Jacob na Ésaü asara siriri na popo ti ala

Jéhovah atene na Jacob so lo yeke bata lo gï tongana ti so lo bata lani Abraham na Isaac. Jacob aduti na mbeni kodro so a iri ni Haran, ndo so lo sara mariage dä. Lo wara mbeni kota sewa kâ, nga lo ga kota zo ti mosoro.

Mbeni lâ, Jéhovah atene na Jacob: ‘Kiri na kodro ti mo.’ Tongaso, Jacob na sewa ti lo akomanse ti sara mbeni yongoro voyage ti kiri. Na lege, ambeni zo atingbi na Jacob na ala tene: ‘Ita ti mo Ésaü ayeke ga, lo na akoli 400 na terê ti lo.’ Mbeto asara Jacob ngangu ndali ti so lo pensé so Ésaü ayeke ga ti fâ lo na asewa ti lo. Lo sambela Jéhovah, lo tene: ‘Pardon, zi mbi na maboko ti ita ti mbi.’ Lango oko na pekoni, Jacob atokua na Ésaü mbeni matabisi ti gbâ ti angasa, ataba, achameau nga na abagara.

Na bï, na ngoi so Jacob ayeke gï lo oko, lo bâ mbeni ange. Lo na ange ni akomanse ti gbugburu terê. Ala gbugburu terê juska ndo ahan. Ndo so cuisse ti Jacob na bassin ti lo atingbi terê dä azi na lê ti terê, atâa so kue lo ye ti zia ange ni ape. Ange ni atene: ‘Zia mbi, mbi gue.’ Me Jacob atene: ‘Mbi yeke zia mo pëpe juska mo iri tufa na ndö ti mbi si.’

Na nda ni, ange ni airi tufa na ndö ti Jacob. Fadeso, Jacob ahinga so Jéhovah ayeke zia lege pëpe na Ésaü ti ga ti fâ lo.

Na ndade ni, Jacob ayô lê ti lo lo bâ ndo kâ, lo bâ Ésaü na akoli 400 so ayeke na terê ti lo. Jacob azia asewa ti lo na peko na lo gue lo kuku na sese na devant ti ita ti lo fani mbasambala. Ésaü akpe loro ague awara Jacob na lo gbu lo na kate ti lo. Ala use kue atï na toto nga ala sara siriri na popo ti ala. Mo pensé so bango ndo ti Jéhovah na ndö ti lege so Jacob aleke na kpale so ayeke tongana nyen?

Kete na pekoni, Ésaü akiri na ndo ti lo, na Jacob nga kue akiri na ndo ti lo. Jacob ayeke na amolenge 12. Iri ti ala ayeke Ruben, Siméon, Lévi, Juda, Dan, Nephtali, Gad, Aser, Issacar, Zabulon, Joseph nga na Benjamin. Jéhovah asara kua na mbeni molenge ti lo oko, Joseph, ti sö azo ti lo. Mo hinga tongana nyen la Jéhovah asara kua na lo? Zia e bâ ni.