Kpengba azo na mû na ala beku

TOKUA so a mû na e ti tene pekoni ayeke nzo tënë. Jésus atene: “A lingbi a fa Tene-nzoni na amara kue kozoni.” (Marc 13:10). Jésus mveni azia tapande ni. Lo gboto lê ti azo na ndo “Tene-nzoni ti royaume ti Nzapa”. (Luc 4:43). A fa nga ye so abazengele afa tongana “Tene-nzoni ti Nzapa” nga “Tene-nzoni ti Christ”. (1 aThes. 2:2; 2 aCor. 2:12). Mara ti tokua tongaso ayeke kpengba zo.

Ti sala ye alingbi na tongo mbela ti “Tene-nzoni ti lakue lakue” ti “ange [so] ayeke hulu na nduzu,” e wa azo ti “kpe mbito ti Nzapa, [ti] mû gloire na Lo.” (Apoc. 14:6, 7). E yeke sala tënë na azo na ndo kue na ndo tâ Nzapa, iri ti lo, apendere salango ye ti lo, apendere kusala ti lo, ye so lo leke na ndoye ti sala, tënë so e yeke na ni ti kiri ni na lo nga ye so lo hunda na e. Nzo tënë andu tâ tënë so atene Jéhovah Nzapa ayeke futi ande azo ti sioni, azo so amû gloire na lo pëpe na ala so abuba gigi ti ambeni zo nde. Me a yeke na e pëpe ti fâ ngbanga na ndo zo oko oko so e fa tënë na lo. Ye so agbu bê ti e ngangu ayeke ti tene azo mingi so e fa tënë na ala ayeda na tënë ti Bible si a ga biani nzo tënë teti ala.​—aProv. 2:20-22; Jean 5:22.

Sala kusala na asioni sango mingi pëpe. Tâ tënë, asioni ye ayeke dä, na e yeke kanga lê ti e na ndo ti aye so pëpe. Ti to nda ti mbeni lisoro, mo lingbi ti sigigi na mbeni kpale so ayeke na yâ ti li ti azo ti territoire ti mo na ti sala tënë na ndo ni hio. Me mingi ni, ti ninga na ndo ni ayeke ga na ye ti nzoni mingi pëpe. Azo ayeke mä lakue asango so amû vundu, tongaso ti sala tënë na ndo aye so anzere pëpe alingbi ti sala si ala kanga yanga-da ti ala wala ala kanga mê ti ala. Hio na peko ti akozo tënë ti mo, sala kue ti gboto lê na ndo atâ tënë ti Bible so adë bê (Apoc. 22:17). Tongaso, atâa tongana zo ni aye pëpe ti sala lisoro a ninga, mo yeke zia ande lo na mbeni ye so ayeke kpengba zo so lo yeke gbu li na ndo ni. Ye so alingbi peut-être ti pusu lo ti mä tënë ni na mbeni ngoi nde.

Legeoko tongaso nga, tongana a hunda na mo ti sala devoir wala ti mû diskur, tokua gi asioni sango pëpe na azo ni gi ngbanga ti so a si singo. Tongana zo so ayeke sala devoir ayeke luti mingi na ndo wokongo ti akota zo ti komande, na ndo atënë ti fango zo nga na ndo salango ye ti ngangu nga na ye ti pitan so amû ndo kue, ye so alingbi ti sala si bê ti azo ni ayeke nze kue. Yôro asioni sango na yâ ti devoir ti mo gi tongana a yeke sala ande ye ti nzoni. Kete wungo ti atënë tongaso alingbi peut-être ti fa so devoir wala diskur ni alingbi na ngoi ni. A lingbi nga ti fa akota ye so asala si mbeni ye asi, na tongaso zo alingbi ti sala kusala na ni ti fa ngbanga ti nyen yorö so a fa na yâ ti Bible alingbi biani. Na ndo so a lingbi ti sala tongaso, fa nda ti ambilimbili ye, me luti mingi pëpe na ndo akpale ni.

Mingi ni, lege ayeke dä pëpe ti zi asioni sango kue na yâ ti mbeni devoir wala diskur, wala a hunda nga pëpe ti sala tongaso. Kpale ni ayeke ti fa na mbeni mbage anzoni sango nga na mbeni mbage nde asioni sango na mbeni lege so asala si ye ni kue aga na ye ti nzoni. Ti sala ni, a lingbi mo hinga ye so a yeke nzoni mo zia dä, ye so a yeke nzoni mo zi ni, nga ndo so a yeke nzoni mo gboto lê ti azo na ndo ti mbeni ye. Na yâ Fango ye ti lo na ndo ti Hoto, Jésus agboto mê ti azo so ayeke mä lo ti kpe asalango ye ti ascribe na aFarizien so abâ gi nzoni ti ala mveni, na lo fa ambeni tapande ti fa nene ti tënë ni (Mat. 6:1, 2, 5, 16). Ye oko, ahon ti luti mingi na ndo asioni tapande ti amokonzi-nzapa so, Jésus afa nene ti gbu nda ti atâ salango ye ti Nzapa na ti duti na fini alingbi na ni (Mat. 6:3, 4, 6-15, 17-34). Ye so aga na ye ti nzoni mingi.

Zia salango tënë ti mo amû na zo beku. Tongana mo yeke na mbeni devoir ti mû na yâ ti kongregation ti mo na ndo mbeni mbage ti kusala ti Chrétien, sala kue ti kpengba zo ahon ti kasa zo. Bâ si mo yeke sala ye so mo wa ambeni zo nde ti sala (aRom. 2:21, 22; aHéb. 13:7). Zia si ndoye, me pëpe ngonzo, aduti na gunda ti ye so mo yeke tene (2 aCor. 2:4). Tongana mo hinga na bê kue so aita ti mo aye ti nzere na Jéhovah, ye so mo yeke tene ayeke fa ande ni na gigi, na fade a yeke ga na ye ti nzoni na pekoni. Bâ tongana nyen bazengele Paul asala mara ti ye tongaso, tongana ti so a fa pekoni na 1 aThessalonicien 4:1-12; 2 aThessalonicien 3:4, 5 nga na Philémon 4, 8-14, 21.

Ngoi na ngoi, a lingbi a-ancien agboto mê na ndo salango ye so ayeke nzoni pëpe. Me tâ be-ti-molenge ayeke mû ande maboko na ala ti sala ye na aita ti ala na ngangu pëpe (aGal. 6:1). A lingbi lege so ala yeke tene na atënë afa so ala bâ azo ti yâ ti kongregation na nene ni (1 Pi. 5:2, 3). Bible awa amaseka-koli ti hinga ye so nzoni (1 Tim. 4:12; 5:1, 2; 1 Pi. 5:5) . Tongana a hunda ti zingo na zo, ti se zo na ti leke aye na lege ni, a yeke nzoni a sala ni alingbi na ye so Bible mveni atene (2 Tim. 3:16). A lingbi zo so ayeke sala tënë ni afa pëpe mbeni ye so Mbeti ti Nzapa atene pëpe, wala lo ba pëpe yâ ti aversê gi ti lingbi na mbeni ye so lo ye ni ngangu. Atâa tongana a hunda ti mû wango ti leke ye, a lingbi ti sala si lege so a sala na ni akpengba zo. Zo ayeke sala tongaso tongana lo luti kozoni kue na ndo tongana nyen ti kpe ti tï na yâ salango sioni, tongana nyen ti leke akpale, tongana nyen ti hon ndo ti akpale, tongana nyen ti leke mbeni salango ye so ayeke na lege ni pëpe nga tongana nyen aye so Jéhovah ahunda ayeke bata e.​—Ps. 119:1, 9-16.

Tongana mo yeke leke devoir wala diskur ti mo, bâ mbilimbili lege so mo yeke hunzi ande na ngbongboro tënë ti mo oko oko nga na devoir wala diskur ni kue. Mingi ni, azo ayeke dabe ti ala a ninga na ye so mo tene na ndangba ni. A yeke duti ande ye so amû beku?

Tongana mo yeke sala lisoro na amba ti mo Chrétien. Awakua ti Jéhovah ayeke bâ na nene ni mingi alege so azi na ala ti sala songo na ngoi ti abungbi. A yeke na angoi so la si ala yeke kiri ti wara ngangu na lege ti yingo. Bible awa e ti gi ti “wa tele ti e na ambeni zo” tongana e bungbi tele na ando ti e ti vorongo (aHéb. 10:25). E yeke sala ni gi pëpe na lege ti adevoir nga na akiringo tënë na ngoi ti abungbi ni, me nga na lege ti lisoro kozo nga na peko ti abungbi ni.

Atâa so a yeke na lege ni ti tene lisoro andu aye so abâ fini ti e ti lâ oko oko, ngangu so e yeke wara, so ahon atanga ni kue, ayeke ga na lege ti lisoro na ndo aye ti yingo. A ndu aye so asi na e na yâ kusala ti e ti nzoni-kue. Ti fa so e yeke bi bê nzoni mingi na popo ti mba ayeke kpengba e nga.

Ndali ti ngangu so sese so angoro e ayeke sala, a lingbi e sala hange. Tongana lo yeke sû mbeti na aChrétien ti Ephèse, Paul atene: “Teti . . . i zia mvene, i kue i sala tene-biani na azo so ayeke ndulu na i.” (aEph. 4:25). Ti tene tâ tënë, me pëpe mvene, ahunda nga ti mû gloire pëpe na aye nga na azo so sese so ayeke voro ala. Legeoko nga, Jésus agboto mê ti e na ndo ngangu ti “handa ti mosoro”. (Mat. 13:22). Ni la, tongana e yeke sala tënë na popo ti e, a lingbi e sala hange si e maï pëpe handa na fango so a yeke tâ pendere ye mingi ti duti na mosoro.​—1 Tim. 6:9, 10.

Tongana lo yeke mû wango na ndo nene ti kpengba zo, bazengele Paul awa e ti fâ ngbanga pëpe, wala ti kiri na peko pëpe mbeni ita so agbanzi peut-être tele ti lo na ambeni ye. A lingbi ti duti tongaso ngbanga ti so zo ni so “akpengba na mabe pëpe,” so ti tene ngbanga ti so lo gbu pëpe nda ti aye kue so mbeni Chrétien alingbi ti sala ni. Biani, ti tene lisoro ti e akpengba ambeni zo, a lingbi e bâ nga ndo so ala londo dä na tongana nyen ala maï na lege ti yingo. So ye ti vundu ti tene mbeni ita azia na ndo lege ti mba ti lo “ye so zo apika gere ti lo dä, wala mbeni ye so asala si zo atï”!​—aRom. 14:1-4, 13, 19.

Azo so ayeke tiri na akota kpale ti ala, na tapande mbeni kota kobela, ayekia mingi lisoro so akpengba zo. Mara ti zo tongaso alingbi peut-être ti sala ngangu mingi ti gue na abungbi. Azo so ahinga ye so alingbi peut-être ti hunda: “Tele ti mo ni tongana nyen?” So ala bi bê na lo, lo yeke bâ ande ni na nene ni. Ye oko, seni ti lo ayeke duti ande peut-être pëpe mbeni ye so anzere na lo mingi ti sala tënë na ndo ni. Atënë ti gonda alingbi ti sala ye mingi ti mû wâ na bê ti lo. Mo bâ polele so lo ngbâ lakue ti ndoye Jéhovah na ti gbu ngangu na gbele mbeni ngangu kpale? Tongana lo kiri na tënë, mo yeke wara ngangu na lege ni? Tongana mo sala tënë na ndo ngangu ti lo nga ye so lo yeke sala teti nzoni ti kongregation ahon ti sala tënë na ndo akatikati ti lo, ye so ayeke kpengba lo mingi.​—1 aThes. 5:11.

Ti tene lisoro ti e akpengba zo, a yeke mbilimbili kota ye ti bâ tongana nyen Jéhovah ayeke bâ ye so e yeke sala lisoro na ndo ni. Nzapa ake ngangu mingi azo so, na Israël ti giriri, asala sioni tënë ti azo so asala kusala na iri ti Jéhovah na ala dema tele na ndo manne (Nom. 12:1-16; 21:5, 6). E yeke fa polele so e manda ye na lege ti atapande so tongana e yekia a-ancien na e bâ na nene ni kobe ti yingo so bungbi ti ngbâ be-ta-zo na ti ndara ayeke mû na e.​—1 Tim. 5:17.

Mingi ni, tongana e yeke oko na aita ti e, a yeke ngangu pëpe ti wara aye ti nzoni ti sala tënë na ndo ni. Me tongana mbeni zo ayeke kasa ndo mingi, mû li ni ti gue na lisoro ni na ndo mbeni ye so akpengba zo.

Atâa e yeke fa tënë na ambeni zo, e yeke sala tënë na ndo ti estrade wala e yeke sala tënë na amba ti e Chrétien, zia e sala ye na ndara si e sigigi na yâ mosoro ti bê ti e “nzo tënë so alingbi kpengba zo na amû grâce na ala so amä tënë so.”​—aEph. 4:29.