala tene ti aye so lo mä na mbage ti Jéhovah, na yingo ti Jéhovah aduti na ndo lo. (Jean 1:18; 7:16) Na lege ni, aita nga na afon lo héritier, azo ti Israël ti Nzapa, awara nga yingo ti nzoni-kue ti Jéhovah na ala fa tokua so ala manda na mbage ti Babâ ti ala ti yayu. Ala kue ayeke “azo so Jéhovah afa ye na ala.” (Isaïe 54:13, NW; Luc 12:12; Kusala 2:38) Atä na lege ti Isaïe wala na lege ti Jésus, lo so Isaïe aduti gbede ti lo na lege ti prophétie, fadeso Jéhovah adeba so lo yeke zia lâ oko pepe ambeni zo na place ti ala, me lo yeke sala kusala na ala teti ngoi so a diko nda ni pepe tongana atémoin ti lo. (Esaïe 43:10) Ye oko, azo wa ayeke “ahale” ti ala so ayeke wara nzoni na lege ti mbele so?
20. Tongana nyen zendo ti Jéhovah na Abraham aga tâ tene na kozo siècle?
20 Giriri, Jéhovah amu zendo na Abraham: “Fade biani amara kue ti sese ahiri deba nzoni na ndo ala mveni na lege ti hale ti mo teti mo mä yanga ti mbi.” (Genèse 22:18, NW) Legeoko na ye so, kete tanga ti azo ti Israël ti mitele so ayeda na Messie ni ague na yâ amara mingi, na fango nzo tene na ndo Christ. A to nda ni na Corneille, aGentil mingi so afâ ganza pepe “ahiri deba nzoni na ndo ala mveni” na lege ti Jésus, hale ti Abraham. Ala ga mbage ti Israël ti Nzapa, mbeni use mbage ti hale ti Abraham. Ala yeke mbage ti “mara so ayeke nzoni-kue” ti Jéhovah, so kusala ti lo ayeke ti “fa nzoye ti lo so ahiri [ala] ti sigigi na yâ bingo ti lï na yâ lumière ti lo so ayeke ye ti dongo bê.”—1 Pierre 2:9, NW; aGalate 3:7-9, 14, 26-29.
21. (a) “Ahale” wa Israël ti Nzapa adü na ngoi ti laso? (b) Tongana nyen mbele so Jéhovah ate na Israël ti Nzapa adë bê ti “ahale” ni?
21 Laso, a ba biani so a bungbi awe wungo kue ti azo ti Israël ti Nzapa. Ye oko, a ngbâ lakue ti hiri deba nzoni na ndo amara na ndo sese kue. Na lege wa? Na lege so Israël ti Nzapa ayeke na “ahale,” adisciple ti Jésus so ayeke na beku ti fini ti lakue lakue na ndo mbeni sese so aga paradis. (Psaume 37:11, 29) Jéhovah afa ye nga na “ahale” so na yâ alege ti lo. (Esaïe 2:2-4) Atä so ala kamata batême pepe na lege ti yingo ti nzoni-kue wala a ba ala pepe tongana azo so amu mbage na yâ fini mbele, yingo ti nzoni-kue ti Jéhovah amu na ala ngangu ti hon ndo ti akpale kue so Satan azia ti kanga lege na kusala ti ala ti fango tene. (Esaïe 40:28-31) Wungo ti ala asi fadeso na yâ ti akutu mingi na angbâ lakue ti gue na li ni na ngoi so ala mveni ayeke dü ahale. Mbele ti Jéhovah na ala so a sa yingo na ndo ti ala amu na “ahale” so kota beku so fade Jéhovah a ngbâ lakue ti sala nga kusala na ala tongana awatokua ti lo teti ngoi so a diko nda ni pepe.—Apocalypse 21:3, 4, 7.
22. Beku wa e lingbi ti duti na ni na Jéhovah, na a lingbi ye so andu e tongana nyen?
22 Tongaso, zia e kue e bata mabe ti e na Jéhovah. Lo yeke na nzala nga na ngangu ti sö zo! Fade tïtî lo ayeke ga ndulu pepe; lo yeke zi ande lakue azo ti lo so ayeke be-ta-zo. Azo kue so azia bê na ndo lo ayeke ngbâ ande lakue ti fa anzoni tene ti lo na yanga ti ala “a to nda ni laso juska lakue lakue.”
[Encadré na lembeti 294]
Jérusalem so Ake Tene ti Mabe: Mbeni Foto ti Chrétienté
Jérusalem, li-kodoro ti gbata ti mara so Nzapa asoro, aduti fä ti bungbi ti Nzapa ti acréature ti yingo so ayeke na yayu, nga bungbi ti aChrétien so a sa yingo na ndo ti ala, so a yä ala na popo ti akinda na yayu tongana fini-wali ti Christ. (aGalate 4:25, 26; Apocalypse 21:2) Ye oko, mingi ni, awakodoro ti Jérusalem aduti la ni be-ta-zo pepe na Jéhovah, na a fa gbata ni tongana mbeni wali pitan nga wali so asala lango sioni. (Ezéchiel 16:3, 15, 30-42) Na yâ dutingo so, Jérusalem aduti gbede ti Chrétienté so ake tene ti mabe.
Jésus ahiri Jérusalem “mo so mo fâ aprophète, na mo bolo na tênë azo so Nzapa ato ala na mo.” (Luc 13:34; Matthieu 16:21) Legeoko tongana Jérusalem so aduti be-ta-zo pepe, Chrétienté atene lo yeke sala na tâ Nzapa, me lo gue yongoro mingi na alege ti Lo ti mbilimbili. E lingbi ti zia bê kue so fade Jéhovah ayeke fâ ngbanga na ndo Chrétienté alingbi na a-oko lege so lo fâ na ngbanga na ndo Jérusalem so ake tene ti mabe.
[Foto na lembeti 296]
A lingbi mbeni juge afâ ngbanga na yâ mbilimbili, agi mbilimbili, na ayeda na goro pepe
[Foto na lembeti 298]
Legeoko tongana mbeni bale so aga na moa, fade afango ngbanga ti Jéhovah ayeke lungula aye kue so akanga lege na ye so bê ti lo aye
[Foto na lembeti 302]
Jéhovah adeba yanga so fade azo ti lo ayeke glisa lâ oko pepe matabisi ti duti atémoin ti lo