Ala sara tënë ti Jésus na yâ ti ambeti

Mo bâ akoli so na lê ti foto so?— A yeke Matthieu, Marc, Luc, Jean, Pierre, Jacques, Jude nga na Paul. Lani so Jésus ayeke na ndo ti sese ge, ala kue ayeke lani dä. Ala sara nga tënë ti Jésus na yâ ti ambeti. Zia e bâ ambeni ye na ndo ti ala.

Na popo ti akoli so asara mbeti na ndo ti Jésus so, ota ayeke lani abazengele ti lo so afa tënë na tere ti lo. Iri ti ala ayeke zo wa?— Matthieu, Jean nga na Pierre. Bazengele Matthieu nga na bazengele Jean ahinga Jésus nzoni mingi. Ala use kue asara mbeti na ndo ti Jésus. Bazengele Jean asara nga mbeti so iri ni ayeke Apocalypse. Lo sara nga ambeni mbeti ota nde: a yeke Kozo mbeti ti Jean, Use mbeti ti Jean na Ota mbeti ti Jean. Ti bazengele Pierre, lo sara ti lo mbeti use. A yeke Kozo mbeti ti Pierre nga na Use mbeti ti Pierre. Na yâ ti use mbeti ti lo ni, Pierre afa peko ti mbeni ye so asi lani. Na yayu kâ, Jéhovah atene lani tënë so na ndo ti Jésus, atene: ‘So ayeke molenge ti mbi. Mbi ye lo mingi.’

Ti tanga ti akoli ni so ayeke na lê ti foto ni, ala nga kue asara tënë ti Jésus na yâ ti ambeti. Mbeni oko ti ala ayeke Marc. Lani so azo aga ti gbu Jésus, lo yeke lani dä, nga lo bâ aye kue so apasêe lani so. Mbeni koli ni ayeke Luc. Lo yeke ti lo docteur, na lo ga Chrétien peut-être na peko ti kuâ ti Jésus.

Ambeni koli ni use na lê ti foto ni ayeke aita ti Jésus, angambe ti lo. Iri ti ala ayeke zo wa?— A yeke Jacques na Jude. Lani, ala tene Jésus ayeke Molenge ti Nzapa ape. Ala pensé même atene fou asara li ti Jésus. Me, angu mingi na pekoni, ala yeda so Jésus ayeke biani Molenge ti Nzapa na ala ga aChrétien.

Ndangba koli so asara tënë ti Jésus na yâ ti Bible ayeke Paul. Lo nga kue lo yeke na lê ti foto ni. Ândö, iri ti lo ayeke Saul, me tongana lo ga Chrétien la si iri ti lo aga Paul. Lo ke aChrétien lani na bê ti lo oko, na lo sara sioni na ala mingi. Ka nyen la asara si Paul aga Chrétien so?— Mbeni lâ, tongana Paul ayeke gue na mbeni voyage, lo ye ti bâ! mbeni zo na yayu kâ asara tënë na lo. Jésus la asara tënë na lo so. Lo tene na Paul: ‘Mo sara sioni na azo ti mbi ngbanga ti nyen?’ Na pekoni, Paul achangé na lo ga Chrétien. Wungo ti ambeti so lo sara na yâ ti Bible ayeke 14, a komanse na aRomain juska a si na aHébreu.

E yeke diko Bible lâ na lâ, ni-aa?— Tongana e diko Bible, e yeke manda ye mingi na ndo ti Jésus. Mo ye ti hinga ye encore na ndo ti Jésus?—