Zingo nda ti kota li ti tënë ni

AWAMUNGO diskur ti kode ahinga nene ti duti na mbeni kota li ti tënë. Na ngoi so ala yeke leke tele ti ala, kota li ti tënë ni ayeke mû maboko na ala ti bâ gi mbeni mbilimbili mbage ti asango ni na ti gbu li dä ngangu. Ye so asala si, ahon ti sala tënë gi tongaso na ndo aye mingi, ala yeke zi nda ti tënë ti ala na mbeni lege so aga na ye ti nzoni mingi na azo so ayeke mä ala. Tongana ngbongboro tënë oko oko andu tâ gi kota li ti tënë ni na amû maboko ti zi nda ni, a yeke mû nga maboko na azo so ayeke mä tënë ni ti dabe ti ala na atënë so na ti hinga nda ni.

Mo yeke bâ ande so adevoir ti mo ayeke duti pendere ahon ti kozo tongana mo bâ kota li ti tënë ti mo tongana mbilimbili mbage ti tënë ni so mo ye ti zi nda ni. Royaume, Bible nga na londongo ti akuâ ayeke atënë so andu aye mingi. Na lege ti atënë so, a lingbi ti zi nda ti akota li ti tënë nde nde. Bâ ambeni tapande ni: “Royaume, mbeni tâ ngorogbia,” “Royaume ti Nzapa ayeke sala ande si sese aga Paradis,” “A sû Bible na gbe ti yingo ti Nzapa,” “Bible ayeke tâ ye ti fango lege na e laso,” “Londongo ti akuâ amû beku na azo so ayeke na vundu” nga “Beku ti londongo ti akuâ amû maboko na e ti ngbâ ti luti ngangu na gbele salango ngangu.” Akota li ti tënë so kue ahunda ti tene a zi nda ni na alege so ayeke nde nde mingi.

Ti gue oko na kota li ti tënë so amû yâ ti Bible kue, fango tënë ti Jésus Christ na ngoi ti kusala ti lo na sese agboto lê na ndo kota li ti tënë so: “Royaume ti yayu ayeke ndulu.” (Mat. 4:17). A zi lani nda ti kota li ti tënë so tongana nyen? Na yâ a-Évangile osio, a sala tënë ti Royaume so ahon fani 110. Me Jésus asala ye ahon gi salango kusala na tënë “royaume” fani mingi. Na lege ti ye so lo fa nga na amiracle so lo sala, Jésus afa polele so lo so ayeke lani na popo ti azo ni, lo yeke Molenge ti Nzapa, Messie so Jéhovah ayeke mû na lo Royaume ni. Jésus afa nga so na lege ti lo lege ayeke zi lani na ambeni zo ti mû mbage na yâ Royaume so. Lo fa aye so a hunda na azo so awara matabisi so ti sala ni. Na lege ti afango ye ti lo nga na akusala ti lo ti kpene, lo fa polele lege so Royaume ti Nzapa ayeke ndu fini ti azo, nga so tombango ayingo sioni so lo tomba na lege ti yingo ti Nzapa ayeke fa polele so ‘royaume ti Nzapa asi awe’ na azo so ayeke mä lo (Luc 11:20). A yeke na ndo Royaume so la si Jésus atokua adisciple ti lo ti sala tënë ni.​—Mat. 10:7; 24:14.

Salango kusala na mbeni kota li ti tënë so alingbi na ni. A yeke hunda na mo pëpe ti zi nda ti mbeni kota li ti tënë a yo tongana ti Bible. Me ti duti na mbeni kota li ti tënë so alingbi na ni ayeke nga kota ye.

Tongana a yeke na mo ti soro kota li ti tënë ni, bâ kozoni kue ye so a lingbi devoir ti mo asi dä. Na pekoni, tongana mo yeke soro angbongboro tënë so ayeke duti ande ambage ti plan ti mo, bâ nzoni si ala mû ngangu biani na kota li ti tënë so mo soro awe.

Tongana a mû na mo kota li ti tënë ni mungo, gi nzoni ye so kota li ti tënë ni afa na ndo lege so a lingbi a zi nda ni. A lingbi peut-être ti hunda na mo ti sala ngangu mingi ti hinga nene ti mbeni kota li ti tënë nga na ye so lo lingbi ti fa na gigi. Tongana mo yeke soro ande ambeni tënë so mo yeke mû ti zi na nda ti kota li ti tënë so a mû na mo, soro ni nzoni si kota li ti tënë ni angbâ lakue na gbele mo. Na tongana a fa na mo ndo so mo lingbi ti gi ye dä, gi nga ti hinga tongana nyen ti sala kusala na ni ti lingbi na kota li ti tënë ni. Bâ nga ngbanga ti nyen tënë ni so ayeke kota ye na lê ti azo so ayeke mä mo, nga ye so a lingbi mo si dä na ngoi so mo yeke sala devoir ni. Ye so ayeke mû ande maboko na mo ti hinga ye so a lingbi mo gboto lê na ndo ni na yâ salango tënë ti mo.

Lege ti fa nene ti kota li ti tënë ni. Ti fa mbilimbili nene ti kota li ti tënë ni, a lingbi mo leke gere ni na ngoi so mo yeke soro na mo yeke leke yâ ti aye so mo yeke sala na kua. Tongana mo yeke soro gi ye so ayeke mû ngangu na kota li ti tënë ni, nga tongana mo mû peko ti akpengba-ndia so a hunda na yâ lekengo mbeni nzoni plan, mo yeke fa ande gi nene ti kota li ti tënë ni.

Ti kiri na ndo ti tënë alingbi ti mû maboko na mo ti mû ngangu na kota li ti tënë ni. Zia e mû tapande ti mozoko so a pika na karangba. Na yâ ti mozoko ni kue, mbeni totongo ni ayeke kiri fani mingi; so ayeke kota mbage ni la. Zo ti pikango mozoko ni alingbi ti gbian yâ ni kete. Ye oko, mozoko ni ayeke ngoro gi na tele ti oko kota mbage so. A lingbi a duti legeoko tongaso na kota li ti tënë ti mbeni devoir. Legeoko tongana mbeni totongo ti mozoko so asigigi na yâ ti mozoko ni kue, mo lingbi peut-être ti kiri na ndo ti akota tënë ti kota li ti tënë ti devoir ti mo. Ti gbian yâ ti aye, mo lingbi ti sala kusala na atënë so akpa tele wala mo tene kota li ti tënë ni na mbeni lege nde. Tongana mo sala kusala na akode tongaso, a yeke sala ande si kota li ti tënë ti mo ayeke duti ngbongboro ye so azo so amä mo ayeke dabe ti ala na ni.

Akpengba-ndia so abâ gi pëpe adevoir na ndo ti estrade, me nga alisoro na fango tënë. Mbeni lisoro so ayeke ndulu alingbi na ni ayeke ngbâ na yâ ti li ti zo tongana kota li ti tënë ni asigigi polele. Awango so a mû na ngoi ti mandango Bible na azo ayeke kiri na yâ ti li ti azo ni tongana a gboto lê na ndo nene ti mbeni kota li ti tënë. Ngangu so mo yeke sala ti soro na ti zi nda ti akota li ti tënë so alingbi na ni ayeke sala ande kota kusala ti tene mo ga zo so ayeke sala tënë na a yeke fa Tënë ti Nzapa nzoni ahon ti kozo.