Pierre abere Jésus

Na ngoi so Jésus na abazengele ti lo ayeke lani na yâ ti mbeni kubu so ayeke na nduzu, lo tene na abazengele ni, lo tene: ‘Na bï so, ala kue ayeke dö mbi ande azia.’ Pierre atene: ‘Mbi ape! Même tongana tanga ti azo kue azia mo, mbi yeke zia mo lâ oko ape.’ Me Jésus atene na Pierre, atene: ‘Kozo si mbeni koli-kondo atoto, mo yeke tene fani ota so mo hinga mbi ape.’

Tongana aturugu ni ague na Jésus na da ti Caïphe, gbâ ti abazengele ni akpe ahon. Me use na popo ti ala amû peko ti azo ni. Mbeni oko ayeke Pierre. Lo gue na yâ ti lacour ti da ti Caïphe na lo duti na terê ti wâ. Na terê ti wâ ni, mbeni wali so ayeke zo ti kua abâ lê ti Pierre na lo tene na lo, lo tene: ‘Mbi hinga lê ti mo-aa! Mo yeke lani na terê ti Jésus!’

Pierre atene: ‘Ên-ën, a yeke mbi la ape! Mbi hinga li ti mbi na tënë so mo yeke tene so ape!’ Pierre angbâ alondo ague na terê ti porte. Me kete na pekoni, mbeni wali ni nde so ayeke nga zo ti kua abâ lo na atene na azo, atene: ‘Koli so ayeke lani na terê ti Jésus!’ Pierre atene: ‘Mbi hinga nga même Jésus ape!’ Mbeni koli nga atene: ‘Mo yeke mbeni oko ti ala! Mbi hinga ni na yâ ti fason ti sarango tënë ti mo so ayeke tongana ti azo ti Galilée, tongana ti Jésus.’ Me Pierre adeba, atene: ‘Mbi hinga lo ape!’

Mo ye ti bâ, mbeni koli-kondo atoto. Pierre abâ so Jésus atourné abâ lo. Lo rappelé na atënë so Jésus atene lani na lo, na pekoni lo sigi na gigi, lo toto ngangu.

Na oko ngoi ni, azo ti Sanhédrin amä terê ti tara Jésus na yâ ti da ti Caïphe. Ala leke ti fâ Jésus awe, ala yeke gi gï fadeso mbeni raison. Me ala wara mbeni ye ape. Na nda ni, Caïphe ahunda Jésus droit, atene: ‘Eskê mo yeke Molenge ti Nzapa?’ Jésus atene: ‘En.’ Caïphe atene: ‘E yeke na bezoin ti mbeni tënë nde ape. Lo zonga Nzapa awe!’ Azo ti fango ngbanga ni ayeda, atene: ‘Koli so alingbi na kuâ.’ Ala pika mê ti Jésus, ala tuku ngu ti yanga na terê ti lo, ala kanga lê ti lo, ala boxé lo na ala tene: ‘Tongana mo yeke mbeni prophète, fa na e zo so apika mo so!’

Tongana ndo ahan, ala gue na Jésus na kota da ti Sanhédrin na ala hunda lo encore, ala tene: ‘Eskê mo yeke Molenge ti Nzapa?’ Jésus akiri tënë, atene: ‘Ala wani ala tene mbi yeke Molenge ti Nzapa.’ Na pekoni ala bi tënë na li ti lo a tene lo zonga Nzapa na ala gue na lo na ndo ti Ponce Pilate, so ayeke mbeni gouverneur ti Rome. Nyen la asi na pekoni? Zia e bâ ni.