Kapa ti fango ye ti Royaume ti Nzapa: Fango ye na awakua ti Gbia ni

BÂ SO mo yeke he pendere ngia na zo so ayeke mû mbeni diskur. A yeke mbeni ita-koli, so ayeke maseka ti congrégation ti mo. Lo yeke mû kozo diskur ti lo na mbeni kota bungbi. Na ngoi so mo yeke mä lo, bê ti mo apika ti bâ tongana nyen la a yeke fa ye na awakua ti Nzapa. Mo dabe ti mo na kozo devoir ti maseka ni na mo bâ tongana nyen la lo gue na li ni mingi na peko ti so lo gue na Ekole ti aPionnier. Ade ti ninga ape, lo na wali ti lo asara Ekole ti awafango nzoni tënë ti Royaume. Na ngoi so mo yeke pika maboko na ndo ti pendere diskur ti ita ni, mo bâ ndo na tere ti mo na mo gbu li na ndo ti aye kue so a fa na awakua ti Nzapa.

Bible atene kozo awe so mbeni ngoi ayeke si so fade Jéhovah “afa nda ti tënë” na awakua ti lo (És. 54:13). E yeke na ngoi ni so. A yeke fa ye na e na lege ti ambeti ti e, na lege ti abungbi, akota bungbi nga na lege ti a-ekole nde nde so a zia na sese ti leke e ndali ti ambeni mbilimbili kusala na yâ ti bungbi ti Jéhovah. Na yâ ti mbage so, e yeke bâ tongana nyen afango ye so kue afa polele so Royaume ti Nzapa ayeke sara kua laso.