Lekengo devoir ti élève
DEVOIR oko oko ti ekole ayeke mû lege na mo ti gue na li ni. Mû ngangu ti mo kue ti sala ni, na fade guengo na li ni ti mo ayeke sigigi polele yeke yeke na lê ti mo nga na ti ambeni zo (1 Tim. 4:15). Ekole ni ayeke mû ande maboko na mo ti maï akode ti mo nzoni mingi.
Tongana mo ga ndulu ti sala devoir na gbele kongregation, mo yeke gi bê ti mo? So ayeke na lege ni, atâa mo yeke na ekole ni a ninga awe. Ye oko, ambeni ye alingbi ti mû maboko na mo ti dë gingo bê ti mo. Na yanga-da, sala si dikongo mbeti na kota go fani mingi aga ye so mo yeke sala ka lakue. Na abungbi ti kongregation, kiri na tënë fani mingi, na tongana mo yeke wafango tënë, mû mbage lakue na fango tënë. Ye so ayeke mû ande na mo kode mingi na ndo salango tënë na gbele azo. Na mbage, leke adevoir ti mo hio kozoni, na tara pekoni na kota go. Dabe mo so mo yeke sala tënë ande na gbele azo so ayeke akamarade ti mo. Sambela Jéhovah kozo ti mû mbeni diskur. Na ngia na bê, lo yeke mû yingo vulu ti lo na awakua ti lo so ahunda ni na lo.—Luc 11:13; aPhil. 4:6, 7.
Hinga so mo lingbi ande pëpe ti sala ye kue gi nzoni. A hunda ngoi ti ga mbeni wamungo diskur so ayeke na kode mingi nga nzoni wafango ye (Mi. 6:8). Tongana mo yeke fini zo na ekole ni, ku tele ti mo pëpe ti sala mbeni devoir so ayeke nzoni mingi gi hio tongaso. Nde na so, gi ti sala kusala nzoni na ndo wango oko oko ti kode ti salango tënë. Manda mbage ti buku ni so asala tënë na ndo ni. Tongana lege ayeke dä, sala ye alingbi na aye ti tarango na tele so ayeke na hunzingo ti wango ti kode ti salango tënë oko oko. Ye so ayeke mû na mo ande kode mingi na ndo aye so andu tënë ti wango ni, kozoni si mo sala devoir ti mo na kongregation. Guengo na li ni ti mo ayeke ga na pekoni.
Lege ti leke devoir ti dikongo ye
Lekengo tele ti diko ye na gbele azo andu ye mingi ahon gi senge dikongo peko ti atënë so ayeke na lê ti mbeti. Sala ngangu ti gbu nda ni nzoni. Gi na ngoi ni so mo wara na devoir ti mo, diko ni kue nga zia na gbele mo ti gbu nda ti bibe so ayeke na yâ ti paragraphe oko oko ti mbeti ni, si mo lingbi ti fa ni na gigi nzoni mingi nga na atënë ti bê so alingbi na ni. Mo lingbi ti bâ na azo so ahinga yanga ti kodoro ni nzoni mingi tongana nyen ti diko peko ti ambeni tënë so mo hinga ni nzoni pëpe. Gi ti hinga mbeti ni nzoni, na a lingbi peut-être ababâ na mama amû maboko na akete molenge ti ala ti sala ye so.
A mû na mo devoir ti diko mbeni mbage ti Bible wala peut-être aparagraphe ti mbeni article ti Tour ti Ba Ndo? Peut-être mo lingbi ti hunda mbeni zo so ahinga ti diko mbeti nzoni ti diko ni na mo na kota go, na tongaso mo lingbi ti bâ tongana nyen lo yeke diko peko ti atënë ni, a yeke toto tongana nyen, lo yeke gboto lê na ndo ti atënë wa nga lo yeke gbian go ti lo tongana nyen. Na pekoni, gi ti yôro a-oko kode so na yâ dikongo ye ti mo mveni.
Tongana mo to nda ti leke devoir ti mo ni, sala kue ti manda nzoni mingi ye ti manda so amû wango na ndo kode ti salango tënë so a mû na mo. Tongana lege ayeke dä, kiri mo bâ ni na pekoni so mo tara peko ti dikongo mbeti ni na kota go fani mingi awe. Sala ngangu kue ti sala ye alingbi na awango ti buku ni.
Fango lege so ayeke mû ande maboko na mo nzoni mingi na fango tënë. Na ngoi so mo yeke fa tënë, alege mingi azi na mo ti diko ye na ambeni zo. Teti so Tënë ti Nzapa ayeke na ngangu ti gbian gigi ti azo, a yeke kota ye ti tene mo diko ni nzoni (aHéb. 4:12). A yeke pëpe na peko ti devoir oko wala use si mo yeke hinga pendere mingi ambage nde nde kue ti dikongo mbeti nzoni. A yeke lani na mbeni ancien so aninga ngu mingi tongana Chrétien si Paul asû mbeti so: “Zia bê ti mo na tënë ti diko mbeti na azo.”—1 Tim. 4:13.
Salango kusala na mbeni li ti tënë nga na cadre ti devoir
Tongana mo wara mbeni devoir ti ekole so andu salango kua na mbeni cadre, mo yeke sala tongana nyen?
A lingbi mo bâ akota ye ota so: (1) li ti tënë so a mû na mo, (2) cadre ti devoir ni na zo so mo yeke sala tënë na lo ande, nga (3) wango ti kode ti salango tënë so devoir ti mo aluti na ndo ni.
A lingbi mo bungbi asango ndali ti li ti tënë ni. Me kozoni kue, gbu li nzoni na ndo cadre ti devoir ni nga na ndo zo so mo yeke sala tënë ande na lo. A yeke aye so si ayeke fa ande aye so mo yeke sala tënë na ndo ni nga kode ti salango ni. Mo yeke sala ande kusala na cadre wa? A yeke ti fa nzo tënë na mbeni zo so mo hinga lo? Wala mo yeke fa ande ye so alingbi ti si tongana a yeke kozoni ti mo ti tingbi na mbeni zo? Zo ni ayeke kota zo na mo wala kete na mo? Salango ye ti lo alingbi ande ti duti tongana nyen na ndo tënë so mo ye ti fa? Aye wa lo hinga peut-être na ndo ni awe? Ye wa mo zia na gbele mo ti si dä na pekoni so mo hunzi lisoro ni awe? Akiringo tënë ni ayeke duti ande akota ye so ayeke fa lege na mo na yâ kusala ti mo.
Na ndo wa mo lingbi ti wara atënë teti devoir so a mû na mo? Buku so, na lembeti 33 ti si na 38, asala tënë na ndo “Lege ti gi nda ti ye.” Diko ni, na sala kusala na agbakuru ti gingo na nda ti ye so mo yeke na ni. Mingi ni, mo yeke wara ande aye mingi ahon aye so mo lingbi ti sala na kusala. Diko ni mingi ti hinga nzoni aye wa alingbi ti duti dä ti sala na kusala. Ye oko, tongana mo yeke sala ni, bata na li cadre so mo yeke sala kusala na ni ande, nga na zo so mo yeke sala ande tënë na lo. Zia marque na tele ti atënë so mo lingbi ti sala na kusala.
Kozoni si mo leke yâ ti devoir ti mo na mo soro andangba nzene nzene tënë ni, mû ngoi ti diko wango ti kode ti salango tënë so a mû na mo. Mbeni oko ti akota nda ti tënë ti devoir ti mo ayeke ti sala ye alingbi na wango so.
A yeke fa ande na mo so ngoi ti devoir ti mo ahunzi awe. Ni la, tongana mo hunzi devoir ti mo na yâ ngoi so a mû na mo, bê ti mo ayeke nzere ande teti mo wara lege ti tene atënë ti mo ti hunzingo ni. Ye oko, na yâ fango tënë, tënë ti ngoi ayeke lakue pëpe mbeni kota ye. Tongaso, tongana mo yeke leke tele ti mo, bâ na nene ni wungo ti ngoi so a mû na mo ti fa na ye ni, me nga ngbâ lakue ti bi bê na ndo nzoni fango ye.
Ambeni ndulu tënë na ndo acadre ti devoir. Bâ awango so ayeke na lembeti 82, na soro mbeni oko so ayeke lingbi ande na territoire ti mo na so ayeke mû lege na mo ti sala kusala na devoir ti mo tongana ti so aye ni ayeke si ka. Tongana mo ninga na yâ ti ekole ni kete awe, bâ ye so tongana mbeni lege so azi na mo ti zia ambeni ye na gbele mo ti wara nga ti maï ambeni kode nde na yâ fango tënë ti mo.
Tongana surveillant ti Ekole ti Kusala ti aChrétien amû na mo mbeni cadre, yeda ti sala ni, atâa so a yeke kete ye pëpe. Mingi ti acadre ni andu fango tënë. Tongana mo fa tënë lâ oko pëpe tongana ti so a fa na yâ ni, gi ti hinga atënë na ndo ni na mbage ti awafango tënë so afa tënë tongaso awe. Tongana lege ayeke dä, gi ti sala devoir ti mo na yâ mbeni cadre so aye ti lingbi na ti so a mû na mo ti sala ande na ekole ni. Ye so ayeke mû ande maboko na mo ti si na mbeni kota ye na yâ fango lege so mo yeke wara.
Tongana a lingbi a sala devoir ni tongana mbeni diskur
Tongana mo yeke koli, a lingbi ti mû na mo mbeni devoir ti fa ni tongana ndulu diskur na gbele kongregation. Ti leke adiskur so, a lingbi mo bi bê na ndo a-oko tënë so a fa awe teti adevoir so a yeke sala ni tongana démonstration. Gi azo so ayeke mä mo ande nga lege so mo yeke sala na devoir ni la ayeke duti nde.
Mingi ni, a yeke nzoni ti leke devoir ti mo ti tene azo oko oko kue so aga ti mä ni awara ye ti nzoni dä. Mingi ti azo ni ahinga awe akozo gere ti tâ tënë ti Bible. Ala lingbi peut-être ti hinga nzoni mingi tënë so devoir ti mo ayeke na ndo ni. Tongaso, bâ na nene ni ye so ala hinga na ndo ni awe. Sala ngangu ti sala devoir ti mo, si, na mbeni lege, ala wara ye ti nzoni dä. Hunda tele ti mo: ‘Tongana nyen mbi lingbi ti mû tënë ti devoir ti mbi ti sala si mbi na azo so ayeke mä mbi ande e kiri singila na Jéhovah ahon ti kozo? Ye wa na yâ ni ayeke mû ande maboko na mbi ti bâ ye so bê ti Nzapa aye? A lingbi ti mû maboko na e tongana nyen ti mû anzoni desizion na yâ mbeni sese so anzara ti mitele ahon ndo ni?’ (aEph. 2:3). Ti wara anzoni kiringo tënë na ahundango tënë so, a lingbi mo gi nda ti ye. Tongana mo yeke sala kusala na Bible, sala kue ti ngbâ pëpe gi na dikongo aversê. Fa nda ti aversê so mo yeke diko na fa tongana nyen ala yeke mû lege na zo ti si na anzoni tënë ti nda ni (Kus. 17:2, 3). Gi ti sala tënë na ndo gbâ ti aye pëpe. Sala devoir ni na mbeni lege so a yeke duti ande ngangu pëpe ti dabe na ni.
Tongana mo yeke leke tele ti mo, a lingbi mo bâ nga kode ti mo ti fango ye ni. Bâ ni tongana senge ye pëpe. Tara pekoni na kota go. Ngangu so mo yeke sala ti manda awango na ndo akode ti salango tënë nde nde, nga ti sala ye alingbi na ni, ayeke sala ande kota ye mingi na yâ guengo na li ni ti mo. Atâa mo yeke fini zo na Ekole ni wala mo ninga dä awe, leke tele ti mo nzoni si mo lingbi ti sala tënë na bê kue nga na atënë ti bê so alingbi na tënë ti devoir ti mo. Na ngoi kue so mo yeke sala devoir ti mo oko oko na ekole, bata na li ye so mo zia na gbele mo: ti mû matabisi ti tenengo tënë so Jéhovah amû na mo ti gonda na lo.—Ps. 150:6.