Gigi ti Jésus na Nazareth

Jésus akono na Nazareth, mbeni kete gbata so azo ahinga ni mingi ape. Nazareth ayeke na mbage ti nord ti Judée, na yâ ti mbeni ndo so ahoto ayeke dä mingi so a iri ni Galilée, nga a yeke na mbage ti ouest ti mbeni ngu so a hinga ni na iri ti Kota ngu ti Galilée.

Jésus ayeke peut-être lani na ngu use la si Joseph na Marie amû lo na Égypte aga na lo na Nazareth. Peut-être na ngoi ni so ade a dü mbeni molenge na peko ti lo ape. Me na pekoni, Joseph na Marie adü Jacques, Joseph, Simon nga na Judas. Ala dü nga amolenge-wali. Tongaso, Jésus ayeke lani na aita ti koli nga na ti wali omene tongaso, so lo na ala kue ayeke mama oko.

Jésus ayeke nga na ambeni fami. Mbeni fami ti lo so e sara tënë ti lo awe ayeke Élisabeth na molenge ti lo Jean, so ala lango ti ala ayo na mbage ti sud, na Judée. Na Galilée, so ayeke nduru na ndo so Jésus ayeke dä, a yeke wara nga Salomé so ayeke peut-être ita ti Marie, mama ti Jésus. Iri ti koli ti Salomé ayeke Zébédée. Tongaso, amolenge ti ala, Jacques na Jean, alingbi ti duti atâ fami ti Jésus. E hinga ape wala Jésus na amolenge ti Zébédée so akono place oko. Me Jésus na ala ayeke akota kamarade, na ala use kue aga abazengele ti lo na pekoni.

A lingbi Joseph asara kua ngangu ti bâ lege ti gbâ ti azo so ayeke na yâ ti sewa ti lo. Lo yeke lani mbeni charpentier. Joseph abata Jésus tongana molenge ti yâ ti lo wani, na a yeke ndali ni la si a yeke iri lani Jésus “molenge ti charpentier”. (Matthieu 13:55). Joseph afa lani kua ni na Jésus ti tene lo nga kue lo ga charpentier, na kite ayeke dä ape so Jésus ayeke manda lani ye nzoni. Raison ni la azo ayeke tene lani atene: ‘So charpentier la.’—Marc 6:3.

Joseph na sewa ti lo aye lani tënë ti vorongo Jéhovah mingi. Ti sara ye ague oko na Ndia ti Nzapa, Joseph na Marie ayeke fa ye na amolenge ti ala na lege ti yingo ‘na ngoi so ala yeke duti na da ti ala, na ngoi so ala yeke tambela na lege, na ngoi so ala gue ti lango nga na ngoi so ala londo.’ (Deutéronome 6:6-9). Mbeni synagogue ayeke nga dä na Nazareth. E hinga biani so Joseph na sewa ti lo ayeke gue lakue kâ ti voro Nzapa. A yeke ndali ni la si, na pekoni, a tene so Jésus ague lani na synagogue, “tongana ti so lo yeke sara ka na lâ ti Sabbat”. (Luc 4:16). A nzere ka mingi na azo ti sewa ni ti sara voyage legeoko, tongana ala yeke gue ka na temple na Jérusalem.