Mo ye lakue ti duti na kozo ndo?

MO HINGA mbeni zo so aye lakue ti duti na kozo ndo?— Peut-être lo yeke pusu mbeni zo si lo duti na li ti mbeni molongo. Mo bâ mara ti ye tongaso awe?— Kota Wafango ye abâ même lani so akota zo agi ti duti na kozo ndo. Ye so anzere na lo pëpe. Zia e bâ ye so asi.

Bible atene so a hiri Jésus na mbeni kota matanga na da ti mbeni Farizien, so ayeke lani mbeni kota mokonzi ti lege ti vorongo. Tongana Jésus asi kâ, lo komanse ti bâ azo na gango ni nga na sorongo anzoni place. Tongaso, lo tene mbeni tënë na ala. Mo ye ti mä ni?—

Jésus atene: ‘Tongana mbeni zo ahiri mo na mbeni matanga ti mariage, gi ti duti pëpe na ndo so ayeke nzoni ahon atanga ni kue.’ Mo hinga ngbanga ti nyen Jésus atene tongaso?— Lo fa so peut-être a hiri mbeni kota zo na matanga ni nga. Na tongana ti so mo bâ na yâ foto so, zo so asala matanga ni aga atene: ‘Zia place ti mo na koli so, mo gue mo duti kâ.’ Lê ti zo ni ayeke duti ande tongana nyen?— Kamene ayeke sala lo ngbanga ti so tanga ti azo ni kue ayeke bâ ande lo na guengo ni ti duti na kete ndo.

Jésus ayeke fa lani so a yeke na lege ni pëpe ti gi ti wara place so ayeke nzoni ahon atanga ni kue. Ni la, lo tene: ‘Tongana a hiri mo na mbeni matanga ti mariage, gue mo duti na mbeni kete ndo. Si, zo so ahiri mo alingbi ti ga na ti tene, “Ita ti mbi, gue mo duti na li ni kâ.” Tongaso, na guengo ti mo ti duti na nzoni place ni, mo yeke ne na lê ti azo kue so aga.’​—Luc 14:1, 7-11.

Mo mä yâ ti tënë ti Jésus ni awe?— Zia e mû mbeni tapande ti bâ wala mo mä yâ ni. Mo na ambeni zo ayeke gbugburu tele ti mû bus. Mo wara ti mo place awe, me mbeni mbakoro awara place ti duti pëpe. Fade mo yeke bâ lo gi na lê tongaso?— A yeke nzere ande na Jésus?—

Mbeni zo alingbi ti tene so ye kue so e yeke sala asala ye oko na Jésus pëpe. Mo yeda na tënë so?— Tongana Jésus ague lani na kota matanga na da ti Farizien ni, lo yeke bâ lani azo na gingo ndo ti duti. Ti mo, lo yeke bâ pëpe ye so e yeke sala laso?— So fadeso Jésus ayeke na yayu kâ, lo yeke bâ tâ nzoni mingi ye so e yeke sala.

Tongana mbeni zo aye ti duti na kozo ndo, a lingbi ti ga na tënë. Mingi ni papa ayeke londo, na ngonzo ayeke sala azo. Na tapande, mo gue peut-être ti tö ngu na mbeni ndo. Mo gue mo fâ devant ti azo si mo tö ngu ti mo kozo. Nyen la alingbi ti si?— Tanga ti azo ni alingbi ti sala ngonzo na tele ti mo.

Nzara ti dutingo na kozo ndo alingbi ti ga na atënë mingi. A ga ândö même na tënë na popo ti abazengele ti Jésus. Tongana ti so e manda na chapitre 6 ti buku so awe, ala papa ti hinga zo wa si ayeke kota na popo ti ala kue. Me Jésus asala lani nyen?— Lo mû wango na ala. Me ala kiri apapa na ndo ti tënë so. Zia e bâ tongana nyen papa ni alondo.

Abazengele na ambeni zo nde, nga na Jésus ayeke gue ti tanga ni na Jérusalem. Me kozoni na so, Jésus asala lani tënë na ala na ndo Royaume ti lo. Tongaso, Jacques na Jean ayeke bâ tele ti ala tongana agbia so akomande na tele ti Jésus. Ala sala même tënë ni na mama ti ala, Salomé (Matthieu 27:56; Marc 15:40). Ni la, tongana ala yeke gue na Jérusalem, Salomé aga akuku na gere ti Jésus na lo hunda mbeni ye na lo.

Jésus ahunda: “Mo ye nyen?” Lo tene so lo ye si Jésus azia amolenge ti lo aduti tâ gi na tele ti lo na yâ Royaume ti lo, mbeni na mbage ti lo ti koli nga mbeni na mbage ti lo ti wali. Me tongana tanga ti abazengele bale-oko ni amä tënë so Jacques na Jean atene na mama ti ala ti hunda na Jésus, ala sala nyen?—

Ngonzo agbu ala ngangu na tele ti Jacques na Jean. Tongaso, Jésus amû mbeni pendere wango na abazengele ti lo kue. Lo tene na ala so akota zo ti sese so aye ti komande amba ti ala mingi nga si azo abâ ala. Ala ye ti duti na kota ndo si azo kue amä yanga ti ala. Me Jésus atene na adisciple ti lo so a lingbi ala duti tongaso pëpe. Nde na so, lo tene: ‘Zo kue so aye ti duti na kozo ndo na popo ti i, a lingbi lo ga ngbâa ti i.’ Gbu li ti mo na ndo tënë so!​—Matthieu 20:20-28.

Mo hinga kua so ngbâa ayeke sala?— Lo yeke sala kua na azo, lo yeke ku pëpe ti tene azo si asala kua na lo. Lo yeke duti ti lo na kete ndo, me na kozo ndo pëpe. Lo yeke sala ye tongana kota zo pëpe, me tongana zo so ayeke kete. Na girisa pëpe, Jésus atene so zo so aye ti duti na kozo ndo, a yeke ngbanga ti lo ti sala kua na azo tongana ngbâa.

Tënë so aye ti tene na e nyen?— Ngbâa ayeke gbugburu tele na mveni ti lo ti hinga zo wa si ayeke duti na ndo so ayeke nzoni ahon tanga ni kue? Wala lo yeke papa ti hinga zo wa si ayeke te kobe kozo? Mo tene ti mo nyen?— Jésus atene so ngbâa ayeke zia mveni ti lo kozoni na lo.​—Luc 17:7-10.

Tongaso, a hon ti gi ti duti na kozo ndo, a yeke nzoni e sala nyen?— A yeke nzoni e sala kua na azo tongana ngbâa. Wala ti zia azo na kozo ndo na e mveni. So ti tene ti bâ so azo ayeke kota mingi ahon e. Mo hinga ambeni lege so e lingbi ti zia azo na kozo ndo?— Kiri na alembeti 40 na 41 na bâ ambeni lege so e lingbi ti zia azo na kozo ndo na salango kua na ala.

Mo yeke dabe ti mo ande so Kota Wafango ye azia azo na kozo ndo na lo mveni na salango kua na ala. Na ndangba lakui so lo sala na abazengele ti lo, lo kuku même ti sukula gere ti ala. Tongana e nga kue e zia azo na kozo ndo na salango kua na ala, e yeke nzere ande na bê ti Kota Wafango ye nga na Babâ ti lo, Jéhovah Nzapa.