Bata bibe ti mo
1. Mama-tene ti kota bungbi ti circonscription ti ngu ti kusala 2013 ayeke nyen? A leke kapa ti kota bungbi so ndali ti nyen?
1 Jésus afa na adisciple ti lo ti ndoye Jéhovah na bê ti ala kue, na âme ti ala kue nga na bibe ti ala kue (Mat. 22:37, 38). Na ngu so, a leke kota bungbi ti district, kota bungbi ti circonscription nga na kota bungbi ti lango oko ti mû maboko na e ti kpengba zo ti e ti yâ ni. Peut-être mo dabe ti mo so mama-tene ti kota bungbi ti district ti e ayeke: “Bata bê ti mo!” Mama-tene ti kota bungbi ti lango oko ti ngu ti kusala 2013 ayeke: “Bata yingo-ti-hinga ti mo.” Kota bungbi ti circonscription so ayeke ga mama-tene ni ayeke: “Bata bibe ti mo.” A luti na ndo ti Matthieu 22:34. A leke kapa ni ti mû maboko na e oko oko kue ti bâ yâ ti bibe ti e ti sara si anzere na Jéhovah mingi ahon ti kozo.
2. Akota hundango tënë wa a lingbi e gi akiringo tënë ni na ngoi ti kapa ni?
2 Aye so a yeke sara tënë na ndo ni: Na ngoi so e gue na kota bungbi ti circonscription ni, a yeke nzoni e gi ti wara akiringo tënë na akota hundango tënë so:
• Tongana nyen la e lingbi ti kpe ti duti na ‘abibe ti zo’?
• Tongana nyen la e lingbi ti zi voile so asara si bibe ti azo so amä na bê pëpe avuko?
• Bango ndo wa e ye ti duti na ni?
• Gbungo li na ndo ti aye so ayeke nzoni ayeke ga na zo ye ti nzoni wa?
• Tongana nyen la e lingbi ti zia lege na Jéhovah ti sara ngangu na ndo ti bibe ti e?
• Akoli, awali, ababâ na amama nga na amolenge alingbi ti sara nyen si sewa aduti na ngia?
• Tongana nyen e lingbi ti fa so e leke tere ti e teti lâ ti Jéhovah?
• Ti leke bibe ti e ti sara ngangu kua aye ti tene nyen?
• Azo so asara ye alingbi na ye so ala manda ayeke wara ye ti nzoni wa?
3. Ngbanga ti nyen a yeke kota ye ti tene e gue na alango ni use kue, ti dengi mê nzoni nga ti sara ye alingbi na aye so e manda?
3 Satan ayeke gi ti buba bibe ti e (2 aCor. 11:3). Ni la, a lingbi e sara kue ti bata bibe ti e tongaso si anzere na Jéhovah. A lingbi e ngbâ lakue ti fa so e yeke na bibe ti Christ nga e tiri na bibe ti dunia so ayeke pusu zo ti ke yanga (1 aCor. 2:16). Tongaso, leke ti gue na alango use ti kota bungbi ti circonscription ni kue. Dengi mê nzoni. Tongana mo sara ye alingbi na akpengba ye so a fa ayeke mû maboko na mo ti leke bibe ti mo ti sara kua ti Royaume na bê ti mo kue.—1 Pi. 1:13.