Atapande so a gboto ni na yâ aye so azo ahinga nzoni

BIANI, a yeke kota ye ti tene atapande kue so mo sala na kusala alingbi na ye so mo yeke sala tënë na ndo ni. Ye oko, ti tene ala lë lengo, a yeke nga kota ye ti tene ala lingbi na azo so ayeke mä mo.

Tongana nyen a lingbi mara ti gbâ ti azo so ayeke mä mo asala ngangu na ndo sorongo atapande ti mo ti sala tënë na ala? Jésus Christ asala lani nyen? Atâa lo yeke sala tënë na gbâ ti azo wala na adisciple ti lo, Jésus amû atapande ti lo pëpe na yâ aye so abâ gi akodoro so ayeke nde na Israël. Azo so ayeke mä lo ayeke hinga ande pëpe mara ti atapande tongaso. Bâ mbeni tapande: Jésus asala pëpe tënë ti ye so ayeke tambela na yâ da ti gbia ti Egypte wala ti asalango ye ti vorongo ti Inde. Ye oko, atapande ti lo alondo na yâ ti akua so azo ti akodoro kue ayeke sala. Lo sala tënë ti fungo bongo, ti dengo buze, ti girisango mbeni ye ti nginza mingi nga ti guengo na amatanga ti mariage. Lo hinga tongana nyen azo ayeke sala ye na gbele aye nde nde, na lo sala kusala na ni (Marc 2:21; Luc 14:7-11; 15:8, 9; 19:15-23). Ndali ti so fango ye ti lo na gbele azo kue andu tâ gi azo ti Israël, fani mingi gbâ ti atapande ti Jésus andu aye nga na akua so ayeke na yâ salango ye ti azo ni ti lâ oko oko. Ni la, lo sala tënë ti aye tongana fango yaka, lege so angasangbaga ayeke sala ye na gbele berger ti ala nga salango kusala na poro ti nyama ti bata na vin (Marc 2:22; 4:2-9; Jean 10:1-5). Lo sala nga tënë ti atapande ti mbaï so azo ahinga nzoni mingi: lekengo kozo koli na kozo wali, Kota Moa ti ngoi ti Noé, futingo Sodome na Gomorrhe, kuâ ti wali ti Lot, na ambeni ye nde ayeke dä nga (Mat. 10:15; 19:4-6; 24:37-39; Luc 17:32). Mo nga kue, na ngoi so mo yeke soro atapande, mo yeke bâ mbilimbili akua so azo so ayeke mä mo ahinga nzoni nga asalango ye ti kodoro ti ala?

Ka tongana mo yeke sala tënë pëpe na gbâ ti azo, me gi na zo oko wala kete bungbi ti azo? Sala kue ti soro mbeni tapande so alingbi mbilimbili na kete wungo ti azo ni. Na ngoi so Jésus afa tënë na mbeni wali ti Samarie na tele ti dungu ndulu na kodoro ti Sychar, lo sala tënë ti “ngu so amû fini.” Lo tene so ‘nzara ti ngu asala zo mbeni pëpe’, nga lo sala tënë ti “lingu” so asi na fini ti lakue lakue. Aye so kue ayeke atënë na lege ti fä so andu tâ gi kua ti wali ni (Jean 4:7-15). Nga, na ngoi so lo sala tënë na akoli so ayeke sukula agbanda ti ala, tënë na lege ti fä so lo soro andu kua ti gingo susu (Luc 5:2-11). Na yâ aye so kue, lo lingbi fade ti sala tënë ti fango yaka, teti azo ni so ayeke lango na ndo so a yeke fâ yaka dä mingi. Me tongana lo sala tënë ti kua so andu ala mveni na ngoi so lo sala si ala bâ ye ni na yâ ti li ti ala, a lë lengo mingi! Mo yeke sala kue ti sala tongaso?

Ti Jésus, lo zia kusala ti lo kue gi na mbage ti “angasangbaga ti da ti Israël so agirisa awe.” A tokua bazengele Paul gi na Israël oko pëpe, me nga na amara (Mat. 15:24; Kus. 9:15). Ye so asala mbeni ye na ndo lege so Paul asala na tënë? Biani. Na ngoi so lo sû mbeti na aChrétien ti Corinthe, lo sala tënë ti kpengo loro ti gere, ti tengo kobe na yâ ti atemple ti ayanda so azo ni ayeke sala ka nga ti atambela ti hongo na ngangu, aye so azo ti amara ahinga ni nzoni mingi.​—1 aCor. 8:1-10; 9:24, 25; 2 aCor. 2:14-16.

Na yâ fango ye ti mo, mo yeke soro atapande ti mo nzoni tongana ti so Jésus na Paul asala lani? Mo yeke bi bê na ndo so azo so ayeke mä mo alondo dä nga na kua ti ala ti lâ oko oko? Biani, gigi agbian awe ngbele ye na ngoi ti Jésus na Paul. Azo mingi ayeke hinga asango ti dunia na lege ti televizion. Mingi ni, ala hinga nzoni ambeni ye so asi na ambeni kodoro wande. Tongana a yeke tongaso, a yeke biani sioni pëpe ti gboto atapande na lege ti mara ti asango tongaso. Ye oko, mingi ni ye so andu azo ngangu mingi ayeke aye so abâ fini ti ala mveni, da ti ala, sewa ti ala, kua ti ala, kobe so ala te nga dê wala ndowa ti ndo so ala yeke dä.

Tongana tapande ti mo ahunda na mo ti fa nda ti aye mingi, peut-être mo yeke sala tënë na ndo ti mbeni ye so azo so ayeke mä mo ahinga ni nzoni pëpe. Mara ti tapande tongaso alingbi hio ti kanga ndo ti ye so mo ye ti fa. A yeke sala si azo so amä mo alingbi ti dabe ti ala na tapande ti mo ni, me pëpe na tâ tënë ti Bible so mo yeke sala kue ti fa ni.

Ahon ti haka popo ti aye so akpengba mingi, Jésus asala kusala gi na atënë ti lâ oko oko so akpengba pëpe. Lo sala kusala na akete ye ti fa nda ti akota ye, nga na aye so akpengba pëpe ti sala si ye so akpengba asigigi polele. Na ziango kamba na popo ti aye ti lâ oko oko na atâ tënë ti Bible, Jésus amû maboko lani na azo ti gbu hio nda ti atâ tënë so lo yeke fa nga ti dabe ti ala na ni. So mbeni pendere tapande ti mû pekoni!