Ndangba kobe ti Jésus

A-Juif ayeke sara lani Matanga ti Pâque ngu oko oko na lango 14 ti nze ti Nisan. Matanga ni so ayeke dabe ti ala na ye so Jéhovah asara ti zi ala na gbe ti ngbâa na Égypte na ti gue na ala na Sese ti Zendo. Na ngu 33, Jésus na abazengele ti lo asara Matanga ti Pâque na yâ ti mbeni da na nduzu na Jérusalem. Na ngoi so ala te kobe ahunzi awe, Jésus atene: ‘Mbeni zo na popo ti ala ayeke kä ande mbi.’ Li ti abazengele ni aga kirikiri, na ala hunda Jésus, atene: ‘Zo ni so ayeke zo wa?’ Jésus atene: ‘A yeke zo so mbi yeke mû na lo mapa so.’ Na pekoni, lo mû mapa na Judas Iscariote. Droit, Judas alondo na lo sigi na yâ ti da ni.

Na pekoni, Jésus atene mbeni sambela, lo kungbi yâ ti mapa ni kete kete, na lo mû ni na tanga ti abazengele so angbâ. Lo tene: ‘Ala te mapa so. A yeke tongana tapande ti terê ti mbi, so mbi yeke mû ni ndali ti ala.’ Na pekoni, lo sambela na ndö ti mbeni vin na lo mû ni na abazengele ti lo. Lo tene: ‘Ala nyon vin so. A yeke tongana tapande ti mênë ti mbi so mbi yeke mû ni ti tene a pardonné siokpari ti azo. Mbi mû na ala zendo so ala yeke duti ande agbia na terê ti mbi na yayu. Ngu oko oko ala sara ye so ti dabe ti ala na mbi.’ Ngu oko oko, na lango ni so, adisciple ti Jésus angbâ ti sara mbeni bungbi juska laso. Laso, a iri bungbi ni so Kobe ti Seigneur.

Na peko ti so ala te kobe ni awe, abazengele akomanse ti papa na popo ti ala ti hinga zo wa la ayeke kota mingi. Me Jésus atene na ala, atene: ‘Zo so ayeke kota mingi na popo ti ala ayeke zo so abâ terê ti lo tongana ngambe ti ala kue, lo bâ terê ti lo kete mingi.

‘Ala yeke akamarade ti mbi. Mbi tene na ala ye kue so Babâ ti mbi aye ti tene mbi tene ni na ala. Na yâ ti kete ngoi, mbi yeke kiri na Babâ ti mbi na yayu. Ala yeke ga ande na peko, na azo ayeke hinga ande so ala yeke adisciple ti mbi ndali ti yengo terê so ala yeke na ni na popo ti ala. A lingbi ala ndoye amba ti ala gï tongana ti so mbi ndoye ala.’

Na nda ni, Jésus asambela, lo hunda na Jéhovah ti bata adisciple ti lo kue. Lo hunda na Jéhovah ti aidé ala ti sara kua na yâ ti siriri. Lo sambela ti tene iri ti Nzapa aga nzoni-kue. Na pekoni, Jésus na abazengele ti lo ahe bia ti sepela Jéhovah na ala sigi na gigi. Ngoi ti tene a gbu Jésus aga nduru awe.