Kota ti Ndoye ti Mo Asi na ndo Wa?

“A lingbi mo ndoye mba ti mo tongana mo mveni.”​—MATTHIEU 22:39, NW.

1. Tongana e ndoye Jéhovah, ngbanga ti nyen a lingbi e ndoye nga zo so ayeke ndulu na e?

TONGANA a hunda la ni na Jésus komandema wa ayeke kota ahon, lo kiri tene: “A lingbi mo ndoye Jéhovah Nzapa ti mo na bê ti mo kue, na âme ti mo kue, nga na bibe ti mo kue.” Na pekoni, lo diko peko ti use komandema ni so akpa tele na ti kozoni: “A lingbi mo ndoye mba ti mo tongana mo mveni.” (Matthieu 22:37, 39, NW) Tâ tene, ndoye teti zo so ayeke ndulu na e ayeke ye so amu lege ti hinga na atâ Chrétien. Biani, tongana e ndoye Jéhovah a lingbi e ndoye nga zo so ayeke ndulu na e. Ngbanga ti nyen? Teti e yeke fa ndoye ti e na mbage ti Nzapa na batango Tene ti lo, na Tene ti lo amu yanga na e ti ndoye zo so ayeke ndulu na e. Ni la, tongana e ndoye pepe aita ti e ti koli na ti wali, ndoye ti e teti Nzapa alingbi pepe ti duti tâ ndoye.​—aRomain 13:8; 1 Jean 2:5; 4:20, 21.

2. A lingbi e duti na mara ti ndoye wa teti zo so ayeke ndulu na e?

² Tongana Jésus atene a lingbi e ndoye zo so ayeke ndulu na e, lo sala tene ti ye mingi ahon gi salango kamarade. Na lo yeke sala la ni tene ti mbeni ndoye so ayeke nde na ti so ayeke duti ka na popo ti azo ti sewa oko wala na popo ti mbeni koli na wali. Lo yeke sala tene ti mara ti ndoye so Jéhovah ayeke na ni teti awakua so amu tele kue na lo, nga ndoye so ala yeke na ni na mbage ti lo. (Jean 17:26; 1 Jean 4:11, 19) Mbeni Juif so ayeke scribe, so, tongana ti so Jésus aba, ayeke sala tene na lege ti ndara, ayeda na Jésus so a lingbi zo andoye Nzapa na ‘bê ti lo kue, na âme ti lo kue, na bibe ti lo kue, na ngangu ti lo kue!’ (Marc 12:28-34) Tene ti lo ayeke na lege ni. Ndoye so Chrétien agi ti lë teti Nzapa nga teti zo so ayeke ndulu na lo andu atene so agbu bê nga na hingango ye ti e. Gunda ni alondo na bê, na a yeke bibe si afa lege na ni.

3. (a) Tongana nyen Jésus afa na mbeni “maître ti ndia” so a lingbi lo kono yâ ti bango ndo ti lo na mbage ti zo so ayeke ndulu na lo? (b) Tongana nyen toli ti Jésus andu nga aChrétien laso?

³ Tongana ti so Luc afa pekoni, tongana Jésus atene a lingbi e ndoye zo so ayeke ndulu na e, “mbeni maître ti ndia” ahunda: “Zo so ayeke ndulu na mbi ayeke zo nyen?” Jésus akiri tene na lege ti toli. A pika mbeni koli, a nzi aye ti lo, na a zia lo ndulu na kuâ na tele ti lege. Kozoni mbeni prêtre ahon na tele ti lo, na pekoni mbeni Lévite. Ala use kue ake ti bi lê na ndo lo. Na nda ni, mbeni zo ti Samarie ahon na lege so, lo ba koli so azo asala sioni na lo, na lo sala ye na lege ti kota nzobe na mbage ti koli ni. Na popo ti azo ota so, zo wa ayeke ndulu na koli so awara akota kä? Kiringo tene ni ayeke polele. (Luc 10:25-37) Peut-être bê ti maître ti Ndia aso ti mä Jésus na tenengo so mbeni zo ti Samarie alingbi ti duti ndulu na zo nzoni ahon mbeni prêtre nga na Lévite. A yeke polele so Jésus ayeke mu maboko na koli ni ti ndoye zo so ayeke ndulu na lo na mbeni lege so ayeke kota mingi ahon. A-Chrétien nga andoye na lege so. Ba azo kue so ndoye ti aChrétien andu ala.

Ndoye na yâ ti Sewa

4. Na ndo wa a lingbi kozoni kue Chrétien afa ndoye na gigi?

⁴ A-Chrétien andoye azo ti yâ ti sewa ti ala: awali andoye akoli ti ala, akoli andoye awali ti ala, na ababâ na mama andoye amolenge ti ala. (Zo-ti-fa-tene 9:9; aEphésien 5:33; Tite 2:4) Tâ tene, akamba ti ndoye so ayeke duti ka na yâ ti asewa mingi. Ye oko, atondo na ndo amariage so abuba, salango ngangu na koli wala wali ti da, batango nzoni pepe amolenge wala salango ngangu na ala afa so sewa ayeke na gbe ti kpale laso, na peut-être abibe so ayeke duti ka na yâ ti sewa alingbi pepe ti bata ni na ndo oko. (2 Timothée 3:1-3) Ti tene fini ti ala ti sewa atambela biani nzoni, a lingbi aChrétien afa na gigi mara ti ndoye so Jéhovah na Jésus ayeke na ni.​—aEphésien 5:21-27.

5. Ababâ na mama abi lê na mbage ti zo wa ti wara maboko na yâ batango amolenge ti ala, na ye nyen asi na mingi ti ala na nda ni?

⁵ Ababâ na mama so ayeke aChrétien ayeke ba amolenge ti ala tongana mbeni ye ti ngele so Jéhovah azia na maboko ti ala ti bata, na ala yeke bi lê na mbage ti lo ti wara maboko na yâ fango ye na amolenge ni. (Psaume 127:3-5; aProverbe 22:6) Na lege so, ala yeke lë ndoye ti aChrétien, so amu maboko na ala ti bata amolenge ti ala yongoro na aye ti sioni so alingbi ti sala ngangu na ndo ala na so apendere alingbi ti tï na yâ ni. Ye ti pekoni ayeke so, ababâ na mama mingi so ayeke aChrétien awara mara ti ngia so asi na mbeni mama na Pays-Bas. Na peko ti so lo ba batême ti molenge ti lo ti koli, oko ti azo 575 so awara batême na Pays-Bas na ngu so ahon, lo sû atene so na mbeti: “Na ndembe ni so, mbi wara futa ti angangu kue so mbi sala na yâ ti angu 20 so ahon awe. Angoi na angangu kue, nga na asongo bê, ngangu kua, na avundu so mbi ba ti bata na lo, aga ngbele ye awe.” Ba tongana nyen lo yeke na tâ ngia ti ba so molenge ti lo asoro na bê ti lo mveni ti sala na Jéhovah. Na yâ ti kota wungo ti awafango tene 31 089 so adiko ala na Pays-Bas na ngu so ahon, a yeke wara ala mingi so ababâ na mama ti ala afa na ala ti ndoye Jéhovah.

6. Tongana nyen ndoye ti Chrétien alingbi mu maboko ti kpengba kamba ti mariage?

⁶ Paul adi iri ti ndoye “kamba so alingbi kue so asala si i ga oko,” na a lingbi ti bata kamba ti mariage atä na yâ ti angoi ti ngangu. (aColossien 3:14, 18, 19, NW; 1 Pierre 3:1-7) Na Rurutu, mbeni kete zoa so ayo akilomètre 700 na Tahiti, tongana mbeni koli ato nda ti manda Bible na aTémoin ti Jéhovah, wali ti lo ake ni ngangu. Na nda ni, wali ni amu amolenge, lo londo, na lo gue ti sala kodoro na Tahiti. Ye oko, koli ni afa ndoye teti wali ti lo na tokuango nginza lakue nga na hiringo lo na lege ti singa ti hunda wala mbeni ye atia lo na amolenge ni. Tongaso, lo sala ngangu kue ti yö akungba ti lo ti Chrétien. (1 Timothée 5:8) Lo sambela lakue ti tene sewa ti lo akiri aduti na ndo oko, na nda ni, wali ti lo akiri. Tongana lo kiri awe, koli ni asala ye na mbage ti lo na “ndoye, gbungo ngangu, tâ be-ti-molenge.” (1 Timothée 6:11) Na ngu 1998, koli so awara batême na lo wara ngia mingi na pekoni tongana wali ti lo ayeda ti manda Bible. Mandango ye so aduti oko ti amandango ye 1 351 so a mu li ni dä na yâ territoire so ayeke na gbe ti filiale ti Tahiti na ngu so ahon.

7. Na lege ti tene ti mbeni koli na Zamani, ye nyen akpengba mariage ti lo?

⁷ Na sese ti Zamani mbeni koli ayeda oko pepe na nzala ti wali ti lo ti manda tâ tene ti Bible, na lo bi bê biani so aTémoin ti Jéhovah aye ti handa wali ti lo. Ye oko, na pekoni, lo tokua mbeti na ita-wali so atingbi kozoni na wali ti lo: “Singila na mo mingi so mo fa aTémoin ti Jéhovah na wali ti mbi. Kozoni, mbi yeke gi bê ti mbi teti mbi mä asioni tene mingi na ndo ala. Me fadeso, na peko ti so mbi na wali ti mbi e gue na abungbi, mbi ba tongana nyen mbi glisa lege la ni ngangu mingi. Mbi hinga so mbi yeke mä tâ tene, na a sala si mariage ti e akiri akpengba mingi ahon.” Na popo ti aTémoin ti Jéhovah 162 932 so ayeke na Zamani, nga ala 1 773 so ayeke na ndo azoa so ayeke na gbe ti filiale ti Tahiti, a yeke wara asewa mingi so ndoye ti Nzapa abungbi ala na ndo oko.

Ndoye Teti Aita ti E Chrétien

8, 9. (a) Zo wa afa na e ti ndoye ita ti e, na ndoye apusu e ti sala nyen? (b) Mu mbeni tapande ti fa tongana nyen ndoye alingbi pusu aita ti mu maboko na popo ti ala.

⁸ Paul atene na aChrétien ti Thessalonique: “Nzapa afa na i ti ndoye tele ti i na ambeni zo.” (1 aThessalonicien 4:9) Tâ tene, ala so ‘Jéhovah afa ye na ala’ andoye tele na popo ti ala. (Esaïe 54:13) Ala yeke fa ndoye ti ala na lege ti kusala, tongana ti so Paul afa tongana lo tene: “I sala boi na popo ti i na lege ti ndoye.” (aGalate 5:13; 1 Jean 3:18) Na tapande, ala yeke sala tongaso na ngoi so ala gue ti ba aita ti koli na ti wali so tele ti ala aso, na ngoi so ala yeke wa azo so bê ti ala asui, nga tongana ala mu maboko na ala so anze. (1 aThessalonicien 5:14) Tâ ndoye ti e ti Chrétien amu maboko ti kono paradis ti e ti yingo.

⁹ Na yâ Kongrégation ti Ancón, oko ti akongrégation 544 so ayeke na Équateur, aita afa na gigi ndoye ti ala na lege ti kusala. Mbeni kpale ti konomi asala si ala glisa kusala ti ala, wala ala wara nginza nze na nze mbeni pepe, tongaso awafango tene aleke ti wara nginza na kango kobe na awagbotongo susu ti ndo ni, tongana ala kiri na kodoro na peko ti so ala gi susu na bï kue. Zo kue amu maboko, amolenge nga. A lingbi ala to nda ni na ngbonga oko ti ndapelele si tongana a ga ti si na ngbonga osio ti ndapelele kobe ti ala amu awe na ngoi so awagbotongo susu akiri. A kangbi nginza so aita awara na popo ti ala, a lingbi na ye so atia zo oko oko. Mara ti mungo maboko na popo ti tele tongaso afa na gigi tâ ndoye ti aChrétien.

10, 11. Tongana nyen e lingbi ti fa ndoye teti aita so e mveni e hinga ala pepe?

¹⁰ Ye oko, ndoye ti e aluti pepe gi na ndo aChrétien so e hinga ala. Bazengele Pierre atene: “I ndoye sewa ti aita kue.” (1 Pierre 2:17, NW) E ndoye aita ti e ti koli na ti wali kue ngbanga ti so ala kue ayeke afon e wavorongo Jéhovah Nzapa. Angoi ti kpale alingbi ti zi lege ti fa na gigi ndoye tongaso. Na tapande, na ngoi ti ngu ti kusala 2000, angu so asuku ngangu asala ye ti sioni mingi na Mozambique, nga mbeni bira so angbâ lakue ti tambela na popo ti azo ti kodoro oko na Angola asala si azo mingi aga wanzinga. Aye so andu mbeni kota wungo ti aita 31 725 na Mozambique nga ala 41 222 na Angola. Tongaso, aTémoin so ayeke na Afrika ti Mbongo so ayo pepe atokua gbâ ti akungba ti kaï mbage ti vundu ti aita ti ala na yâ akodoro so. Dutingo ti ala ndulu ti sala kusala na “ye mingi” ti ala ti mu maboko na aita ti ala so ye atia ala afa na gigi ndoye ti ala.​—2 aCorinthien 8:8, 13-15, 24.

¹¹ A yeke ba ndoye nga, na ngoi so aita na yâ ti akodoro mingi amu maboko ti tene aleke aDa ti Royaume na ti Assemblée na yâ ti akodoro so ague na li ni mingi pepe. Mbeni tapande ni ayeke na aZoa ti Salomon. Atä so wuluwulu ayeke dä mingi, aZoa ti Salomon awara mbeni guengo na li ni ti awafango tene 6 na ndo ti ngbangbo oko na ngu so ahon, na asi na kota wungo ti 1 697. Ala ye la ni ti leke mbeni Da ti Assemblée. Atä so azo mingi ti kodoro ni ayeke kpe zoa ni, azo so amu tele ti ala mveni ti sala kusala alondo na Australie ague kâ ti mu maboko na yâ lekengo da ni. Na nda ni, a lingbi azo so ague ti sala kua kâ akiri na ndo ti ala, me pepe kozoni si ala fa na aita ti ndo ni lege ti hunzi gere ti da ni. Aita ti Australie atokua awen so ala leke kozoni awe ti salango na da ni, na tongana ahunzi ande nzoni da so, da so aleke teti vorongo, fade a yeke duti mbeni pendere tene ti témoin na iri ti Jéhovah nga teti ndoye ti aita, na ngoi so apialo mingi ti lekengo da aluti na kodoro ni.

Legeoko na Nzapa, E Ndoye Sese

12. Tongana nyen e yeke mu tapande ti Jéhovah na yâ bango ndo ti e na mbage ti ala so akangbi pepe mabe ti e?

¹² Ndoye ti e aluti gi na sewa ti e nga na aita ti e? Pepe, tongana e yeke “azo so amu tapande ti Nzapa.” Jésus atene: “Nzapa andoye sese so tongaso, lo mu Molenge ti lo ngengele oko, si azo kue so afa na gigi mabe na lo alingbi ti futi ala pepe, me ala yeke na fini ti lakue lakue.” (aÉphésien 5:1, NW; Jean 3:16, NW) Legeoko na Jéhovah Nzapa, e yeke sala ye na lege ti ndoye na mbage ti azo kue, na a ndu nga ala so akangbi pepe mabe ti e. (Luc 6:35, 36; aGalate 6:10) Na ndo tene so mbilimbili, e yeke fa nzo tene ti Royaume na e yeke fa na azo kota kusala ti ndoye ti lo na mbage ti ala. Ye so alingbi ti ga na salut na zo kue so amä.​—Marc 13:10; 1 Timothée 4:16.

13, 14. Atä so a lingbi ti ga na kpale na ala, ambeni ye so asi teti so aita afa ndoye na azo so ayeke aTémoin pepe ayeke so wa?

¹³ Ba tapande ti awakua pionnier spécial osio na Népal. A tokua ala na yâ mbeni gbata na mbongo-do ti kodoro ni, na teti angu oku so aga na pekoni, ala fa ndoye ti ala na salango tene ti témoin na be-nze-pepe na yâ kodoro ni nga na yâ akete kodoro so ayeke na tele ni. Ti sala kusala na yâ territoire ti ala kue, mingi ni ala yeke gue na tambela teti angbonga mingi na vélo na ngoi so ndo amu wâ juska 40°. Ndoye ti ala nga na “kusala ti nzoni so bê ti ala anze dä pepe” alë anzoni lengo tongana mbeni bungbi ti mandango buku aba gigi na yâ oko ti akete kodoro so. (aRomain 2:7) Na nze ti mars 2000, azo 32 aga ti mä mbeni diskur teti azo kue na ngoi ti vizite ti surveillant ti circonscription. Népal ayeke na kota wungo ti awafango tene 430 na ngu so ahon, mbeni guengo na li ni ti 9 na ndo ngbangbo oko. A yeke polele so Jéhovah ayeke deba nzoni na ndo wâ nga na ti ndoye ti aita na kodoro so.

¹⁴ Na Colombie ambeni pionnier spécial so asala kusala ni gi teti mbeni ngoi ague ti fa tene na popo ti aIndien Wayuu. Ti sala ni, a lingbi ala manda mbeni fini yanga, me bingo bê ti ndoye so ala yeke na ni alë lengo tongana, atä so kota ngu apika, azo 27 ague na mbeni diskur teti azo kue. Mara ti ndoye ti wâ tongana ti so apionnier so afa na gigi amu maboko ti wara mbeni guengo na li ni ti 5 na ndo ngbangbo oko na Colombie nga mbeni kota wungo ti awafango tene 107 613. Na Danemark mbeni ita-wali so aga kangba awe aye ti fa nzo tene na ambeni zo, me mbage ti tele ti lo anze. Na bê so akpengba, lo gi ti tingbi na azo so asala nzala ti tene ni na sungo ambeti na ala. Fadeso, lo yeke sû mbeti lakue na azo 42 na lo mu li ni na yâ ti amandango Bible 11. Lo yeke oko ti kota wungo ti awafango tene 14 885 so abi rapport na Danemark na ngu so ahon.

Ndoye Awato ti Mo

15, 16. (a) Jésus atene a lingbi kota ti ndoye ti e asi na ndo wa? (b) Tongana nyen aita-koli so ayeke na kungba asala ye na ndoye na mbeni zo so abi atene ti wataka na li ti aTémoin ti Jéhovah?

¹⁵ Jésus atene na maître ti Ndia ni so a lingbi ti ba mbeni zo ti Samarie tongana zo so ayeke ndulu na lo. Na yâ Fango ye ti lo na ndo Hoto, Jésus ague na li ni mingi ahon tongana lo tene: “I mä so a tene giriri, ‘A lingbi mo ndoye zo so ayeke ndulu na mo na a lingbi mo ke wato ti mo.’ Ye oko, mbi tene na i: I ngbâ ti ndoye awato ti i nga ti sambela teti ala so asala ngangu na i; si i lingbi fa biani so i yeke amolenge ti Babâ ti i so ayeke na yayu.” (Matthieu 5:43-45, NW) Atä tongana mbeni zo ake e, e yeke tara ti “hon ndo ti sioni na lege ti ye ti nzoni.” (aRomain 12:19-21) Tongana lege ayeke dä, e yeke fa na lo ye ti ngele mingi ahon so e yeke na ni, tâ tene.

¹⁶ Na Ukraine, mbeni mbeti-sango (Kremenchuk Herald) atene aTémoin ti Jéhovah ayeke mbeni secte ti sioni mingi. A yeke la ni kota tene mingi teti na Poto ambeni zo ayeke sala mara ti tene tongaso na ndo ti aTémoin ti Jéhovah ti pusu azo ti yeda so a lingbi a zia akatikati na ndo akusala ti aTémoin wala a kanga lege na ni biaku. Ye oko, a ga ndulu na wayinda ti mbeti-sango ni na a hunda lo ti sigigi na mbeni mbeti ti kiri ti leke article ni. Lo yeda, me tongana a sigigi awe, lo tene so kozo article ni aluti biani na ndo ti tâ ye. Tongaso ambeni ita-koli so ayeke na akungba akiri aga ndulu na lo, na ambeni sango mingi ahon. Na nda ni, lo ba so kozo article ni ayeke na lege ni pepe, na lo sigigi na mbeti ti sanzé yanga ti lo. Salango ye na mbage ti lo polele nga na nzobe ayeke la ni lege ti ndoye ti leke tene ni, na aga na ye ti nzoni na pekoni.

Tongana Nyen E Lingbi ti Lë Ndoye?

17. Ye nyen afa so ngoi na ngoi a lingbi ti duti ngangu ti sala ye na ndoye na mbage ti ambeni zo?

¹⁷ Tongana a dü mbeni foroto, fade fade ababâ na mama ti lo ato nda ti ndoye lo. Me salango ye na akota zo na lege ti ndoye ayeke ga pepe lakue gi hio tongaso. A lingbi ti tene so a yeke ngbanga ni si fani mingi Bible atene na e ti ndoye tele na popo ti e, a yeke mbeni ye so a lingbi e gi ti lë ni. (1 Pierre 1:22; 4:8; 1 Jean 3:11) Jésus ahinga la ni so fade ndoye ti e ayeke si na gbele tara tongana lo tene so a lingbi e mu pardon na ita ti e “juska lege bale mbasambala na ndo ni mbasambala.” (Matthieu 18:21, 22, NW) Paul nga awa e ti “ngbâ lakue ti kanga bê na popo ti e.” (aColossien 3:12, 13, NW) A yeke senge pepe si a tene na e: “I tambela na peko ti ndoye”! (1 aCorinthien 14:1) E lingbi ti sala ni tongana nyen?

18. Fade ye nyen amu maboko na e ti lë ndoye teti ambeni zo?

¹⁸ Kozoni, e lingbi lakue ti bata na li ndoye so e yeke na ni teti Jéhovah Nzapa. Ndoye so ayeke mbeni kpengba ye so apusu e ti ndoye zo so ayeke ndulu na e. Ngbanga ti nyen? Ngbanga ti so tongana e sala tongaso, a yeke ga na ye ti nzoni na ndo iri ti Babâ ti e ti yayu nga aga na lo gloire na sepela. (Jean 15:8-10; aPhilippien 1:9-11) Use ni, e lingbi ti tara ti ba aye tongana ti so Jéhovah ayeke ba ni. Na ngoi kue so e sala siokpari, e sala siokpari na mbage ti Jéhovah; ye oko, fani mingi lo mu pardon na e na lo ngbâ ti ndoye e. (Psaume 86:5; 103:2, 3; 1 Jean 1:9; 4:18) Tongana e lë bango ndo ti Jéhovah, fade e yeke duti ndulu ti ndoye ambeni zo na ti mu pardon teti aye ti songo bê so ala sala na e. (Matthieu 6:12) Ota ni, e lingbi ti sala ye na ambeni zo tongana ti so e ye ala sala na e. (Matthieu 7:12) Teti so e yeke mbilimbili-kue pepe, fani mingi e hunda ti tene a mu pardon na e. Na tapande, tongana e sala mbeni tene so aso bê ti ambeni zo, e yeke na beku so fade ala dabe ala so azo kue ayeke sala siokpari ngoi na ngoi na menga ti ala. (Jacques 3:2) Tongana e ye si azo asala ye na e na lege ti ndoye, a lingbi e sala nga na ala na lege ti ndoye.

19. Tongana nyen e lingbi ti gi ti wara mungo maboko ti yingo ti nzoni-kue ti lë ndoye?

¹⁹ Ti osio ni, e lingbi ti gi mungo maboko ti yingo ti nzoni-kue teti ndoye ayeke mbeni mbage ti lengo ti yingo. (aGalate 5:22, 23) Mingi ni, songo ti kamarade, bingo bê na zo ti yâ ti sewa, nga ndoye na popo ti koli na wali ayeke ga gi lo oko tongaso. Me e hunda ti wara maboko ti yingo ti Jéhovah ti lë ndoye so Jéhovah ayeke na ni, ndoye so ayeke kamba so alingbi kue so asala si i ga oko. E lingbi ti gi mungo maboko ti yingo ti nzoni-kue na dikongo Bible so asû na gbe ti yingo. Na tapande, tongana e manda fini ti Jésus, fade e ba tongana nyen lo sala ye na azo, na e lingbi ti manda ti mu tapande ti lo. (Jean 13:34, 35; 15:12) Na ndo ni, e lingbi ti hunda Jéhovah ti mu na e yingo ti nzoni-kue, mbilimbili na yâ ti aye so asala si a yeke ngangu teti e ti sala ye na lege ti ndoye. (Luc 11:13) Na nda ni, e lingbi ti tomba peko ti ndoye na ngbango ndulu na kongrégation ti aChrétien. Dutingo na aita-koli nga na aita-wali so ayeke na ndoye ayeke mu maboko na e ti lë ndoye.​—aProverbe 13:20.

20, 21. Pendere fango ndoye na gigi wa aTémoin ti Jéhovah asala na ngu ti kusala ti 2000?

²⁰ Na ngu so ahon, a wara kota wungo 6 035 564 ti awafango nzo tene na ndo sese kue. A-Témoin ti Jéhovah amu angbonga kue 1 171 270 425 ti gi azo ti fa na ala nzo tene so. A yeke ndoye si apusu ala la ni ti gbu ngangu tongana ndo amu wâ, tongana ngu apika, na tongana dê asala na ngoi so ala gue na kusala so. A yeke ndoye si apusu ala la ni ti sala tene na akamarade ti ekole na ti ndo ti kusala nga ti ga ndulu na azo so ala hinga ala lâ oko pepe na ndo ti alege na ambeni ndo nde. Mingi ti azo so aTémoin asala vizite na ala asala pepe nzala ti tene ni, ambeni ake. Ye oko, ambeni afa so ala sala nzala ti tene ni, na tongaso a sala afini vizite 433 454 049 na a mu li ni na amandango Bible 4 766 631.a

²¹ Ba tongana nyen aye so kue afa na gigi la ni ndoye so aTémoin ti Jéhovah ayeke na ni teti Nzapa ti ala nga teti zo so ayeke ndulu na ala! Ndoye tongaso ayeke ga dê lâ oko pepe. E hinga na bê kue fade a sala tene ti témoin mingi ahon na azo na ngu ti kusala ti 2001. Zia si deba nzoni ti Jéhovah angbâ na ndo awavorongo lo so ayeke be-ta-zo nga na wâ na ngoi so ala ‘sala ye kue na lege ti ndoye’!​—1 aCorinthien 16:14.

[Kete Tene na Gbe Ni]

Mo Lingbi ti Fa Nda Ni?

• E yeke mu tapande ti zo wa tongana e ndoye zo so ayeke ndulu na e?

• A lingbi kota ti ndoye ti e asi na ndo wa?

• Ambeni ye wa so asi afa na gigi ndoye ti aChrétien?

• Tongana nyen e lingbi ti lë ndoye ti aChrétien?

[Tableau na lembeti 28-31]

TONDO TI ATÉMOIN TI JÉHOVAH TI NDO SESE KUE TETI NGU TI KUSALA 2000

(Ti ba tene ni mbilimbili, ba périodique ni)

[Afoto na lembeti 25]

Ndoye ti Chrétien alingbi ti bata sewa na ndo oko

[Afoto na lembeti 26]

Ndoye apusu e ti kangbi beku ti e na ambeni zo