Esther asö azo ti lo

Esther ayeke mbeni maseka-wali Juif so alango na kodro ti Perse na gbata ti Suse. A sara angu mingi awe la Nébucadnezzar ague amû sewa ti lo na Jérusalem so. Mardochée so ayeke molenge ti ita ti babâ ti Esther la ayeke bata Esther, na lo yeke mbeni zo ti kua ti gbia ti Perse so iri ti lo ayeke Assuérus.

Gbia Assuérus aye ti mû mbeni fini wali. Azo ti kua ti lo aga na lo awali so ayeke pendere mingi na yâ ti kodro ni, Esther nga kue ayeke na popo ti ala. Na popo ti awali ni kue, gbia ni asoro Esther ti ga gbia-wali. Mardochée atene na Esther ti fa pëpe so lo Esther ni lo yeke Juif.

Mbeni koli so ayeke zo ti baba, so iri ti lo ayeke Haman, la ayeke na ndö ti amokonzi ti kodro ni kue. Lo ye ti tene zo kue akuku na gbe ti lo. Mardochée ake ti sara ni, ni la ngonzo asara Haman mingi a sara si lo ye ti fâ lo. Tongana Haman ague ngbii ahinga so Mardochée ayeke mbeni Juif, lo leke ti tene a fâ aJuif kue ti yâ ti kodro ni. Lo tene na gbia, lo tene: ‘A-Juif ayeke sioni mingi; a lingbi mo fâ ala kue.’ Assuérus atene: ‘Sara ye kue so mo ye ti sara,’ na lo mû yanga na lo ti sigi na mbeni ndia. Haman asigi na mbeni ndia so atene na azo ti kodro ni ti fâ zo kue so ayeke Juif na lango 13 ti kozo nze ti Adar. Andâ Jéhovah ayeke bâ aye so kue.

Esther amä tënë ti ndia ni ape. Tongaso Mardochée atokua na lo copie ti ndia ni na lo tene na lo: ‘Gue mo sara tënë na gbia.’ Esther atene: ‘Zo kue so ague ti bâ gbia sân ti tene a tisa lo, a yeke fâ zo ni so. A sara lango 30 awe la gbia atisa mbi ape so! Me mbi yeke gue. Tongana lo yôro na mbi keke ti lo ti gbia, mbi yeke ngbâ na fini. Tongana lo yôro ni ape, a yeke fâ mbi.’

Esther ague na yangbo ti gbia ni. Tongana gbia ni abâ lo, lo yôro na lo keke ti lo ti gbia. Lo gue na mbage ti gbia ni, na gbia ni ahunda lo, atene: ‘Esther, nyen la mo ye ti tene mbi sara ndali ti mo?’ Lo tene: ‘Mbi ye ti tisa mo na Haman ti ga na mbeni matanga.’ Na ngoi ti matanga ni, Esther akiri atisa ala ti ga na mbeni matanga ni encore. Na ngoi ti use matanga ni, gbia ni akiri ahunda lo, atene: ‘Nyen la mo ye ti tene mbi sara ndali ti mo?’ Lo tene: ‘Mbeni zo aye ti fâ mbi na azo ti mara ti mbi. Pardon, sö e.’ Gbia ni ahunda lo atene: ‘Zo wa la aye ti fâ mo zo wa?’ Esther atene: ‘Sioni koli Haman so.’ Assuérus asara ngonzo ngangu, a sara si lo hunda ti tene a fâ Haman gï na lê ni lê ni.

Me mbeni zo oko alingbi pëpe ti zi ndia ti Haman so, même gbia kue apeut ape. Tongaso, gbia ni azia Mardochée na ndö ti amokonzi kue ti yâ ti kodro ni na lo mû yanga na lo ti sigi na mbeni fini ndia. Mardochée asigi na mbeni ndia so amû lege na aJuif ti tiri tongana azo aga ti sara bira na ala. Na lango 13 ti nze ti Adar, aJuif asö benda na ndö ti awato ti ala. Ti londo na ngoi ni so ti gue na ni, ngu oko oko ala yeke sara matanga ti dabe ti ala na lango ni so.