A punir mbeni sioni gbia-wali

Na lê ti fenêtre ti da ti Gbia Achab so ayeke na gbata ti Jizréel, lo bâ mbeni yaka ti vigne so ayeke ti mbeni koli so iri ti lo ayeke Naboth. Achab aye yaka ti vigne ni so, na lo gi ti vo ni na maboko ti Naboth. Me Naboth ake ti kä yaka ni na lo ndali ti so ti kä sese ti héritage ayeke ye so ague nde na Ndia ti Jéhovah. Ye so Naboth asara so ayeke na lege ni, me eskê Achab abâ ni na nene ni? Ên-ën. Ngonzo asara Achab ngangu. Vundu ahon ndö ti lo, lo ngbâ na yâ ti chambre ti lo na lo ke ti te kobe.

Sioni Gbia-wali Jézabel, so ayeke wali ti Achab, atene na Achab, atene: ‘Mo la mo yeke gbia ti azo ti Israël. Mo peut ti wara aye kue so mo ye. Mbi yeke mû ande sese ni na mo.’ Lo sû mbeti lo tokua na a-ancien ti gbata ni, lo tene na ala ti bi tënë na li ti Naboth atene so lo la lo zonga Nzapa nga ti tene a bo lo na tênë si lo kui. A-ancien ni asara ye so Jézabel atene na ala ti sara, na pekoni Jézabel atene na Achab: ‘Naboth akui awe. Yaka ti vigne ni ayeke ti mo.’

Naboth ayeke pëpe gï oko zo so tënë ayeke na li ti lo ape, si Jézabel afâ lo. Lo fâ nga gbâ ti azo so aye Jéhovah. Lo voro ayanda nga lo sara ambeni sioni ye. Jéhovah abâ asioni ye kue so Jézabel asara so. Nyen la lo yeke sara na Jézabel?

Na peko ti so Achab akui, molenge ti lo Jéroboam aga gbia. Jéhovah atokua mbeni koli so iri ti lo ayeke Jéhu ti punir Jézabel na afami ti lo.

Jéhu amonté na yâ ti puse ti mbarata lo gue na Jizréel, ndo so Jézabel alango dä. Jéroboam ayeke na ndö ti puse ti mbarata na lo ga ti tingbi na Jéhu nga lo hunda lo: ‘Siriri ayeke na popo ti e?’ Jéhu atene: ‘So mama ti mo, Jézabel angbâ ti sara aye ti sioni mingi tongaso so, siriri alingbi ti duti dä tongana nyen?’ Jéroboam agi ti tourné puse ti mbarata ti lo na ti kpe. Me Jéhu apika Jéroboam na kokora, na lo kui.

Na pekoni, Jéhu ague na yangbo ti Jézabel. Tongana Jézabel amä so Jéhu ayeke ga, lo sara aye ti baba ti lo, lo leke kuä ti li ti lo pendere na lo yeke ku lo na lê ti fenêtre ti da ti lo so ayeke na nduzu. Na ngoi so Jéhu asi, Jézabel abara lo na baba. Jéhu angbâ adekongo na azo ti kua ti Jézabel so aluti na terê ti lo, lo tene: “Ala bi lo na sese!” Ala pusu Jézabel na lê ti fenêtre ni, lo tï na sese na lo kui.

Na pekoni, Jéhu afâ amolenge ti Achab 70 na lo zi vorongo Baal na yâ ti kodro ni. Ye so aye ti fa so Jéhovah abâ aye kue so ayeke si, na tongana ngoi ni alingbi, lo yeke punir azo kue so asara ye ti sioni.