Josias andoye Ndia ti Nzapa

Josias aga gbia ti Juda na ngoi so lo yeke na ngu miombe. Na angoi ni so, azo ni ayeke sara magie nga ala yeke voro ayanda. Na ngoi so Josias ayeke na ngu 16, lo gi ti hinga tongana nyen ti voro Jéhovah na lege ni. Na ngoi so lo yeke na ngu 20, lo komanse ti futi ayanda ti yâ ti kodro ni kue nga na agbalaka ni. Nga na ngoi so lo yeke na ngu 26, lo bâ si a kiri a leke temple ti Jéhovah.

Na yâ ti temple, Kota prêtre Hilkiah awara rouleau ti Ndia ti Jéhovah, peut-être a yeke rouleau so Moïse wani la asû lani. Shaphan so ayeke wakuasu ti gbia ague na rouleau ni na Josias na lo komanse ti diko na lo Ndia ni na kota go. Na ngoi so Josias amä ni, lo ga ti bâ so mara ni ake yanga ti Jéhovah asara angu mingi awe. Gbia Josias atene na Hilkiah: ‘Jéhovah asara ngonzo na terê ti e ngangu. Gue mo sara tënë na lo. Jéhovah ayeke tene ande na e ye so alingbi e sara.’ Jéhovah akiri tënë na lege ti prophète-wali Huldah, lo tene: ‘Azo ti Juda azia mbi awe. Mbi yeke punir ala, me pëpe na ngoi so Josias ayeke gbia, ngbanga ti so lo sara terê ti lo kete.’

Na ngoi so Gbia Josias amä tënë ni, lo gue na temple na lo bungbi azo ti Juda kue place oko. Na pekoni, lo diko Ndia ti Jéhovah na kota go na azo ti mara ni kue. Josias nga na azo ti mara ni kue amû zendo ti mä yanga ti Jéhovah na bê ti ala kue.

A sara angu mingi awe la mara ti Juda asara Matanga ti Pâque ape so. Me na ngoi so Josias adiko na yâ ti Ndia a tene so a lingbi a sara Matanga ti Pâque ngu oko oko, lo tene na mara ni, lo tene: ‘E yeke sara Matanga ti Pâque na Jéhovah.’ Na pekoni, Josias aleke ti tene a mû asacrifice gbani gbani nga ti tene a wara mbeni groupe ti azo ti hengo bia na temple. Mara ni angbâ asara Matanga ti Pâque nga na pekoni lo sara Matanga ti mapa so a sara na levure pëpe so aninga lango mbasambala. Ngbene ye na ngoi ti prophète Samuel, ade a sara mara ti Matanga ti Pâque tongaso lâ oko ape. Ti tâ tënë ni, Josias aye Ndia ti Nzapa mingi. A yeke nzere ka na mo ti manda ye na ndö ti Jéhovah?