Mo lingbi ti bata ye na li nzoni ahon ti kozo
JÉHOVAH NZAPA aleke li ti zo na pendere ngangu ti dabe na ye. Lo leke ni ti tene a duti mbeni gogoro so zo alingbi ti gboto ye dä na lo girisa pëpe aye ti ngele ngangu so lo zia na yâ ni awe. Kode so a leke na li ague oko na ye so Nzapa aye, ti tene azo angbâ na fini lakue lakue.—Ps. 139:14; Jean 17:3.
Me mo lingbi ti bâ so mingi ti aye so mo zia na yâ ti li ti mo akpe kue. Mo bâ so tongana mo ye ti wara ni, a yeke dä pëpe. Mo lingbi ti sala nyen ti bata ye na li nzoni ahon ti kozo?
Sala nzara ti ye so mo yeke manda
Salango nzara ti ye ayeke kota ye mingi na yâ maïngo kode ti batango ye na li. Tongana e hinga biani ti bâ ndo nzoni, ti bi bê na azo nga na aye so ayeke si ndulu na e, fade ye so ayeke mû ngangu na bibe ti e. Tongaso, a yeke duti ande ngangu na e pëpe ti sala ye legeoko tongaso, na ngoi so e yeke diko na e yeke mä mbeni ye ti ngele ngangu.
Azo mingi ayeke na kpale ti dabe na iri ti ambeni zo. Ye oko, teti e yeke aChrétien, e hinga so azo ayeke na ngele ngangu: amba ti e Chrétien, azo so e yeke fa tënë na ala nga ambeni zo nde so e yeke tingbi na ala tongana e yeke sala aye so alingbi e sala na yâ fini ti e. Ye wa alingbi ti mû maboko na e ti dabe e na a-iri so a lingbi e girisa ni pëpe? Bazengele Paul afa molongo ti a-iri 26 ti azo so ayeke na yâ ti mbeni kongregation so lo to mbeti dä. Bingo bê ti lo na ala asigigi polele na lege so lo hinga gi iri ti ala pëpe, me lo fa nga anzene nzene tënë na ndo mingi ti ala (aRom. 16:3-16). Na ngoi ti e, ambeni surveillant so ague na ndo nde nde ti aTémoin ti Jéhovah ahinga biani ti dabe ala na a-iri, atâa so ala londo na mbeni kongregation ti gue na mbeni nde yenga oko oko. Ye nyen ayeke mû maboko na ala? A yeke peut-être so ala leke lakue ti sala kusala na iri ti mbeni zo fani mingi, tongana a yeke ti fani oko ni ti sala tënë na zo ni la. Ala sala ngangu ti tingbi iri ti zo ni na lê ti lo. Na ndo ni, ala mû ngoi mingi ti duti na azo nde nde na yâ fango tënë nga na angoi ti tengo kobe. Tongana mo tingbi na mbeni zo, mo yeke dabe mo ande na iri ti lo? To nda ti wara nzoni nda ti tënë ti dabe mo na iri ni; na pekoni tara ti mû peko ti mbeni ti awango so a mû na yâ paragraphe so.
Dango bê na ye so mo yeke diko ayeke nga kota ye. Ye nyen alingbi ti mû maboko na mo ti maï na lege so? Ti sala nzara ti ye nga ti gbu nda ti ye ayeke kota ye. A lingbi mo sala nzara mingi ti ye so mo yeke diko si mo zia bibe ti mo kue na ndo ni. Mo yeke bata ande pëpe atënë ni tongana bibe ti mo ayeke na mbeni ndo nde na ngoi so mo yeke tara ti diko ye ni. Gbungo nda ti ye ti mo ayeke ga nzoni mingi tongana mo zia kamba na popo ti atënë ni na aye so mo hinga nzoni mingi wala na ye so mo manda awe. Hunda tele ti mo: ‘Tongana nyen na lawa mbi lingbi ti sala ye alingbi na tënë so na yâ fini ti mbi? Tongana nyen mbi lingbi ti sala kusala na ni ti mû maboko na mbeni zo nde?’ Gbungo nda ti ye ti mo ayeke maï nga nzoni mingi tongana mo diko bungbi ti atënë, me pëpe lê ti tënë oko oko. Fade mo yeke mä yâ ni na mo yeke hinga angbongboro tënë ni hio, si a yeke ngangu na mo pëpe ti dabe mo na ni.
Mû ngoi ti kiri ti bâ ye ni
Awakode-kua ti fango ye agboto lê mingi na ndo nene ti kiri ti bâ ye. Na ngoi ti mbeni gingo nda ti ye, mbeni wafango mbeti na kota da-mbeti afa so penze-ngbonga oko so a mû ti kiri ti bâ ye fade fade na pekoni ayeke kono fani use wungo ti atënë so zo abata. Tongaso, fade fade na pekoni so mo hunzi awe ti diko ye, wala mbeni kota mbage ni, kiri mo bâ na li angbongboro tënë ni si mo bata ni na yâ li ti mo. Bi bê na ndo tongana nyen mo yeke fa na lege ti atënë ti mo mveni nda ti afini tënë kue so mo manda. Tongana mo kiri mo bi bê hio na ye so mo diko ade ti ninga pëpe, fade mo yeke kono yongo ti ngoi so mo lingbi ti bata ni.
Na yâ ti ambeni lango so aga na pekoni, gi lege ti kiri ti bâ ye so mo diko na salango tënë na ndo ni na ambeni zo nde. Mo lingbi ti sala tongaso na mbeni zo ti sewa ti mo, ti kongregation ti mo, zo so mo na lo ayeke sala kua oko, kamarade ti ekole, zo so ayeke na tele ti da ti mo wala zo so mo wara na fango tënë. Tara ti kiri ti tene peko ti akota tënë ni, me fa nga atënë na yâ Mbeti ti Nzapa so ague legeoko na ni. Salango tongaso ayeke ga ande na mo ye ti nzoni, a yeke mû maboko na mo ti bata akota ye na li ti mo; fade a yeke ga na ye ti nzoni na ambeni zo nde nga.
Gbu li nzoni na ndo akota ye
Na ndo ti kiringo ti bâ ye so mo diko awe nga salango tënë ni na ambeni zo nde, mo yeke bâ ande so gbungo li nzoni na ndo akota ye so mo yeke manda ayeke ga na ye ti nzoni. Awasungo Bible Asaph na David asala lani ye so. Asaph atene: “Fade mbi dabe mbi na kusala ti L’Eternel; biani, mbi dabe mbi na ye ti kpene ti Mo ti giriri. Fade mbi gi bê ti mbi na kusala ti Mo kue, na mbi bi bê ti mbi tënë ti ye so Mo sala.” (Ps. 77:12, 13). Tënë ti David so ague legeoko na ni: “Mbi bi bê ti mbi na Mo na bï kue”, nga “mbi dabe mbi na lâ ti giriri; mbi bi bê ti mbi na kusala ti Mo kue.” (Ps. 63:7; 143:5). Mo yeke sala ye so?
Mara ti gbungo li ngangu tongaso, so na yâ ni mo bi bê na aye so Jéhovah asala, alengo ti lo nga alege so lo fa na gigi ye so bê ti lo aye, ayeke sala ye mingi ahon gi ti mû maboko na mo ti bata aye na li. Tongana gbungo li tongaso ayeke ye so mo yeke sala lakue, fade a yeke yôro biani akpengba ye na yâ bê ti mo ngangu. Fade a yeke leke mara ti zo so mo yeke na yâ ni. Aye so mo bata na li ayeke fa na gigi atënë so ayeke tâ na gbe ti bê ti mo.—Ps. 119:16.
Kusala ti yingo ti Nzapa
Tongana e yeke gi ti dabe e na atâ tënë na ndo akusala ti Jéhovah nga na ndo aye so Jésus Christ asala tënë ni, a zia e gi tongaso pëpe. Na bï kozoni na kuâ ti lo, Jésus atene na adisciple ti lo: “Mbi sala tënë ti ye so na i, tongana Mbi de na i. Me Consolateur, Yingo Vulu, Lo so fade Babâ ato Lo na iri ti Mbi, fade Lo fa na i ye kue, na Lo dabe i na tënë kue so Mbi tene na i.” (Jean 14:25, 26). Matthieu na Jean ayeke lani na popo ti azo so ayeke dä. Yingo vulu aduti lani biani mbeni wamungo maboko na ala? Tâ tënë! Ngu miombe tongaso na pekoni, Matthieu ahunzi ti sû kozo tondo na ndo fini ti Christ so anzene nzene tënë ayeke dä mingi, so andu dango bê na aye ti ngele ngangu tongana Fango ye ti Jésus na ndo ti Hoto, fä ti singo ti Christ so aye mingi ayeke dä nga na ti hunzingo ti aye ti fadeso. Ngu 65 na peko ti kuâ ti Jésus, bazengele Jean asû Évangile ti lo, so a ndu anzene nzene tënë na ndo ye so Jésus atene na ndangba bï so abazengele aduti na Seigneur, kozo si lo kui. Biani, Matthieu na Jean angbâ ti dabe ala na wâ na aye so Jésus atene na lo sala na ngoi so lo yeke lani na ala, me yingo vulu asala kota kusala mingi si ala girisa pëpe akota nzene nzene tënë so Jéhovah aye si a sû ni na yâ Mbeti ti lo.
Yingo vulu ayeke mû maboko na awakua ti Nzapa laso? Lo yeke mû maboko! Biani, yingo vulu ayeke zia na yâ abibe ti e pëpe aye so e manda lâ oko pëpe, me lo yeke sala kusala tongana wamungo maboko ti kiri na yâ li ti e akota ye so e manda giriri awe (Luc 11:13; 1 Jean 5:14). Tongaso, tongana a hunda ni, a yeke pusu angangu ti e ti bi bê ti “girisa pëpe tënë so aprophète ti nzoni-kue atene giriri, na komandema ti Seigneur na Sauveur”.—2 Pi. 3:1, 2.
‘A lingbi mo girisa pëpe’
Fani mingi Jéhovah agboto mê ti Israël, lo tene: ‘A lingbi mo girisa pëpe.’ A ye lani ti tene pëpe so lo ku ti tene ala dabe ala na aye oko oko kue tâ na lege ni. Me a lingbi ala bi tele ti ala kue pëpe na yâ aye ti ala mveni si ala zia yongoro aye so Jéhovah asala, so ayeke na yâ ti li ti ala. A lingbi ala bata lakue na li ti ala lege so Jéhovah azi na ala, tongana ange ti lo afâ akozo molenge ti Egypte kue nga tongana Jéhovah azi yâ ti Ngu Bengba na lo kanga ni, na lo futi Pharaon na aturugu ti lo na yâ ngu. A lingbi azo ti Israël adabe ala so Nzapa amû na ala Ndia ti lo na Hoto ti Sinaï, na so lo fa lege na ala na yando nga ti lï na Sese ti Zendo. Ti girisa ni pëpe aye ti tene a lingbi aye so ala bata na li ti ala angbâ lakue ti sala ngangu mingi na ndo fini ti ala ti lâ oko oko.—Deut. 4:9, 10; 8:10-18; Ex. 12:24-27; Ps. 136:15.
A lingbi e nga e sala hange si e girisa ye pëpe. Na ngoi so e yeke luti na gbele aye so ayeke sala ngangu na ndo fini ti e, a lingbi e dabe ti e na Jéhovah, e bata na li mara ti Nzapa wa lo yeke nga ndoye so lo fa na gigi na mungo Molenge ti lo tongana matabisi. Molenge so amû fini ti lo teti asiokpari ti e si e lingbi ti wara fini so ayeke mbilimbili-kue teti lakue lakue (Ps. 103:2, 8; 106:7, 13; Jean 3:16; aRom. 6:23). Dikongo Bible lakue, mungo mbage biani na abungbi ti kongregation nga na fango tënë ayeke bata ande si atâ tënë ti ngele ngangu so angbâ na ngangu na yâ e.
Tongana a lingbi mo mû adesizion, akota ni wala akete ni, dabe mo na akota tâ tënë so, na zia ala sala ngangu na ndo bingo bê ti mo. Girisa pëpe. Bi lê na mbage ti Jéhovah ti wara fango lege ti lo. Ahon ti bâ atënë ni gi na lê ti mitele wala ti zia bê na ye so bê ti mo, so ayeke mbilimbili-kue pëpe, afa na mo fade fade, hunda tele ti mo, ‘Wango wala akpengba-ndia wa na yâ Tënë ti Nzapa a lingbi a sala ngangu na ndo desizion ti mbi?’ (aProv. 3:5-7; 28:26). Tongana mo diko wala mo mä mbeni ye lâ oko pëpe, mo lingbi pëpe ti dabe mo na ni. Me tongana tâ hingango ye nga ndoye ti mo teti Jéhovah ayeke kono, gogoro ti aye so mo bata na li, so yingo ti Nzapa alingbi ti mû maboko na mo ti dabe na ni, ayeke kono ande. Nga, fade ndoye ti mo teti Jéhovah, so angbâ lakue ti gue na li ni, ayeke pusu mo ti sala ye alingbi na ni.