Jacob la awara lani héritage

Isaac ayeke na ngu 40 na ngoi so lo sara mariage na Rébecca. Lo ye Rébecca mingi. A si na mbeni ngoi, ala dü amolenge-koli use so ayeke angbo.

Iri ti yaya ni ayeke Ésaü, na ti ngambe ni ayeke Jacob. Ésaü aye ti gue na ngonda mingi nga lo yeke gi nyama nzoni mingi. Me Jacob aye ti lo mingi ti ngbâ na yanga-da.

Ândö, tongana mbeni babâ akui, a yeke mû kota mbage ti sese ti lo nga na nginza ti lo na kozo molenge ti lo ti koli. A yeke ye so a iri ni héritage. Na yâ ti sewa ti Isaac, héritage ni andu nga azendo so Jéhovah amû lani na Abraham. Azendo ni so ayeke kota ye mingi na lê ti Ésaü ape, me ti Jacob a yeke tâ kota ye mingi na lê ti lo.

Mbeni lâ, Ésaü alondo na ngonda akiri na yanga-da, ngangu ti lo ahunzi kue na peko ti gingo nyama so lo gi na lango ni so kue. Lo mä fion ti pendere kobe so Jacob ayeke tö ni, na lo tene: ‘Nzara ahon ndö ti mbi. Mû na mbi mbeni bengba kobe so kete ma!’ Jacob atene: ‘Mbi yeke mû na mo ni, me deba yanga ti mo na mbi so héritage ti mo ayeke ga ti mbi.’ Ésaü atene: ‘Héritage ni ayeke nga kota ye na mbi ape. Mo peut ti mû ni senge. Mbi ye gï ti te ye awe.’ Ésaü asara ye na ndara la? Ên-ën. Ndali ti sembe ti kobe oko, Ésaü ake mbeni ye so ngere ni ayeke kota mingi.

Na ngoi so Isaac aga mbakoro mingi, a yeke fadeso ngoi ti tene lo iri tufa na ndö ti molenge ti lo ti koli so ayeke yaya ni. Me, Rébecca amû maboko na Jacob, so ayeke ngambe ni, ti tene lo wara tufa ni. Na ngoi so Ésaü ahinga tënë ni, ngonzo ahon ndö ti lo nga lo leke ti fâ mbage ti ngbo ti lo Jacob. Isaac na Rébecca aye ti bata Jacob, na ala tene na lo: ‘Kpe mo gue na ndo ti ita ti mama ti mo Laban, ngbâ kâ juska Ésaü azia lege ti ngonzo ti lo ni si.’ Jacob amä wango ti babâ na mama ti lo na lo kpe ti bata fini ti lo.