Chapitre 83

Mbeni Farizien ahiri Jésus na da ti lo

JÉSUS angba na da ti mbeni mokonzi ti aFarizien, na lo sava fade kobela ti mbeni zo so tele ti lo asuku. Tongana lo baa so ambeni gene agi ti kamata kota ndo, lo fa na ala lege ti duti na taa-be-ti-molenge.

Jésus atene: “Tongana zo ahiri mo na matanga ti mariage, a lingbi mo duti na ngende ti li ni pepee. Wala peut-être lo hiri mbeni zo so ala yaa iri ti lo ahon mo, na fade zo so ahiri i use kue aga, lo tene na mo: ‘Mu ngende so na zo so.’ Tongaso fade mo gue ti kamata ngende ti ndani na kamela.”

Jésus amu wango so: “Tongana ahiri mo, mo gue mo duti na ngende ti ndani, si tongana zo so ahiri mo aga, lo lingbi tene na mo: ‘Ndeko, mo gue na li ni.’ Tongaso, fade a yaa iri ti mo na gbele gene kue so aduti ti te kobe.” Jésus ahunzi tene ti lo tongaso: “Teti zo so ayaa iri ti lo mveni, fade a sala si lo ga kete, na zo so asala lo mveni kete, fade a yaa iri ti lo.”

Na pekoni, Jésus asala tene na Farizien so ahiri lo ti te kobe na da ti lo, na lo fa na lo lege so lo lingbi ti mu kobe so ayeke na ngere mingi ahon na le ti Nzapa. “Tongana mo sala kobe ti kota la wala kobe ti la kui, mo hiri andeko ti mo pepee, wala aita ti mo, wala asongo ti mo, wala azo ti mosoro so ayeke ndulu na mo pepee. Wala peut-être ala kiri ala hiri mo, na mo wara ye ti mo mbeni. Me tongana mo bi matanga, mo hiri awanzinga, na azo so azin na ti ti ala wala na gere ti ala, na awaziba; na fade ngia ayeke na mo, teti ala yeke na ye ti kiri na mo pepee.”

Zo so amu mara ti kobe tongaso na azo ti mawa ayeke duti na ngia, lege-oko tongana Jésus atene na zo so ahiri lo: “Teti fade mo wara futa ti mo na la ti londongo ti awakinda ti mbilimbili.” Tongana Jésus asala tene ti kobe so alingbi na gunda, mbeni oko ti agene adabe lo na mbeni mara ti kobe nde, lo tene: “Fade ngia ayeke na zo so ate mapa na royaume ti Nzapa!” Me lege-oko tongana so Jésus ayeke fa, a yeke azo kue pepee si abaa pendere beku so na ngere so alingbi na ni.

“Giriri mbeni zo abi kota matanga na la kui, na lo hiri azo mingi. Lo to ngbaa ti lo ti tene na ala so lo hiri ala: ‘Ga, teti fadeso ala leke ye kue awe.’ Me, ala kue lege-oko atonda ti hunda lo na pardon. Zo ti kozoni atene na wakua so: ‘Mbi vo yaka awe, na a yeke ngbanga ti mbi ti gue ti baa yaka so; mbi hunda mo, mo tene na lo mbi hunda lo na pardon.’ Mbeni zo atene: ‘Mbi vo abagara bale oko awe, na mbi gue ti tara ala. Mbi hunda mo, mo tene na lo mbi hunda lo na pardon.’ Na mbeni zo atene: ‘Mbi kamata wali awe, tongaso mbi lingbi ga pepee.’”

Tene so ala fa ti hunda lo na pardon ayeke nzoni oko pepee! Tongana mbeni zo aye ti vo yaka wala nyama lo yeke baa ni nzoni kozoni si. Tongaso ahunda wavongo ye pepee ti gue fade fade ti baa ye so lo vo awe. Lege-oko tongaso, tene ti mariage alingbi pepee ti mu lege na zo ti ke hiringo ndo so ayeke na kota ngere. Tongana maître ti da ama tene ti pardon so, ngonzo agbu be ti lo na lo tene na ngbaa ti lo:

“‘Gue fade na kota lege na kete lege ti kodoro, mo ga na awanzinga, na azo so azin na ti ti ala wala na gere ti ala, na awaziba.’ Na pekoni, ngbaa ni atene: ‘Maître, mbi sala ye so mo komande mbi ti sala, na mbeni ndo angba senge.’ Maître atene na lo: ‘Gue na kota lege na mo gue na tele ti gbagba ti yaka, mo forcé azo ti ga na ya ni, si da ti mbi alingbi si. (...) Fade zo oko ti ala so mbi hiri teti kobe alingbi tara kobe ti la kui ti mbi pepee.’”

Toli so aye ti tene nyen? “Maître” so amu kobe aduti fa ti Jéhovah Nzapa; “ngbaa” so ague ahiri azo, ayeke Jésus Christ; na “kota matanga ti la kui” ayeke fa ti alege ti ga membre ti Royaume ti ayayu.

A yeke kozoni kue amokonzi ti lege ti vorongo nzapa ti aJuif, na ngoi ti Jésus, si ahiri ala ti ga amembre ti Royaume. Me ala ke hiringo ndo so. Tongaso, use hiringo ndo ayeke teti azo so ake ala, azo so ayeke na kete ndo na popo ti mara ti aJuif, na mingi ahon atondani na la ti Pentecôte ti ngu 33. Wungo ti azo so ayeda na hiringo ndo so alingbi pepee na angende 144 000 so aleke teti ala na ya Royaume ti Nzapa na nduzu. A yeke teti tene so si ngu ota na nze omene na pekoni, na ngu 36, ato ota hiringo ndo, hiringo ndo ti ndani, na azo so ayeke Juif pepee, azo so afa ala na nganza pepee, na angba ti bungbi ala juska na ngoi ti e. Luc 14:1-24.

▪ Tongana nyen Jésus afa na azo lege ti duti na taa-be-ti-molenge?

▪ Na lege wa mbeni zo alingbi ti mu kobe so ayeke na kota ngere biani na le ti Nzapa? Na ngbanga ti nyen lo lingbi ti wara ngia da?

▪ Ngbanga ti nyen azo so ahiri ala ti ga ti te kobe ahunda tene ti pardon so ayeke na ngere oko pepee?

▪ Toli ti Jésus na ndo “kota matanga ti la kui” aduti fa ti nyen?