Ala mû zendo na Jéhovah

Azo ti Israël asi na Hoto ti Sinaï na peko ti so ala quitté kodro ti Égypte asara nze use, kâ ala leke camp ti ala. Moïse amonté hoto ni, Jéhovah airi lo, na Lo tene na lo: ‘Mbi sö lani azo ti Israël. Tongana ala mä yanga ti mbi nga ala bata andia ti mbi, ala yeke ga azo ti mbi so ayeke nde.’ Moïse adescend na lo sara tënë ti ye so Jéhovah atene na lo so na azo ti Israël. Ala tene nyen? Ala tene: ‘E yeke sara ye kue so Jéhovah atene na e ti sara.’

Moïse akiri amonté hoto ni. Kâ, Jéhovah atene: ‘Na peko ti lango ota, mbi yeke sara tënë na mo. Mo gboto mê ti azo ni ti tara ti monté na ndö ti Hoto ti Sinaï ni pëpe.’ Moïse adescend na lo tene na azo ti Israël ti leke terê ti ala ti mä Jéhovah.

Lango ota na pekoni, azo ti Israël abâ kota wâ nga na mbinda so avuko vukongo na ndö ti hoto ni. Ala mä nga toto ti bekpa so asungba ngangu nga na go ti mbeni didi. Na pekoni, Jéhovah adescend na ndö ti hoto ni na yâ ti wâ. Mbeto asara azo ti Israël ni ngangu juska terê ti ala adö. Hoto ni kue ayengi tâ ngangu nga guru ti wâ ni amû terê ni kue. Yeke yeke, go ti didi ni atoto ngangu. Na pekoni, Nzapa atene: ‘Mbi yeke Jéhovah. A lingbi ala voro ambeni nzapa nde pëpe, gï mbi oko awe.’

Moïse akiri amonté hoto ni, na Jéhovah amû na lo andia ndali ti azo ni. Andia ni afa fason so ala doit ti voro na Lo nga fason so ala doit ti sara na ye. Moïse asû andia ni nga na pekoni lo diko ni na azo ti Israël. Ala mû zendo atene: ‘E yeke sara ye kue so Jéhovah atene na e ti sara.’ Biani, ala mû zendo na Nzapa. Me eskê ala yeke sara ande ye alingbi na ni la?