Mo Yeke Mbeni Chrétien ‘Biazo’?

“NA NGOI so la ni mbi de kete molenge, mbi sala tene tongana kete molenge, mbi bi bê tongana kete molenge, mbi fa nda ti tene tongana kete molenge.” A yeke tene so bazengele Paul asû. Biani, na mbeni ngoi, e kue e yeke aforoto so alingbi sala ye oko pepe. Me, e ngbâ tongaso lakue pepe. Paul atene: “Fadeso mbi ga kota awe, mbi zia lege ti asalango ye ti akete molenge.”​—1 aCorinthien 13:11, NW.

Legeoko nga, aChrétien kue ato nda ni tongana aforoto na lege ti yingo. Me ala kue alingbi ti “si na beoko na yâ mabe nga na tâ hingango ye na ndo Molenge ti Nzapa, ti ga biazo, ti lingbi na mbeni dutingo, so ayeke dutingo so alingbi kue ti Christ.” (aÉphésien 4:13, NW) Na 1 aCorinthien 14:20, a wa e tongaso: “Aita, a lingbi i bi bê ti i pepe tongana amolenge . . . I ga abiazo na lege ti bibe ti i.”

A-Chrétien biazo so akpengba ayeke mbeni deba nzoni teti azo ti Nzapa laso, mbilimbili ngbanga ti so afini zo ayeke mingi. A-Chrétien biazo ayeke mu maboko na kongrégation ti luti ngangu. Ala yeke sala ye ti nzoni na ndo dutingo, wala bibe so amu li ni na yâ kongrégation ni, atä kongrégation so ala yeke dä.

Atä so guengo na li ni na lege ti mitele alingbi ti tambela gi na bê ti lo mveni, guengo na li ni na lege ti yingo ayeke ga gi na peko ti ngoi mingi nga na salango ngangu. A yeke ye ti dongo bê pepe so, na ngoi ti Paul, ambeni Chrétien ‘ague pepe na li ni ti ga biazo,’ atä a sala angu mingi awe so ala yeke sala na Nzapa. (aHébreu 5:12; 6:1) Ti mo a yeke tongana nyen? Atä tongana mo sala na Nzapa teti angu mingi wala gi teti mbeni kete ngoi, a yeke na lege ni ti tene mo gi ti ba mo mveni nzoni. (2 aCorinthien 13:5) Mo yeke na popo ti ala so a lingbi biani ti hiri ala aChrétien so akpengba, wala so ayeke biazo? Tongaso pepe, tongana nyen mo lingbi ti ga ni?

“Abiazo na Lege ti Bibe”

A yeke ngangu pepe teti mbeni foroto na lege ti yingo ti tene ‘mapo ayengi lo mbage na mbage, na apupu kue ti fango ye ahon na lo kirikiri na lege ti handa ti azo, na lege ti mayele ti sigingo na ye ti wataka.’ Ni la, Paul atene: “E maï na ye kue na yâ Christ, Lo so ayeke Li ti Tele.” (aEphésien 4:14, NW; 4:15) Tongana nyen mbeni zo alingbi ti sala tongaso? A-Hébreu 5:14 (NW) atene: “Kobe so akpengba ayeke ti ala so aga biazo, teti ala so, na lege ti salango kusala na ni lakue, aleke angangu ti ala ti gbu nda ti ye, ti hinga popo ti ye ti nzoni na ti sioni.”

Ba so azo so akpengba ayeke na angangu ti gbu nda ti ye so aleke ni na lege ti salango kusala na ni, wala na lege ti aye so asi na yâ fini teti ala bata akpengba-ndia ti Bible. Tongaso, ti ba ni polele, zo ayeke kpengba pepe gi na yâ lango oko; a hunda ngoi mingi ti maï na lege ti yingo. Atä so kue, mo lingbi ti sala mingi ti tene guengo na li ni ti mo na lege ti yingo aduti ngangu pepe, na lege ti mandango ye mo mveni, mbilimbili mandango akpengba ye ti Nzapa. Na yâ angoi so ahon ade ti ninga pepe, Tour ti Ba Ndo asala tene na ndo aye mingi so alï. Azo so akpengba ake pepe amara ti article tongaso teti so a yeke na “ambeni ye so a yeke ngangu ti gbu nda ni.” (2 Pierre 3:16, NW) Nde na so, ala yeke te na loro mara ti kpengba kobe tongaso!

Awafango Tene na Awafango Ye so Ayeke na Wâ

Jésus afa la ni na adisciple ti lo: “Tongaso i gue, i sala si azo na popo ti amara kue aga adisciple, i bâtise ala na iri ti Babâ na ti Molenge na ti yingo ti nzoni-kue, i fa na ala ti bata ye kue so mbi komande na i.” (Matthieu 28:19, 20, NW) Mungo mbage na wâ na kusala ti fango tene alingbi nga ti sala si maïngo ti mo na lege ti yingo ague na li ni hio. Ngbanga ti nyen ti sala ngangu pepe ti mu mbage kue na ni tongana lege azi na mo?​—Matthieu 13:23.

Ngoi na ngoi, akpale ti fini alingbi ti sala si warango ngoi ti fa tene aga ngangu. Ye oko, ‘na gingo lege ngangu’ tongana wafango tene, mo yeke fa na gigi so mo ba na nene ni “nzo tene.” (Luc 13:24; aRomain 1:16) Tongaso, a lingbi ti ba mo tongana ‘tapande ti ala so aduti be-ta-zo.’​—1 Timothée 4:12.

Azo so Aduti Be-biani

Guengo na li ni ti ga biazo ahunda nga salango ngangu ti bata be-biani ti mo. Tongana ti so a fa pekoni na Psaume 26:1, David atene: “O L’Eternel, Mo fâ ngbanga ti mbi teti mbi tambela na lege ti be-biani ti mbi.” Be-biani ayeke ye so ayeke nzoni-kue na lege ti bibe, ye so alingbi kue. Ye oko, a ye pepe ti tene ye so ayeke mbilimbili-kue. David lo mveni asala la ni angangu siokpari mingi. Me, teti so lo yeda tongana azingo na lo, na lo gbian lege ti lo, lo fa so bê ti lo angbâ lakue ti bata tâ ndoye teti Jéhovah Nzapa. (Psaume 26:2, 3, 6, 8, 11) Be-biani andu mungo tele na Nzapa na bê kue, wala so yâ ni akangbi pepe. David atene na molenge ti lo Salomon: “Hinga Nzapa ti babâ ti mo, mo sala na Lo na bê kue.”​—1 Chronique 28:9.

Batango be-biani andu nga dutingo mbage “ti sese so pepe,” dutingo nde na aye ti poroso ti amara na abira ti ala. (Jean 17:16) A lingbi nga mo bata tele ti mo yongoro na asioni salango ye tongana pitan, lango sioni, na nyongo mbangi. (aGalate 5:19-21) Ye oko, batango be-biani aye ti tene ye mingi ahon gi ti ke aye so. Salomon amu gbotongo mê so: “Kuâ ti avuma asala si mafuta ti wa-sala-yambo afü sioni; tongaso kete ye ti buba afuti nzo iri na afuti ndara.” (Zo-ti-fa-tene 10:1) Biani, même “kete ye ti buba,” tongana hengo zo na lege ni pepe wala dutingo lakue na mbeni zo so ayeke koli wala wali ti mo pepe alingbi ti futi nzoni iri ti zo ti “ndara.” (Job 31:1) Ni la, fa na gigi so mo yeke biazo na dutingo tapande na yâ tambela ti mo kue, na ke même “ye ti sioni kue.”​—1 aThessalonicien 5:22.

Azo so Aduti Be-ta-zo

Mbeni Chrétien biazo ayeke nga be-ta-zo. Tongana ti so e diko na aÉphésien 4:24 (NW), bazengele Paul awa aChrétien: “I yü fini zo ti yâ ni so aleke ni giriri na lege ti ye so bê ti Nzapa aye na yâ tâ mbilimbili nga na dutingo be-ta-zo.” Na yâ Mbeti ti Nzapa so asala na yanga ti Grec, tene so asû na ngbele yanga ti kodoro ni teti “dutingo be-ta-zo” andu tene ti dutingo nzoni-kue, mbilimbili, dutingo na kota kpengo mbito. Zo so ayeke be-ta-zo ayeke mu bê ti lo kue na lege ti vorongo ti lo, lo yeke bata Tene ti Nzapa; na mbeni lege so ayeke nzoni, lo bata akungba kue so lo yeke na ni na mbage ti Nzapa.

Ambeni lege so na yâ ni mo lingbi ti maï mara ti dutingo be-ta-zo tongaso ayeke so wa? Mbeni oko ayeke ti sala kusala maboko na maboko na a-ancien ti kongrégation ti mo. (aHébreu 13:17) Na hingango so Christ ayeke lo so a hiri na kusala tongana Beli ti kongrégation ti aChrétien, ala so ayeke biazo ayeke duti be-ta-zo na azo so azia ala “ti duti aberger na ndo kongrégation ti Nzapa.” (Kusala 20:28) A yeke duti ande na lege ni oko pepe ti dë kite wala ti buba ngangu ti komande ti a-ancien so a hiri ala na kusala! A lingbi nga mo yeke na mbeni bibe ti duti be-ta-zo na “ngba ti be-ta-zo na ti ndara” nga na andokua so a yeke sala na kusala ti kangbi “kobe ti ala na tâ ngoi ni.” (Matthieu 24:45, NW) Duti ndulu ti diko na ti sala ye alingbi na atene so a wara na yâ Tour ti Ba Ndo na ambeni mbeti so asigigi legeoko na ni.

Fango Ndoye na Lege ti Akusala ti Mo

Paul asû na mbeti na aChrétien ti Thessalonique: “Ndoye ti i awu mingi na ambeni zo.” (2 aThessalonicien 1:3) Ti kono na lege ti ndoye ayeke mbeni mbilimbili mbage ti maïngo ni na lege ti yingo. Jésus atene na Jean 13:35 (NW): “Na lege so fade azo kue ahinga i yeke adisciple ti mbi, tongana i yeke na ndoye na popo ti i mveni.” A yeke fa pepe mara ti ndoye ti ita tongaso gi na lege ti senge tene ti bibe. Vine’s Expository Dictionary of Old and New Testament Words afa tene so: “A lingbi ti hinga ndoye gi na lege ti akusala so lo yeke fa na gigi.” Biani, mo yeke gue na li ni ti ga biazo na lege so na fango ndoye na yâ kusala!

Na tapande, na aRomain 15:7, e diko: “Teti tene so, i kamata aita ti i, legeoko tongana Christ akamata i nga, teti gloire ti Nzapa.” Mbeni oko lege ti fa ndoye ayeke ti bala na wâ afon mo wamabe nga na afini zo na abungbi ti kongrégation! Gi ti hinga ala mveni. “Gi ye teti ambeni zo.” (aPhilippien 2:4) Peut-être mo lingbi même ti fa na gigi bibe ti yambango agene na ti tisa azo nde nde na da ti mo. (Kusala 16:14, 15) Ngoi na ngoi, awokongo ti ambeni zo alingbi ti tara nengo ti ndoye ti mo, me tongana mo manda ti ‘kanga bê na lege ti ndoye,’ mo fa so mo yeke ga biazo.​—aEphésien 4:2.

Salango Kusala na Aye ti Mosoro ti E ti Maï Vorongo ti Nzoni-kue

Giriri, a yeke azo kue pepe na popo ti azo ti Nzapa si asala ye alingbi na kungba ti ala ti mu maboko na temple ti Jéhovah. Tongaso, Nzapa ato aprophète tongana Haggaï na Malaki ti zingo azo ti Lo na lege so. (Aggée 1:2-6; Malaki 3:10) A-Chrétien biazo laso ayeke sala kusala na ngia na aye ti ala ti ngele ngangu ti mu maboko na vorongo ti Jéhovah. Mu tapande ti azo tongaso na mungo peko ti kpengba-ndia ti 1 aCorinthien 16:1, 2, ‘na batango nde ye so mo wara’ ti mu maboko na kongrégation nga na kusala ti aTémoin ti Jéhovah na ndo sese kue. Tene ti Nzapa amu zendo: “Zo so alu ye mingi, fade lo ko ye mingi nga.”​—2 aCorinthien 9:6.

Kanga lê nga pepe na ndo ambeni ye ti ngele nde so mo yeke na ni, tongana ngoi na ngangu ti mo. Tara ti “vo ngoi” na ndo akusala so ayeke kota ye mingi pepe. (aEphésien 5:15, 16; aPhilippien 1:10) Manda ti sala kusala nzoni mingi ahon na ngoi ti mo. Salango tongaso alingbi ti mu lege na mo ti mu mbage na apialo ti Lekengo Ada ti Royaume nga na ambeni kusala nde tongaso, so ayeke maï vorongo ti Jéhovah. Salango kusala tongaso na aye ti mo ti ngele ayeke mu lege na mo ti ba polele so mo yeke gue na li ni ti ga mbeni Chrétien biazo.

Gue na Li ni Ti Ga Biazo!

Akoli na awali so abi bê nzoni ti manda ye na ti gbu nda ti ye, so ayeke awafango tene na wâ, so ayeke mbilimbili-kue na yâ be-biani ti ala, so ayeke be-ta-zo na ayeke na ndoye, nga so ayeke ndulu ti mu maboko na lege ti mitele na ti mosoro na kusala ti Royaume, ayeke biani kota deba nzoni. Tongaso, a yeke na lege ni si bazengele Paul amu wango so: “Nda ni la, teti fadeso e zia awe kozo gere ti tene ti mabe so andu Christ, zia e gue na li ni ti ga biazo”!​—aHébreu 6:1.

Mo yeke mbeni Chrétien biazo, so akpengba? Wala, na ambeni lege, mo yeke tongana mbeni foroto na lege ti yingo? (aHébreu 5:13) Atä ye ni ayeke tongana nyen, leke na bê ti mo ti bi bê nzoni na ye so mo yeke manda, ti fa tene na ti fa ndoye na aita ti mo. Yeda na awango nga na sengo ndo kue so abiazo amu na mo. (aProverbe 8:33) Yö kungba ti mo kue ti Chrétien. Na peko ti ngoi nga na salango ngangu, mo nga mo lingbi ti “si na beoko na yâ mabe nga na tâ hingango ye na ndo Molenge ti Nzapa, ti ga biazo, ti lingbi na mbeni dutingo, so ayeke dutingo so alingbi kue ti Christ.”​—aÉphésien 4:13, NW.

[Afoto na lembeti 5]

Azo so ayeke biazo ayeke mu maboko na bibe ti kongrégation na bingo bê na ndo ambeni zo