Na Ndo Wa Mo Lingbi ti Wara Siriri ti Bibe?
Kangbi ayeke dä mingi na popo ti ngoi ti e na ti Thoreau, so a sala tene ti lo na yâ kozo article ni. Mbeni kota kangbi ni ayeke so laso gbâ ti awango ayeke dä na ndo lege ti wara siriri ti bibe. Awasenda-bibe na awasungo buku ti mu maboko na zo, même awasungo mbeti-sango, ayeke fa abibe ti ala. Awango ti ala alingbi ti mu maboko teti mbeni kete ngoi; me ti wara ayorö so aninga, a hunda mbeni ye so alï ngangu mingi ahon. A yeke ye so azo so a sala tene ti ala na yâ kozo article so awara.
ANTÔNIO, Marcos, Gerson, Vania, na Marcelo alondo na ando nde nde na ayeke na akpale nde nde. Me, a lingbi ti tene so aye ota asi na ala kue. Kozoni, mbeni ngoi ayeke dä la ni so ala yeke na ‘beku pepe, nga na Nzapa pepe na sese so.’ (aEphésien 2:12) Use ni, ala yeke na kota nzala teti siriri ti bibe. Na ota ni, ala kue awara siriri ti bibe so ala sala nzala ni na pekoni so ala yeda na mandango Bible na aTémoin ti Jéhovah. Na ngoi so ala yeke gue na li ni, ala ga ti ba so Nzapa abi bê na ala. Biani, tongana ti so Paul atene na azo ti Athènes ti ngoi ti lo, Nzapa ‘ayeke yongoro pepe na e oko oko kue.’ (Kusala 17:27) Ti hinga ye so na bê kue a yeke kota ye mingi na yâ warango siriri ti bibe.
Ngbanga ti Nyen Siriri Ayeke Mingi Pepe?
Bible amu akota nda ti tene use ti fa ngbanga ti nyen siriri atia sese, atä siriri ti bibe wala siriri na popo ti azo. A fa kozo nda ni na Jérémie 10:23: “Lege ti zo ayeke na tïtî lo mveni pepe; na a yeke na bê ti zo so atambela ti fa lege na gere ti lo nga pepe.” Zo ayeke pepe na ndara wala na ngangu ti hinga ye kozoni si gi lo oko lo komande lo mveni, nga oko maboko so ayeke biani na ngele ngangu alondo na Nzapa. Azo so agi pepe fango lege ti Nzapa ayeke wara ande lâ oko pepe siriri so aninga. A ba use nda ni so siriri ayeke pepe na yâ tene ti bazengele Jean: “Sese kue ayeke na gbe ti ngangu ti zo ti sioni.” (1 Jean 5:19, NW) Tongana Nzapa afa lege pepe, akusala ti zo so lê aba pepe me so ayeke tâ zo, nga ayeke ngangu mingi, “zo ti sioni,” Satan, ayeke kanga ande lakue lege na angangu so zo asala ti wara siriri.
Ndali ti anda ti tene use so, (so mingi ti azo agi pepe fango lege ti Nzapa na Satan ayeke sala kusala mingi na sese ge), azo kue ayeke na yâ mbeni dutingo ti vundu. Bazengele Paul afa peko ti ye ni nzoni: “Ye kue ti création abima na gua ate ala juska fadeso.” (aRomain 8:22) Zo wa alingbi ti ke tene so? Na yâ akodoro ti mosoro nga na ti nzinga, akpale ti sewa, kengo ndia, fango ngbanga na lege ni pepe, akpale na popo ti azo, ti konomi, akengo tele na popo ti akete mara na akete bungbi ti zo, salango ngangu, kobela, na ambeni ye nde mingi, agbanzi siriri ti bibe na azo.
Ndo ti Wara Siriri ti Bibe Dä
Tongana Antônio, Marcos, Gerson, Vania, na Marcelo amanda Tene ti Nzapa, Bible, ala manda ambeni ye so agbian fini ti ala. Na tapande, ala manda so mbeni lâ fade dutingo ti sese ayeke gbian. So ayeke pepe gi mbeni beku tongaso, so fade aye kue ayeke ga nzoni na nda ni. A yeke tâ kpengba mango na bê so Nzapa aleke ti sala mbeni ye teti azo ti sese, na so même fadeso e lingbi ti wara nzoni na ni tongana e sala ye so bê ti lo aye. Ala sala ye alingbi na ye so ala manda na lege ti Bible na yâ fini ti ala, na aye aga nzoni ahon teti ala. Ala wara ngia na siriri mingi ahon ti so ala bi bê ti ala dä kozoni.
Antônio abi tele ti lo mbeni pepe na yâ akengo ye nga na tiri ti azo ti kusala. Lo hinga so aye so aga na peko ti agbiango ye na lege so ayeke na akatikati na a ninga pepe. Ngbele mokonzi ti azo ti kusala so amanda ye na ndo Royaume ti Nzapa. A yeke Royaume so azo kutu mingi asambela ndali ni tongana ala diko Sambela ti Seigneur (wala, Babâ ti E so Ayeke na Yayu) na atene na Nzapa: “Zia royaume ti mo aga.” (Matthieu 6:10a) Antônio amanda so Royaume ti Nzapa ayeke mbeni tâ ngorogbia ti yayu so fade aga na tâ siriri na azo kue.
Marcos amanda ti sala ye alingbi na wango ti ndara ti Bible na ndo tene ti mariage. Tongana ye ti pekoni, ngbele zo ti poroso so ayeke na ngia fadeso ti kiri ti duti legeoko na wali ti lo. Lo nga lo yeke ku ngoi, so aga ndulu, so fade Royaume ti Nzapa azia na place ti bungbi ti aye ti sese so ayeke na kota bê, na bibe ti kion, mbeni ye nde so ayeke nzoni ahon. Lo gbu nzoni ahon nda ti tene na yâ Sambela ti Seigneur so atene: “Zia a sala na sese ye so bê ti mo aye legeoko tongana a sala ni na yayu.” (Matthieu 6:10b, NW) Na ngoi so a yeke sala ande ye so bê ti Nzapa aye na sese, fade azo ayeke wara mbeni nzoni fini so a de ti ba ni lâ oko pepe.
Ti Gerson ayeke tongana nyen? Lo yeke mbeni pepe wanzi na zo so atambela kirikiri na ndo nde nde. Fini ti ngbele godobe so ayeke fadeso na nda ni teti lo mu ngangu ti lo ti mu maboko na ambeni zo nde ti wara siriri ti bibe. Tongana ti so aye so afa, mandango Bible nga salango ye alingbi na ye so lo tene alingbi gbian ngangu mingi fini ti mbeni zo teti nzoni.
Siriri ti Bibe na yâ Sese ti Wusuwusu
Na yâ mbaï kue, kota zo na yâ salango si ye so bê ti Nzapa aye aga tâ tene ayeke Jésus Christ, nga tongana azo ayeke manda Bible na aTémoin ti Jéhovah, ala manda ye mingi na ndo lo. Na bï so a dü lo, a-ange ahe abia ti sepela na Nzapa: “Gloire na Nzapa na nduzu ahon kue, na siriri na ndo sese na popo ti azo so lo yeda na ala.” (Luc 2:14, NW) Tongana Jésus akono, lo bi bê ti lo ti sala si fini ti azo aga nzoni ahon. Lo hinga atene ti bê ti ala na lo fa be-nzoni mingi teti azo so asala pasi na ala na azo ti kobela. Nga, a lingbi na atene ti a-ange, lo ga na mbeni siriri ti bibe na azo ti be-ti-molenge. Na hunzingo ti kusala ti lo, lo tene na adisciple ti lo: “Mbi zia siriri na i; Mbi mu siriri ti Mbi na i. Mbi mu siriri na i pepe tongana so sese so amu na i. I zia bê ti i agi i pepe, na i zia mbito asala bê ti i pepe.”—Jean 14:27.
Jésus ayeke pepe gi zo so agi ti maï nzoni duti ti mba ti lo. Lo haka tele ti lo na mbeni berger, na lo haka adisciple ti lo so ayeke na be-ti-molenge na angasangbaga tongana lo tene: “Mbi ga si ala lingbi wara fini, na si fini so alingbi wu mingi na ala. Mbi yeke Nzo Berger. Nzo berger amu fini ti lo teti angasangbaga ni.” (Jean 10:10, 11) Biani, nde na mingi ti amokonzi ti laso, so abi bê kozoni kue na ala mveni, Jésus amu fini ti lo teti angasangbaga ti lo.
Na lege wa e lingbi ti wara nzoni na yâ ye so Jésus asala? Azo mingi ahinga atene so nzoni: “Nzapa andoye sese so tongaso, lo mu Molenge ti lo ngengele oko, si azo kue so afa na gigi mabe na lo alingbi ti futi ala pepe, me ala yeke na fini ti lakue lakue.” (Jean 3:16, NW) Fango mabe na gigi na yâ Jésus ahunda, kozoni kue, hingango ye na ndo lo nga na ndo Babâ ti lo, Jéhovah. Hingango Nzapa na Jésus Christ alingbi ti gue na mbeni kota songo na Jéhovah Nzapa so ayeke mu ande lege na e ti wara siriri ti bibe.
Jésus atene: “Angasangbaga ti Mbi amä yanga ti Mbi, na Mbi hinga ala, na ala tambela na peko ti Mbi. Mbi mu na ala fini ti lakue lakue, na fade ala kui kete pepe; na zo oko alingbi kpala ala na tïtî Mbi pepe.” (Jean 10:27, 28) So atene ti mungo wâ nga ti dengo bê! Tâ tene, Jésus asala atene so a sala ndulu na angu saki use awe, me ala yeke na ngangu laso tongana ti giriri. Glisa lâ oko pepe so Jésus Christ angbâ lakue na fini nga na kusala, lo komande fadeso tongana Gbia so ayeke na ndo mbata ti Royaume ti Nzapa ti yayu. Legeoko tongana ti so lo yeke giriri na sese a sala angu mingi awe, lo ngbâ lakue ti bi bê na ndo azo ti be-ti-molenge so ayeke na kota nzala ti siriri ti bibe. Na ndo ni, lo ngbâ lakue Berger ti angasangbaga ti lo. Tongana e mu peko ti lo, fade lo mu maboko na e ti wara siriri ti bibe, so andu kungo na beku ti ba na yâ ngoi so ayeke ga tâ siriri: so ti tene fade salango ngangu, bira, na kengo ndia ayeke dä pepe.
Tâ ye ti nzoni aga na lege ti hingango Jéhovah nga na mango na bê so, na lege ti Jésus, fade lo mu maboko na e. Mo dabe mo na Vania, so na ngoi so lo de pendere molenge-wali awara akota kungba na abi bê so Nzapa aglisa lo awe? Fadeso Vania ahinga so Nzapa azia lo pepe. Lo tene: “Mbi manda so Nzapa ayeke tâ zo so ayeke na apendere lengo. Ndoye ti lo apusu lo ti tokua Molenge ti lo na sese ti mu na e fini. A yeke kota ye mingi ti hinga ye so.”
Marcelo ayeda so songo ti lo na Nzapa ayeke tâ ye. Ngbele wasalango matanga so atene: “Fani mingi apendere ahinga pepe ye so ala lingbi ti sala, na nda ni ala sala sioni na ala mveni. Ambeni atï na yâ nyongo mbangi, tongana mbi giriri. Mbi yeke na beku so ala mingi ahon ayeke wara ande deba nzoni, legeoko tongana mbi, na mandango tâ tene na ndo Nzapa nga na Molenge ti lo.”
Na lege ti mandango Bible nzoni, Vania na Marcelo amaï mbeni ngangu mabe na Nzapa nga mbeni ziango bê na yâ dutingo ndulu ti lo ti mu maboko na ala ti leke akpale ti ala. Tongana e sala ye so ala sala la ni, (e manda Bible na e sala ye alingbi na ye so lo tene), fade e yeke wara mbeni kota siriri ti bibe, legeoko tongana ala. Tongaso, wango ti bazengele Paul ayeke lingbi ande biani na e: “I gi bê ti i na ye oko pepe; me na yâ ye kue i fa na Nzapa ye so i ye, na lege ti sambela na ti hunda mingi na tene ti singila. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.”—aPhilippien 4:6, 7.
Warango Tâ Siriri Laso
Jésus Christ ayeke fa ye na azo so ayeke na nzala ti tâ tene na ndo lege so ague na fini ti lakue lakue na yâ mbeni paradis na ndo sese. Na ngoi so lo yeke fa lege na ala ti gue na vorongo Nzapa so ayeke na sioni pepe, ala yeke na mara ti siriri so a fa pekoni na yâ Bible: “Fade azo ti Mbi aduti na ndo ti siriri, na da so akpengba, na ndo ti wo tele.” (Esaïe 32:18) So ayeke gi mbeni kete fä ti siriri so ala yeke wara ni ande. E diko: “Fade azo ti tâ be-ti-molenge awara sese, na biani fade ala wara kota ngia na yâ ti siriri so asi singo. Sese ni aga ye ti héritier ti azo ti mbilimbili, na fade ala duti dä lakue.”—Psaume 37:11, 29, NW.
Tongaso, e lingbi ti wara siriri ti bibe laso? Biani. Na mbage, e lingbi ti hinga na bê kue so na yâ ngoi kete, fade Nzapa ahiri deba nzoni na ndo azo so amä yanga na mungo na ala siriri so aba ni kozoni lâ oko pepe. Tongaso, ngbanga ti nyen ti hunda pepe na lo na yâ sambela ti mu na mo siriri ti lo? Tongana mo yeke na akpale so agbanzi siriri na mo, sambela tongana ti so Gbia David asala giriri: “Vundu ti bê ti mbi awu mingi; lungula mbi na yâ ye ti vundu ti mbi. Ba vundu ti mbi na pono ti mbi; mu pardon na siokpari ti mbi kue.” (Psaume 25:17, 18) Hinga na bê kue so Nzapa amä mara ti asambela tongaso. Lo yôro maboko ti lo na lo mu siriri na azo kue so agi ni na tâ bê ti ala kue. Na ndoye, a dë bê ti e: “Jéhovah ayeke ndulu na azo kue so adi iri ti lo, ndulu na azo kue so adi iri ti lo na dutingo be-ta-zo. Fade lo sala ye alingbi na nzala ti azo so akpe mbito ti lo, na fade lo mä toto ti ala ti hunda mungo maboko, na fade lo sö ala.”—Psaume 145:18, 19, NW.
[Akete Tene na lembeti 5]
Zo ayeke pepe na ndara wala na ngangu ti hinga ye kozoni si gi lo oko lo komande lo mveni, oko maboko so ayeke biani na ngele ngangu alondo na Nzapa
[Akete Tene na lembeti 6]
Hingango ye na ndo Nzapa na Jésus Christ alingbi ti gue na mbeni kota songo na Jéhovah Nzapa so ayeke mu ande lege na e ti wara siriri ti bibe
[Foto na lembeti 7]
Mungo peko ti awango ti Bible aga na fini ti sewa so ayeke na siriri