Ngangu zo ti bira na mbeni kete molenge-wali

Na kodro ti Syrie lani, mbeni kete molenge-wali ti Israël ayeke dä, so alango ayo na afami ti lo. Aturugu ti Syrie la amû lo na maboko ti sewa ti lo, na fadeso lo yeke zo ti kua ti wali ti mbeni mokonzi ti aturugu so iri ti lo ayeke Naaman. Kete molenge-wali so ayeke voro Jéhovah, atâa so azo so angoro lo avoro Jéhovah ape.

Naaman ayeke na mbeni sioni kobela so amû poro ti terê ti lo, na lo yeke bâ pasi na ni. Kete molenge-wali so aye biani ti aidé lo. Lo tene na wali ti Naaman, lo tene: ‘Mbi hinga mbeni zo so apeut ti sara si koli ti mo awara sava. Na Israël, mbeni prophète ti Jéhovah ayeke kâ so iri ti lo ayeke Élisée. Lo peut ti sava koli ti mo.’

Wali ti Naaman afa na Naaman peko ti tënë so kete molenge-wali so atene na lo. Naaman ayeke prêt ti sara ye kue, tongaso lo gue na da ti Élisée na Israël. Naaman ayeke ku lani ti tene Élisée ayamba lo tongana mbeni kota zo. Me ahon ti tene Élisée lo wani lo ga lo sara tënë na Naaman, lo tokua zo ti kua ti lo ti bara Naaman nga ti tene na lo: ‘Gue mo sukula terê ti mo fani mbasambala na yâ ti Ngu ti Jourdain. Na pekoni mo yeke sava ande.’

Bê ti Naaman ason ngangu. Lo tene: ‘Mbi pensé so prophète ni ayeke sava mbi na lege so lo yeke iri ndo na Nzapa ti lo nga lo yeke hon na maboko ti lo na mbage ge nga na mbage kâ na ndö ti mbi. Me nde na so, lo tene na mbi ti gue gï na ngu so ayeke na Israël. E yeke na anzoni ngu na Syrie. Ngbanga ti nyen la a lingbi mbi gue gï kâ ape?’ Ngonzo asara Naaman, na lo zia da ti Élisée lo hon.

Azo ti kua ti Naaman a-aidé lo ti gbu li ti lo nzoni. Ala tene na lo: ‘Mo ye fade ti sara ye kue ti wara sava ape? Ye so prophète so atene na mo ti sara so ayeke nga ngangu ye ape. Ngbanga ti nyen mo sara ni ape?’ Naaman amä ala. Lo gue na Ngu ti Jourdain na lo lï na yâ ni fani mbasambala. Na pekoni, Naaman asigi na yâ ti ngu ni na terê ti lo kue aga nzoni. Ti fa singila ti bê ti lo, lo kiri na ndo ti Élisée ti mû merci na lo. Naaman atene: ‘Fadeso, mbi hinga so Jéhovah ayeke tâ Nzapa.’ Na ngoi so Naaman akiri na yanga-da, mo pensé a sara kete molenge-wali ti Israël so tongana nyen na bango Naaman so terê ti lo aga nzoni?