ENCADRÉ SO AFA YE NA ZO 19A
Akota ngu ti atufa so alondo na Jéhovah
Gbu li na ndö ti aversê ti Bible so na yâ ni a sara kua na atënë “kota ngu” nga na “ngu” ti sara tënë ti atufa so alondo na Jéhovah. Tongana a bungbi aversê so kue oko, a fa mbeni tënë so akpengba zo mingi na ndö ti aye so na lege ni Jéhovah ayeke sara atufa na ndö ti e. Tongana nyen?
JOËL 3:18 Prophétie so asara tënë ti mbeni ngu so alondo na li ti ngu so alondo na temple asua. A sua a gue na yâ ti “Popo-hoto ti akeke ti acacia” so ahule kue. Tongaso, Joël na Ézéchiel abâ mbeni kota ngu so amû fini na ndo so ye adü dä ape. Na yâ ti aprophétie ti ala use kue, kota ngu ni alondo na da ti Jéhovah, wala na temple.
ZACHARIE 14:8 Prophète Zacharie abâ “angu, so aye so ayeke na fini ayeke na yâ ni,” so alondo na gbata ti Jérusalem asua. Ndambo ti ngu ni ague na ngu-ingo so ayeke na est, wala na Mer Morte, na tanga ti ndambo ni ague na ngu-ingo so ayeke na ouest, wala Ngu-ingo ti Méditerranée. Jérusalem ayeke lani “gbata ti kota Gbia”, Jéhovah Nzapa (Mat. 5:35). Tongaso, so Zacharie asara tënë ti gbata so adabe ti e na komandema ti Jéhovah na ndö ti sese kue na yâ ti ngoi so ayeke ga. A sara angu mingi awe la e hinga so angu ti yâ ti prophétie so aye ti fa so Jéhovah ayeke sara ande tufa na ndö ti agroupe ti azo use so ayeke be-ta-zo so ayeke wara ande fini na yâ ti Paradis, azo so ayeke sigi na yâ ti kota ye ti vundu nga na azo so a yeke zingo ande ala na kuâ na pekoni.
APOCALYPSE 22:1, 2 Bazengele Jean abâ mbeni kota ngu na lege ti fä so ayeke tongana ti so Ézéchiel abâ lani. Ye oko, kota ngu ni so alondo na mbeni temple ape, me na trône ti Jéhovah. Tongaso, na bango ni, vision ni so, legeoko tongana ti Zacharie, agboto lê na ndö ti atufa so komandema ti Nzapa ayeke ga na ni na ngoi ti Komandema ti ngu saki oko ti Christ.
Biani, gï kete kangbi la ayeke na popo ti atufa so aga na lege ti komandema ti Jéhovah nga na atufa so kota ngu so Ézéchiel abâ na vision aye ti sara tënë ni. Atufa so kue alondo na Jéhovah na ague na mbage ti azo kue so ayeke be-ta-zo.
PSAUME 46:4 Bâ tongana nyen la na bango ni versê oko so aye ti sara tënë ti aye use: vorongo Nzapa nga na komandema. Ge e bâ mbeni kota ngu so aga na ngia na “gbata ti Nzapa”, âmanke a ye ti sara tënë ti Royaume nga na komandema, nga aga na ngia na “tabernacle ti Lo so ayeke na nduzu na ndö ti aye kue, kota tabernacle so ayeke pendere nga nzoni-kue”, âmanke a ye ti sara tënë ti tâ vorongo Nzapa..
Tongana e bungbi aversê so kue oko, a dë bê ti e so Jéhovah ayeke sara tufa na ndö ti azo so ayeke be-ta-zo na alege use. E yeke bâ nzoni teti lakue lakue, kozoni, na lege ti komandema ti lo nga, use ni, na lege ti ye so lo leke ndali ti tâ vorongo Nzapa. Tongaso, zia e leke na bê ti e fadeso ti ngbâ ti gi na mbage ti Jéhovah Nzapa nga na Molenge ti lo “ngu so ayeke mû fini na zo”, so ti tene aye so ala leke ni na ndoye ndali ti fini ti lakue lakue.—Jér. 2:13; Jean 4:10.