Rébecca aye lani ti zia ngia na bê ti Jéhovah

Rébecca ayeke lani mbeni wali so aye tënë ti Jéhovah. Iri ti koli ti lo ayeke Isaac. Lo nga kue lo ye Jéhovah. Rébecca ahinga Isaac tongana nyen? Nyen la lo sara so afa so lo ye lani ti zia ngia na bê ti Jéhovah? Zia e manda ye na ndo ti lo.

Abraham na Sara ayeke babâ na mama ti Isaac. Ala lango lani na kodoro ti Canaan. Azo ti Canaan ni avoro lani Jéhovah ape, me Abraham aye ti tene molenge ti lo amû gi wali so avoro Jéhovah. Ni la lo tokua zo ti kua ti lo, so peut-être ayeke Éliézer, ti gue na kodoro ti Haran ti gi mbeni wali na Isaac. Ambeni fami ti Abraham ayeke na kodoro ti Haran ni.

Éliézer na ambeni mba ti lo azo ti kua ti Abraham la ague lani. Lege ni ayo. Ala mû achameau bale-oko, ala zia akobe nga na acadeau na ndo ti ala si ala gue. Éliézer ayeke hinga ande wali ni tongana nyen? Na tango so Éliézer na amba ti lo ni asi na kodoro ti Haran, ala luti na tere ti mbeni dû ti ngu ndali ti so Éliézer ahinga atene azo ti kodoro ni ayeke ga fafadeso ti tö ngu. Lo sambela Jéhovah, lo tene, ‘Tongana mbi hunda ngu na mbeni maseka-wali si lo mû ni na mbi nga na achameau ti mbi, mbi yeke hinga mbi tene wali so mo soro lo ndali ti Isaac la.’

Mo ye ti bâ! Mbeni maseka-wali so iri ti lo ayeke Rébecca aga ti tö ngu. Bible atene so lo yeke pendere mingi. Tongaso, Éliézer ahunda na lo ngu ti nyongo ni si Rébecca atene: ‘Mbi yeke mû ni na mo, mbi yeke mû nga ni na achameau ti mo.’ Achameau ayeke nyon ka ngu sioni. Tongaso Rébecca ague atö ngu aga atuku, lo kiri lo gue lo tö ngu lo ga lo tuku, na lo sara tongaso lege mingi. Mo bâ lo na lê ti foto ge, lo sara nyen?— Li ti Éliézer akpe kue na fason so Jéhovah amä na sambela ti lo ni.

Éliézer amû gbâ ti apendere cadeau na Rébecca. Na pekoni, Rébecca ague na Éliézer na amba ti lo ni na yanga-da ti babâ ti lo. Tongana ala si kâ, Éliézer afa na babâ ni nga na sewa ti babâ ni ndani so Abraham atokua lo ge, nga lo fa tongana nyen la Jéhovah amä sambela ti lo. Afami ti Rébecca ayeda ti tene Rébecca aga wali ti Isaac, na tere ti ala anzere.

Rébecca nga kue aye lani ti ga wali ti Isaac?— Rébecca ahinga lani so Jéhovah la atokua Éliézer. Ni la, tongana afami ni ahunda Rébecca wala lo ye ti gue na kodoro ti Canaan ti ga wali ti Isaac, Rébecca ayeda ti gue. Gi na lê ni lê ni, lo na Éliézer ahon. Tongana ala si na Canaan, Rébecca aga wali ti Isaac.

So Rébecca asara lani ye so Jéhovah aye, Jéhovah abénir lo. Angu mingi na pekoni, mbeni oko ti amolenge ti Rébecca adü Jésus. Tongana mo sara ye tongana ti Rébecca, mo zia ngia na bê ti Jéhovah, lo yeke bénir mo nga.