Hundango ndo

◼ Kozoni ti tene a yeda na mbeni wafango tënë ti wara batême, tongana nyen la lo lingbi ti fa so lo maï na lege ti guengo na bungbi nga na fango tënë?

Ti wara batême ayeke mbeni kota desizion so zo alingbi ti mû na yâ ti fini ti lo. Me, kozoni ti tene a yeda na mbeni zo ti wara batême, a lingbi zo ni awara mbeni nzoni hingango ye na ndo ti ye so Nzapa ahunda na lo ti sara. Na ndo ni, a lingbi lo fa kozoni na lege ti sarango ye ti lo so lo yeda na bê ti lo kue ti sara aye so Nzapa ahunda na lo.

A hunda na aChrétien ti kpe bungbi pëpe. Ni la, a yeke nzoni mbeni wafango tënë so ade ti wara batême pëpe, afa so lo bâ guengo na abungbi na nene ni (aHéb. 10:24, 25). A lingbi lo mû mbage na kiringo tënë na ngoi ti abungbi. A yeke nga na lege ni ti tene lo zia iri ti lo na Ekole ti Kusala ti aChrétien, me a yeke nzoni a forcé lo pëpe ti sara ni.

Na ndo ni, teti so a mû na aChrétien kusala ti fango nzoni tënë na ti sarango adisciple, a lingbi mbeni wafango tënë so ade ti wara batême pëpe amû mbage lakue na kusala ti fango tënë kozoni ti wara batême (Mat. 24:14; 28:19, 20). A lingbi lo fa tënë nze oke kozoni si lo wara batême? A yeke nzoni a zia lege na lo ti fa tënë ngoi mingi si lo lingbi ti fa so lo yeke na nzara ti mû mbage na fango tënë nze na nze (Ps. 78:37). Ye oko, tongana lo to nda ti fa tënë peut-être asara ambeni nze mingi awe na lo lingbi biani ti wara batême, a yeke nzoni a zia si ngoi ahon mingi pëpe. Ka a lingbi lo mû rapport fani oke? Mbeni ndia ndali ni ayeke dä pëpe. A yeke a-ancien la ayeke gi ti bâ awafango tënë oko oko alingbi na dutingo ti ala na ti mû desizion na lege ni.​—Luc 21:1-4.

A lingbi a-ancien (wala awakua ti mungo maboko so ayeke na yâ ti acongrégation so a-ancien ayeke dä mingi pëpe) so ayeke sara lisoro na azo so aye ti wara batême ahinga so zo oko oko ayeke nde nde, na a lingbi ala duti na nzoni bango ndo ti bâ wala zo ni alingbi ti wara batême. Ala yeke ku na mbage ti zo ni ti fa nzara so lo yeke na ni ti ga Témoin ti Jéhovah, na ti fa so lo bâ na nene ni kota pasa so lo yeke na ni ti ga na yâ ti bungbi ti Jéhovah na ti mû mbage na kusala ti fango tënë. A-ancien ahinga so ade lo kpengba na lege ti yingo pëpe tongana awafango tënë so awara batême aninga awe. Tongana a-ancien abâ so zo ni alingbi pëpe ti wara batême, a lingbi ala fa na lo na nzoni bê araison ni na yâ ti Bible nga ti mû maboko na lo na lege ti yingo.