Hannah asambela ti wara molenge

Mbeni zo ti Israël ayeke lani dä so iri ti lo ayeke Elcanah, lo yeke na awali use, Hannah na Péninnah, me lo ye Hannah mingi. Péninnah ayeke he lani Hannah lakue ndali ti so lo yeke na molenge ape, gï lo Péninnah ni la ayeke na gbâ ti amolenge. Ngu oko oko, Elcanah ayeke gue na sewa ti lo ti voro Nzapa na yâ ti tabernacle na Shilo. Mbeni lâ tongana ala si kâ, Elcanah abâ so mawa asara Hannah, wali ti lo so lo ye lo mingi so. Lo tene na lo, lo tene: ‘Pardon toto ape Hannah. Mbi yeke ti mo. Mbi ye mo.’

Na pekoni, Hannah ague lo oko ti sambela. Lo kanga bê gbä, lo toto na ngoi so lo yeke dema na Jéhovah ti mû maboko na lo. Lo mû zendo so: ‘Jéhovah, tongana mo sara si mbi dü molenge-koli, mbi yeke mû ande lo na mo, na lo yeke sara kua ti mo na yâ ti gigi ti lo kue.’

Kota prêtre Éli abâ Hannah so angbâ ti gboto toto, na lo pensé ti lo lo tene lo nyon sämba la. Hannah angbâ atene: ‘Ên-ën, seigneur ti mbi, mbi nyon sämba ape. Mbi yeke na mbeni ngangu kpale, na mbi ngbâ ti sara tënë ni na Jéhovah la.’ Éli aga ti bâ so ye so lo pensé fade na ni so ayeke na lege ni ape na lo tene na lo: ‘Zia Nzapa amû na mo ye so mo hunda so.’ Terê ti Hannah anzere na lo mû lege lo hon. A sara nga ngu oko na pekoni ape, lo dü mbeni molenge-koli na lo zia iri ti lo Samuel. Tara ti bâ tongana nyen la terê ti Hannah anzere lani.

Hannah agirisa zendo so lo mû lani na Jéhovah so ape. Gï hio na peko ti so lo zi Samuel na me, lo gue na lo ti tene lo sara kua na tabernacle. Lo tene na Éli, lo tene: ‘Bâ molenge so mbi sambela lani ti wara lo so la. Mbi mû lo ti tene lo sara na Jéhovah na yâ ti gigi ti lo kue.’ Ngu oko oko, Elcanah na Hannah ayeke gue ti bâ Samuel na ala yeke gue na lo mbeni kota bongo so maboko ni ayeke dä ape. Jéhovah asara si Hannah adü amolenge-koli ota na ndö ni nga na amolenge-wali use.