TONGO NDA TI MBENI LISORO
YE TI MANDA 5
Sara tënë na kode
Mama-ndia ni: “Zia lakue tënë ti yanga ti ala aduti nzoni.”—aCol. 4:6.
Ye so Paul asara lani
1. Bâ VIDÉO ni, wala diko Kusala 17:22, 23. Na pekoni kiri tënë na ahunda so:
So Paul abâ azo ti Athènes ayeke voro gbâ ti ayanda, a sara lo tongana nyen?—Bâ Kusala 17:16.
Ahon ti tene Paul afâ ngbanga na ndö ti azo ti Athènes, tongana nyen la na kode lo sara kua na ye so ala mä na bê na ni ti fa na ala nzoni tënë?
Tapande ti Paul afa na e nyen?
2. Azo ayeke nduru ti dengi mê ti mä e tongana e soro nzoni atënë ti e, fason so e tene na ni nga na ngoi ni.
Sara ye tongana Paul
3. Soro atënë so apeut ti nzere na azo. Na tapande, na ngoi so e yeke sara tënë na mbeni zo so ayeke Chrétien ape, peut-être e bezoin ti changé fason so e yeke yôro atënë ti Bible na yâ ti lisoro ni wala fason so e yeke sara tënë na ndö ti Jésus.
4. Gi hio pëpe ti corrigé bango ndo ti zo ni. Mû lege na lo ti fa atënë ti bê ti lo. Tongana lo tene mbeni tënë so ague nde na afango ye ti Bible, papa na lo ape (Jacq. 1:19). Tongana mo mä lo, mo yeke hinga ye so lo mä na bê na ni nga ndani so lo mä na bê na ni.—aProv. 20:5.
5. Tongana lege ni ayeke dä, yeda na tënë ti zo ni nga gonda lo. Na bê ti lo kue, zo ni apeut ti bâ so aye so lo mä na bê na ni ayeke na lege ni. Gi ti sara tënë na ndö ti mbeni ye so mo na zo ni amä terê na ndö ni, nga yeke yeke aidé lo ti mä yâ ti ye so Bible afa.