A sara mbeni mbeti na terê ti mur

Ambeni ngoi na pekoni, Belshazzar aga gbia ti Babylone. Na mbeni bï, lo iri gbâ ti akota zo ti yâ ti kodro ni ti ga na mbeni matanga. Lo mû yanga na azo ti kua ti lo ti ga na akopo ti lor so Nébucadnezzar amû lani na yâ ti temple ti Jéhovah. Belshazzar na agene ti lo anyon sämba na yâ ti akopo ni so na ala sepela anzapa ti ala. Mo ye ti bâ, mbeni maboko ti zo asigi akomanse ti sara mbeni mbeti so zo ahinga li ti lo na ni ape na terê ti mur ti place ti tengo ye ni.

Mbeto asara Belshazzar ngangu. Lo iri azo ti lo so ayeke sara magie na lo mû zendo na ala, lo tene: ‘Tongana mbeni zo afa nda ti atënë so na mbi, mbi yeke sara si lo ga ota zo so ayeke ngangu mingi na yâ ti kodro ti Babylone.’ Azo ni atara, me zo oko awara lege ti fa ndani ape. Gbia-wali aga na lo tene: ‘Mbeni koli ayeke dä so iri ti lo ayeke Daniel so ayeke fa ka lani nda ti aye na Nébucadnezzar. Lo peut ti fa nda ti atënë so na mo.’

A ga na Daniel na gbia. Belshazzar atene na lo: ‘Tongana mo diko na mo fa nda ti atënë so na mbi, mbi yeke yü ye ti go ti lor na mo nga mbi yeke sara si mo ga ota zo so ayeke ngangu mingi na yâ ti royaume ti Babylone.’ Daniel atene: ‘Mo lingbi ti bata amatabisi ti mo ni, me mbi yeke fa na mo nyen la atënë so aye ti tene. Babâ ti mo Nébucadnezzar asara ye lani na baba, na Jéhovah azia kamene na lê ti lo. Mo hinga aye kue so asi lani na lo, na mo bi nengo ti Jéhovah na sese na lege so mo nyon vin na yâ ti akopo ti lor so a mû lani na yâ ti temple ti Lo. Ni la Nzapa asara atënë so na mbeti: Mené, Mené, Tekel nga na Parsin. Atënë ni aye ti tene so azo ti kodro ti Mède na ti Perse ayeke ga ande ti mû Babylone, na mo yeke ngbâ ande gbia encore ape.’

Na bango ni, zo oko apeut ti mû kodro ti Babylone ape. Angangu gbagba nga na mbeni ngu so alï la angoro terê ti gbata ni. Me gï na bï ni bï ni, azo ti Mède na ti Perse aga na ndö ti azo ti Babylone. Cyrus, so ayeke gbia ti Perse, asara si ngu ni azia ndo so lo yeke sua ka dä ti mû mbeni lege nde, tongaso si aturugu ti lo alingbi ti tambela na yâ ni ti gue na mbage ti agbagba ti gbata ni. Tongana ala si na terê ni, yanga ti agbagba ni akanga ape! Aturugu ni alï, ala mû gbata ni na ngangu na ala fâ gbia ni. Na pekoni Cyrus aga gbia ti Babylone.

Gï na yâ ti ngu ni, Cyrus amû tokua so: ‘Jéhovah atene na mbi ti kiri ti leke temple ti lo na Jérusalem. Azo ti lo kue so aye ti mû maboko alingbi ti gue senge.’ Tâ gï tongana ti so Jéhovah amû lani zendo ni, gbâ ti aJuif akiri na peko ti so a futi Jérusalem asara ngu 70. Cyrus akiri na akopo ti lor na ti argent nga na akungba so Nébucadnezzar amû lani na yâ ti temple ni. Eskê mo bâ tongana nyen la Jéhovah asara kua na Cyrus ti aidé azo ti lo?