Ndangba lisoro na azo so aye ti wara batême

Mingi ni, a yeke ka na ngoi ti akota bungbi ti aTémoin ti Jéhovah la si azo ayeke wara batême. Na hunzingo ti diskur ti batême ni, wamungo diskur ni ayeke hunda na azo so aye ti wara batême ti londo na ti kiri tënë na kota go na ahundango tënë use so:

1. Eskê mo ke siokpari ti mo awe, mo mû terê ti mo na Jéhovah awe, nga mo yeda na salut so Lo yeke mû na lege ti Jésus Christ?

2. Eskê mo hinga so tongana mo wara batême, mo fa so mo ga Témoin ti Jéhovah awe nga so mo sara beoko na bungbi ti Jéhovah?

Kiringo tënë En na ahundango tënë so afa so ala so aye ti wara batême ‘afa dandara’ so ala mä na bê na ye so a futa ti zi azo, nga so ala mû terê ti ala kue na Jéhovah (aRom. 10:9, 10). A yeke nzoni ala so aye ti wara batême agbu li ti ala kozo na ndö ti ahundango tënë so nga ala sambela ndali ni, tongaso si ala lingbi ti kiri tënë alingbi na aye so ala mä na bê biani na ni.

Eskê na yâ ti sambela mo mû terê ti mo na Jéhovah awe, mo mû yanga na lo so mo yeke voro gï lo oko nga so ye so ayeke kota mingi na yâ ti gigi ti mo ayeke ti sara ye so bê ti lo aye?

Eskê laso mo hinga na bê ti mo kue so mo lingbi awe ti wara batême?

Mara ti bongo wa la a yeke nzoni ti yü na ngoi ti batême? (1 Tim. 2:9, 10; Jean 15:19; aPhil. 1:10)

A lingbi e yü bongo na “sarango ye ahon ndö ni pëpe nga na hange” ti fa so e “yeke voro Nzapa”. Tongaso, azo so ayeke gue ti wara batême ayeke yü pëpe mbeni bongo ti lingo na ngu so ayeke nzoni ape wala abongo so a sû ambeti na terê ni wala so a sû ambeni tënë so asara sabango ti ambeni ye dä. A lingbi ala yü bongo so ayeke nzoni, so ayeke propre, so ason bê ti azo ape nga so alingbi na ngoi ni.

A lingbi zo asara ye tongana nyen na ngoi so lo yeke wara batême? (Luc 3:21, 22)

Batême ti Jésus ayeke tapande ndali ti aChrétien so ayeke wara batême laso. Lo hinga lani so batême ayeke mbeni ye so a lingbi a bâ ni na nene ni, na a yeke ye so asigi na yâ ti bango ndo ti lo nga na sarango ye ti lo. Tongaso, ndo ti warango batême ayeke pëpe place ti tene a tene atënë ti ngia so ayeke na lege ni ape, ti sarango ngia, ti tingo ngu wala ti sarango mbeni ye so ayeke buba nengo ti ngoi ti batême ni. Nga, a yeke duti na lege ni pëpe ti tene mbeni fini zo so awara batême asara ye kirikiri na nzerengo terê mo bâ mo tene lo sö mbeni kota benda. Tâ tënë, batême ayeke mbeni ngoi ti ngia; me a lingbi zo so awara batême ni afa ngia ti lo ni na nengo terê.

Tongana nyen la guengo lakue na bungbi nga dutingo nduru na aita ti congrégation ayeke mû ande maboko na mo ti sara ye alingbi na mungo terê ti mo na Jéhovah?

Na peko ti batême ti mo, ngbanga ti nyen la a yeke kota ye ti tene mo bata nzoni programme ti mandango ye mo wani nga mo fa tënë lakue?

TËNË SO ABÂ A-ANCIEN

Tongana mbeni wafango tënë so ade ti wara batême ape afa so lo ye ti wara batême, a lingbi a wa lo ti kiri ti bâ mbage so a tene “Ahundango tënë ndali ti azo so aye ti wara batême,” na lembeti 185-207 ti buku so. A lingbi a gboto lê ti lo na ndö ti mbage so a tene “Mbeni tënë ndali ti awafango tënë so ade ti wara batême ape” so akomanse na lembeti 182, so afa tongana nyen la lo lingbi ti leke terê ti lo ndali ti alisoro ti lo na a-ancien. Tongana ti so a fa na yâ ti mbage so, zo so aye ti wara batême alingbi ti sara kua na atënë ti lo so lo sû ni, nga lo lingbi ti bata buku ti lo ni na zingo ni na ngoi ti alisoro ni. Ye oko, lo bezoin pëpe ti tene lo na mbeni zo nde abâ ahundango tënë ni kozo si lo wara terê na a-ancien.

A lingbi azo kue so aye ti wara batême asara tënë ni na coordinateur ti bungbi ti a-ancien. Na peko ti so zo so ahunda ti wara batême awara ngoi ti bâ “Ahundango tënë ndali ti azo so aye ti wara batême,” coordinateur ti bungbi ti a-ancien ayeke hunda zo ni wala na yâ ti sambela lo mû terê ti lo na Jéhovah awe ti sara ye so bê ti lo aye. Tongana zo ni asara ni awe, coordinateur ti bungbi ti a-ancien ayeke leke ti tene a-ancien use asara kua na “Ahundango tënë ndali ti azo so aye ti wara batême” ti sara lisoro na lo. Ahundango tënë ni ayeke na ambage use, a yeke mû mbage oko oko na a-ancien nde nde use ti sara ni. A hunda pëpe ti ku juska a sara tokua ti kota bungbi ti lango oko wala ti lango ota si a to nda ti sara lisoro so.

Ambage ni ayeke use, mingi ni ancien oko oko ayeke sara mbage so a mû na lo, na lo yeke sara ni aninga l’heure oko tongaso, atâa so a yeke sioni ape ti hon l’heure oko tongana bezoin ni ayeke dä. A lingbi a komanse mbage ni oko oko na sambela nga a hunzi ni na sambela. A lingbi zo so aye ti wara batême ni wala a-ancien ni asara lisoro ni gï na loro loro ape ti hunzi ahundango tënë ni. A yeke nzoni a-ancien ni azia lisoro so na kozo ndo na yâ ti akapa ti ala.

Mingi ni, a yeke nzoni ti bâ ahundango tënë ni na zo oko oko so aye ti wara batême, me pëpe ti bungbi ala kue place oko ti hunda ala na ahundango tënë ni. Tongana mbeni zo so aye ti wara batême akiri tënë na ahundango tënë ni oko na oko kue, a yeke mû lege na a-ancien ni ti hinga tongana nyen la lo mä yâ ti aye ni, na ala yeke hinga biani wala zo ni alingbi ti wara batême. Na ndö ni, zo so aye ti wara batême alingbi ti duti nduru ti fa atënë ti bê ti lo tongana lisoro ni ayeke gï na popo ti lo na ancien ni. Me ti mbeni koli na wali ti lo, a peut ti sara ti ala place oko.

Tongana zo so aye ti wara batême ayeke mbeni wali, a yeke nzoni ancien ni asara lisoro ni na mbeni place so azo ayeke bâ ala dä, me so azo ayeke mä ala ape. Tongana a bâ so a yeke kota ye ti tene mbeni zo aduti na terê ti ala, a lingbi a duti mbeni ancien wala mbeni wakua ti mungo maboko, adepend mbage so ala yeke sara lisoro na ndö ni. A lingbi a sara ni alingbi na atënë so ayeke na yâ ti paragraphe so aga na peko.

Na yâ ti acongrégation so a-ancien ayeke dä mingi ape, awakua ti mungo maboko so ahinga ti bâ yâ ti ye nzoni alingbi ti sara mbeni mbage ti lisoro ni na azo so aye ti wara batême, ala yeke sara lisoro na ndö ti ahunda so ayeke na “Mbage 1: Aye so aChrétien amä na bê na ni.” Me ti “Mbage 2: Sarango ye ti Chrétien” a lingbi mbeni ancien la asara ni. Tongana aita-koli so alingbi ayeke dä na yâ ti congrégation ni ape, a yeke nzoni a sara tënë ni na surveillant ti circonscription ti bâ wala a lingbi ti hunda mungo maboko na mbeni congrégation so ayeke nduru.

Tongana zo so aye ti wara batême ade kete, a yeke nzoni babâ wala mama ti lo so ayeke Chrétien, wala ala use kue, aduti dä na ngoi ti lisoro ni. Tongana babâ wala mama ti lo alingbi ti duti dä ape, a yeke nzoni a-ancien use (wala mbeni ancien na mbeni wakua ti mungo maboko, adepend mbage so ala yeke sara lisoro na ndö ni) asara ambage ni oko oko kue.

A-ancien ayeke sara kue ti bâ wala zo ni so aye ti wara batême so agbu kamême nda ti akozo fango ye ti Bible nzoni. Na ndö ni, a yeke nzoni ala gi ti bâ wala zo ni so abâ tâ tënë nga na bungbi ti Jéhovah na nene ni mingi. Tongana zo ni amä yâ ti akozo fango ye ti Bible nzoni ape, a-ancien ayeke leke ti tene lo wara mungo maboko so alingbi na ni, tongaso si na yâ ti angoi so ayeke ga na pekoni lo lingbi ti wara batême. Ti ambeni zo ni, a lingbi a zia ngoi na ala ti tene ala fa so ala bâ kua ti fango tënë na nene ni wala ala yeda na aye so a leke na yâ ti bungbi ti Jéhovah. A yeke na a-ancien ni ti sara ye na ndara ti kangbi yâ ti l’heure so ala yeke sara na lisoro na zo ni so nzoni, si ala lingbi ti hinga biani wala lo lingbi ti wara batême. Atâa so a lingbi ti mû ngoi na ndö ti ambeni hundango tënë ni ahon ambeni, a lingbi a bâ ahundango tënë ni kue na zo ni.

A-ancien so a soro ala ti sara lisoro na zo ni so ayeke wara terê na peko ti so a sara lisoro na lo na ndö ti use mbage ti lisoro ni ti bâ wala a lingbi a yeda na zo ni ti wara batême wala pëpe. A-ancien ayeke bâ sewa so zo ni akono na yâ ni, hingango ye ti lo, dutingo ti lo, ngangu ti lo nga na ambeni ye nde. Ye so a-ancien ayeke gi ayeke ti hinga wala zo ni alë kpengba songo na Jéhovah nga lo mä yâ ti akozo tâ tënë ti Bible. Tongana na ndoye ala mû maboko na azo so aye ti wara batême, a yeke leke ala ti sara kota kua so a mû na ala, so ayeke fango nzoni tënë.

Na pekoni, a lingbi ancien oko wala use so asara lisoro na zo ni abâ lo ti fa na lo wala lo lingbi ti wara batême wala pëpe. Tongana zo ni alingbi ti wara batême, a lingbi a-ancien ni abâ na lo “Ndangba lisoro na azo so aye ti wara batême”, na lembeti 206-207. Tongana ade zo ni ahunzi mandango buku Bible alingbi nga na buku Ngbâ na yâ ti ndoye ti Nzapa pëpe, a yeke nzoni a-ancien ni awa lo ti sara ni na peko ti batême ti lo. Ala tene na zo so aye ti wara batême so a yeke zia lango ti batême ti lo na lê ti fiche ti lo ti wafango tënë. Ala dabe ti lo so a-ancien azi lani fiche so na iri ti lo tongaso si bungbi ti Jéhovah alingbi ti bâ lege ti akua ti aTémoin ti Jéhovah na yâ ti dunia kue nga tongaso si lo lingbi ti mû mbage na akua ti Royaume nga ti wara mungo maboko na lege ti yingo. Na ndö ni, a-ancien alingbi ti dabe ti lo so a yeke sara kua na atënë so andu lo so ayeke na lê ti fiche ni alingbi na Arègle so abâ dunia kue ti aTémoin ti Jéhovah na ndö ti batango asango so ayeke na ndö ti jw.org. A lingbi lisoro ni ahon penze-ngbonga bale-oko ape.

Ngu oko na peko ti batême ti wafango tënë ni, a yeke nzoni a-ancien use abâ lo ti kpengba lo nga ti fa na lo ambeni ye so lo lingbi ti sara. A yeke nzoni mbeni oko ti a-ancien ni aduti surveillant ti groupe ti ita ni. Tongana ita ni ade kete, a yeke nzoni babâ wala mama ti lo so ayeke Chrétien, wala ala use kue, aduti dä na ngoi ti lisoro ni. A yeke nzoni ala sara lisoro ni na ngia nga ala kpengba ita ni. A-ancien ni ayeke sara lisoro na lo na ndö ti guengo na li ni ti lo na lege ti yingo nga ala yeke fa na lo aye so lo lingbi ti sara ti ngbâ lakue ti manda ye lo wani, ti diko Bible lâ oko oko, ti voro Nzapa na sewa, ti gue na bungbi lakue na ti mû mbage dä nga ti fa tënë yenga na yenga (aÉph. 5:15, 16). Tongana ade lo hunzi mandango buku Bible alingbi nga na buku Ngbâ na yâ ti ndoye ti Nzapa pëpe, a yeke nzoni a-ancien ni aleke ti tene mbeni ita asara ni na lo. A yeke nzoni a-ancien ni agonda lo nga ala sara ye na lo na nzoni bê. Mingi ni, ti mû wango na ndö ti mbeni ye oko wala use alingbi.