TONGO NDA TI MBENI LISORO
YE TI MANDA 2
Zia si lisoro ni asua na bê ti lo
Mama-ndia ni: “Tënë so a tene na tâ ngoi ni anzere mingi.”—aProv. 15:23.
Ye so Philippe asara lani
1. Bâ VIDÉO ni, wala diko Kusala 8:30, 31. Na pekoni kiri tënë na ahunda so:
Philippe ato nda ti lisoro ni tongana nyen?
Ngbanga ti nyen la fason so Philippe akomanse na lisoro ni ayeke naturel nga amû lege na lo ti fa na koli ni mbeni fini ye?
Tapande ti Philippe afa na e nyen?
2. Tongana e zia si lisoro ni asua na bê ti lo, peut-être a yeke nzere na zo ni nga lo yeke duti nduru ti mä tënë so e yeke fa.
Sara ye tongana Philippe
3. Hinga ti bâ ndo nzoni. Lê ti zo nga na ageste ti lo apeut ti fa na mo aye mingi na ndö ti lo. Na bango lo, eskê lo yeke nduru ti sara lisoro na mo? Mo peut ti yôro mbeni tâ tënë ti Bible na yâ ti lisoro gï na hundango lo: “Eskê mo hinga so . . . ?” Tongana zo ni aye lisoro ape, gi ti forcé ni ape.
4. Kanga bê. Pensé ape so mo doit ti komanse ti sara lisoro na ndö ti Bible gï na tongo nda ti lisoro ni. Ku juska na ngoi so mo bâ so a yeke nzoni ti sara ni, tongaso si lisoro ni apeut ti ngbâ ti sua ti bê ti lo. Tongana mo sara tongaso, a ye ti tene so peut-être mo yeke ku juska na lisoro ti peko si mo yôro mbeni tënë ti Bible dä.
5. Duti nduru ti changé atënë ti mo. Zo ni apeut ti komanse ti sara tënë ti mbeni ye so mo ku terê ti mo na ni ape. Duti nduru ti fa na lo mbeni ye so apeut ti ndu bê ti lo, même tongana mo doit ti fa na lo mbeni tâ tënë ti Bible nde na ti so mo leke fade ti fa na lo.