Fa ye na amolenge ti mo
Bê ti ye abuba yâ ti songo ti Guéhazi na Nzapa
A SI na mo awe ti sara nzara ti mbeni ye mingi si mo ye ti wara ni?—a A si nga na azo mingi. Me a yeke nzoni ti tene mo gi ti wara ye so mo ye na tenengo mvene?— A yeke nzoni ape. So sarango bê ti ye la! Zia e bâ tapande ti mbeni koli so iri ti lo ayeke Guéhazi, so sarango bê ti ye abuba yâ ti songo ti lo na Nzapa. Lo yeke lani mbeni zo ti kua ti Élisée so ayeke mbeni prophète ti tâ Nzapa, Jéhovah.
Élisée na Guéhazi ayeke lani na fini angu mingi kozo ti tene a dü Jésus, Molenge ti Nzapa, ge na sese. Jéhovah asara kua lani na Élisée ti sara apendere ye mingi, ti sara amiracle. Na tapande, na yâ ti Bible, a sara tënë ti mbeni turugu ti kota kamba ti kodoro ti Syrie so ayeke lani na sioni kobela ti buruma. Zo oko alingbi lani ti zi kobela so na tere ti lo ape, me Élisée azi ni.
Lani, tongana Élisée amû maboko na azo si kobela ti ala ahunzi, azo ni aye ti mû na lo nginza na pekoni, me lo yeke ke. Ngbanga ti nyen?— Ngbanga ti so lo hinga so ngangu ti sarango na amiracle ni alondo na Jéhovah me na lo wani ape. Ni la, tongana Élisée asava Naaman awe, tere ti lo anzere mingi si lo ye ti mû na Élisée or, argent nga na angangu bongo. Élisée ake ti mû ni, me Guéhazi asara nzara ti aye ni so sioni.
Na peko ti so Naaman akiri, Guéhazi atomba peko ti lo, lo sara tënë ni na Élisée ape. Tongana lo wara Naaman awe, Guéhazi atene nyen na lo?— Lo tene, ‘Élisée la atokua mbi ti tene na mo so agene use asi fafadeso. Lo ye bongo use ti mû na azo ni.’
Me so mvene la! Guéhazi la asigigi na tënë ni so na li ti lo wani ngbanga ti so lo ye ti wara abongo so Naaman aye fade ti mû na Élisée si lo ke so. Me Naaman ahinga ti lo ape. Ni la a nzere na lo mingi ti mû aye ni na Guéhazi. Lo mû même aye ni ahon ndo ti so Guéhazi ahunda. Nyen la asi na pekoni nyen?—
Tongana Guéhazi akiri na yanga-da, Élisée ahunda lo, a tene: ‘Mo londo na ndo wa?’
Guéhazi atene, ‘Mbi gue na ndo oko ape.’ Andâ Jéhovah afa ti lo aye ni kue na Élisée awe. Ni la Élisée atene na lo: ‘Ngoi ti tene zo ayeda na bongo wala na nginza la ape.’
Guéhazi amû nginza nga na bongo so ayeke ti lo ape. Tongaso, Nzapa asara si buruma ti Naaman akiri na ndo ti Guéhazi. E manda nyen dä?— Mbeni ye so e manda dä ayeke so a yeke sioni ti sigigi na atënë ti mvene ti tene ni.
Nyen la asara si Guéhazi atene mara ti mvene tongaso?— A yeke bê ti ye. Lo ye ti wara ye so ayeke ti lo ape nga lo gi ti wara ye ni so na tenengo mvene. Ye so asara si lo bâ pasi na mbeni sioni kobela juska na kuâ ti lo.
Me mbeni ye ayeke dä so Guéhazi abâ pasi na ni ahon même buruma ni. Ye ni so ayeke nyen?— A yeke so yâ ti songo ti lo na Nzapa abuba, Nzapa ake lo. Zia e sara lâ oko pëpe mbeni ye so ayeke buba yâ ti songo ti e na Nzapa! Me, zia e gi ti sara nzoni na amba ti e nga ti duti nduru ti mû na ala aye so e yeke na ni.
Diko na Bible ti mo
[Kete tënë na gbe ni]
a Tongana mo yeke diko ye na molenge na mo bâ a zia (—), a fa so a lingbi mo luti kete nga mo wa lo ti fa tënë ti bê ti lo.