Kapa ti kota bungbi ti lango oko ti 2010
1. (a) Amama-tene ti akota bungbi ti lango oko so ahon ade ti ninga pëpe ayeke so wa? (b) Angbongboro tënë wa ti akota bungbi ti lango oko ti angu so ahon awe amû maboko na mo na yâ ti fango tënë?
1 “E Gi Nda ti Akpengba Ye ti Nzapa,” “E wu na nzo kusala,” “I sala hange na lege so i yeke mä na tënë” nga “E yeke sese: Jéhovah ayeke Zo ti lekengo ta.” (1 aCor. 2:10; 1 Tim. 6:18; Luc 8:18; És. 64:7). So ayeke gi ambeni ti amama-tene ti akota bungbi ti lango oko ti angu so ahon. Mo yeke ku kungo ti gue na kota bungbi ti lango oko ti ngu 2010 so ayeke ga? Mama-tene ni ayeke duti ande: “Ngoi so angbâ ayeke mingi pëpe.” A mû ni na yâ ti 1 aCorinthien 7:29.
2. E lingbi ti sara nyen ti dü nzara ti kota bungbi so na yâ ti bê ti e?
2 Gi na peko ti so a fa lango ti kota bungbi ti lango oko so congrégation ti ala ayeke gue dä, to nda ti sara tënë na ndo ti kapa ni na nzerengo tere. Ambeni babâ na mama ayeke mû maboko na amolenge ti ala ti ku kota bungbi ni na nzara ni. Ala yeke sara ni na ziango lango ni na lê ti calendrier ti sewa ni nga ala yeke sû na lê ti mbeti anzene nzene ye so ala yeke na bezoin ni ande, nga lâ oko oko ala yeke diko alango so angbâ. Na ndembe so ala yeke manda tënë ti Nzapa na sewa na lakui, ala lingbi peut-être ti kiri ti bâ anote so ala mû na akota bungbi ti lango oko so ahon awe. Mo lingbi nga ti leke bê ti mo ndali ti kota bungbi so na bango tënë so ayeke na yâ ti buku Wara nzoni na lege ti Ekole ti Kusala ti aChrétien, lembeti 13-16. A yeke mû maboko na mo nga na sewa ti mo ti “sara hange na lege so ala yeke mä na tënë.”—Luc 8:18.
3. E lingbi ti sara nyen ti tene kota bungbi ni asara ye ti nzoni mingi na ndo ti e?
3 Sara ye alingbi na ye so mo manda: Mingi ni tënë so e yeke mä ka na peko ti mbeni kota bungbi ayeke so: “So pendere assemblée ape!” A yeke tâ tënë, teti so a yeke mbeni oko ti gbâ ti aye so Jéhovah ayeke mû na e (aProv. 10:22). Ti tene atënë ni asara ye na ndo ti mo, a lingbi mo gbu li na ndo ni na mo bata ni (Luc 8:15). Na kiringo ti ala na kodoro, atâa na gere wala na kutukutu, sara lisoro na ndo ni na sewa ti mo wala na azo so mo na ala ayeke kiri oko. Ala sara lisoro na ndo ti ambeni tënë ni wala na ndo ti ambeni ye so ala ye ti sara na yâ ti fango tënë. Ye so ayeke sara si aye so mo mä ayeke ngbâ ti sara nzoni na mo angu mingi na pekoni.—Jacq. 1:25.
4. Ngbanga ti nyen kota bungbi ti lango oko so ayeke mû ande maboko na e?
4 Tere ti e anzere ka mingi tongana e wara mbeni cadeau na tâ ngoi so e yeke na bezoin ni. Legeoko nga, e yeke ku kungo ti wara ye so Jéhovah aleke ndali ti e na ngoi ti kota bungbi ti lango oko so ayeke ga. Kite ayeke pëpe so kota bungbi ni ayeke mû ande maboko na e na yâ ti aye kue. E lingbi ti ku ti wara na maboko ti Jéhovah, Babâ ti e ti yayu, tâ gi ye so e yeke na bezoin ni. A yeke duti na lege ti awango so afa tongana nyen ti sara kusala so lo mû na e ti sara.—2 Tim. 4:2; Jacq. 1:17.