Nzo Tene ti Royaume: Ayeke Nyen?

Na ngu so ahon, na yâ ti akodoro 235 na ndo sese, azo 6 035 564, apendere na ambakoro, amu angbonga 1 171 270 425 ti sala tene ti ye ni so na azo. Na ndo fango tene ni na yanga, ala zia na maboko ti azo ambeti ahon kutu 700 ti gboto lê na ndo ni nga ti fa nda ti ye ni so na ala. Ala kangbi nga akasete ti mango ni na akasete vidéo saki mingi na azo ti sala si tene ti ye ni so amu ndo kue. “Ye ni so” ayeke nyen?

“YE NI so” ayeke nzo tene ti Royaume ti Nzapa. Biani, kozoni na yâ mbaï ti azo a fa “nzo tene ti royaume” lâ oko pepe na mara ti lege so e yeke ba na ngoi ti e.​—Matthieu 24:14.

Azo kue so ayeke sala kusala ti fango tene na ti fango nda ti ye so na ndo sese mobimba ayeke azo so asala ni na bê ti ala mveni, a futa ye na ala pepe. Na lege ti bango ndo ti sese, peut-être a tene so ala lingbi nzoni pepe na kusala ni. Ye oko, ye nyen amu na ala bê so akpengba nga lege ti lë lengo? Ngangu ti nzo tene ti Royaume ayeke mbeni kota mbage ni, teti a yeke sango na ndo ti adeba nzoni so azo ayeke wara ande. Ala yeke adeba nzoni so azo kue ayeke ku ni kungo: kota ngia, hunzingo ti kpale ti konomi, nzoni ngorogbia, siriri na nzoni dutingo, nga mbeni ye nde so a yeke ngangu na azo mingi ti yeda na ni: fini ti lakue lakue! So ayeke biani nzo tene teti azo so ayeke gi ti hinga nda ti fini. Biani, mo lingbi ti wara adeba nzoni so kue nga na ambeni tongana mo yeda na mo sala ye nzoni na gbe ti fango nzo tene ti Royaume ni.

Royaume Ayeke Nyen?

Ye oko, Royaume so a yeke fa tongana nzo tene ayeke nyen? A yeke Royaume so a fa na azo kutu mingi ti sambela ndali ni na lege ti atene so a hinga ala nzoni: “Babâ ti e so mo yeke na yayu, zia iri ti mo aga nzoni-kue. Zia royaume ti mo aga! Zia a sala na sese ye so bê ti mo aye legeoko tongana a sala ni na yayu!”​—Matthieu 6:9, 10, NW.

A yeke Royaume so prophète Daniel so ayeke mbeni Hébreu asala tene ni ahon asiècle 25 kozoni. Lo tene: “Fade Nzapa ti yayu ayä royaume so afuti lâ oko pepe, na Lo zia royaume ni na tïtî ambeni zo nde pepe; me fade royaume so afâ mbeni royaume so kue ndulu ndulu, na a sala si royaume nde nde so kue awe; na fade royaume so angbâ lakue lakue.”​—Daniel 2:44.

Tongaso, nzo tene ni ayeke na ndo ti Royaume, wala ngorogbia, ti Nzapa so na lege ni fade ayeke lungula sioni kue nga na pekoni a yeke komande na ndo ti sese kue na yâ ti siriri. Fade lo yeke sala si ye so Wasalango ye aleke ti sala giriri kozoni teti azo nga teti sese ayeke ga tâ tene.​—Genèse 1:28.

“Royaume ti Yayu Ayeke Ndulu”

Ndulu na angu 2000 awe, mbeni koli so amu tele ti lo na Nzapa na so yungo bongo ti lo nga na salango ye ti lo agboto lê ti azo mingi afa kozoni nzo tene ti Royaume. Koli so ayeke Jean Wabatizengo zo, molenge ti Zekaria, prêtre Juif, na wali ti lo, Élisabeth. Jean ayü la ni mbeni bongo so asala na kuä ti tele ti zambala, na mbeni ceinture so asala na poro ti nyama ayeke na mbunda ti lo, legeoko tongana prophète Elisha, so aduti la ni fä ti lo. Ye oko, a yeke tokua ti lo si agboto giriri lê ti azo mingi. Lo tene: “I gbian bê ti i, teti royaume ti yayu ayeke ndulu.”​—Matthieu 3:1-6.

Azo so amä la ni Jean ayeke aJuif, so atene ala yeke awavorongo tâ Nzapa, Jéhovah. Tongana mbeni mara, Nzapa amu na ala mbele ti Ndia na lege ti Moïse ndulu na angu 1 500 kozoni. Pendere temple ni angbâ lakue na Jérusalem, na ndo so a mu asadaka alingbi na ye so Ndia ahunda. A-Juif abi bê ti ala so lege ti vorongo ti ala ayeke mbilimbili na lê ti Nzapa.

Ye oko, na mango Jean, ambeni zo ato nda ti ba so lege ti vorongo ti ala ayeke pepe ye so ala bi bê ti ala dä kozoni. Angobo ti salango ye nga na senda-ndara ti aGrec alï na yâ ti afango ye ti aJuif. Atene ti mabe nga na angobo ti salango ye ti azo agbian yâ ti ndia so Nzapa amu na ala na lege ti Moïse, na a sala si a yeke na ngangu mbeni pepe. (Matthieu 15:6) Teti so amokonzi ti lege ti vorongo ti ala so ayeke na sioni bê na so asala be-nzoni pepe afa lege na ala nzoni pepe, mingi ti aJuif avoro Nzapa na lege ni mbeni pepe. (Jacques 1:27) A lingbi ala gbian bê ti ala teti siokpari so ala sala na tele ti Nzapa nga na mbage ti mbele ti Ndia.

Na ngoi ni kâ, aJuif mingi ayeke ku singo ti Messie, wala Christ ti zendo ni, na ambeni na popo ti ala ayeke hunda la ni tele ti ala na ndo ti Jean: ‘Peut-être lo yeke Christ ni?’ Ye oko, Jean ake so lo yeke Christ, na lo gboto lê ti ala na ndo mbeni zo nde, so lo tene na ndo ti lo: “Mbi lingbi na Lo pepe, même ti lungula kamba ti poro ti Lo pepe.” (Luc 3:15, 16) Na fango Jésus na adisciple ti lo, Jean atene: “Ba, Molenge ti Ngasangbaga ti Nzapa so alungula siokpari ti sese!”​—Jean 1:29, NW.

So ayeke la ni tâ nzo tene, teti biani Jean ayeke fa na azo kue lege ti fini na tâ ngia: Jésus, lo so “alungula siokpari ti sese.” Teti ala yeke ahale ti Adam na Ève, a dü azo kue na gbe ti sioni ngangu ti siokpari na ti kui. A fa nda ni na aRomain 5:19: “Legeoko tongana azo mingi aga awasiokpari na lege ti mango tene pepe ti zo [Adam] oko so, tongaso nga, fade A sala si azo mingi aga azo ti mbilimbili na lege ti mango tene ti Zo [Jésus] oko so.” A lingbi Jésus, tongana mbeni molenge ti ngasangbaga so amu na sadaka, ‘alungula siokpari’ na aleke si sioni dutingo ti azo agbian a ga nzoni. Bible afa nda ni: “Futa ti siokpari ayeke kui; me matabisi ti Nzapa ayeke fini ti lakue lakue na yâ Christ Jésus Seigneur ti e.”​—aRomain 6:23.

Tongana mbeni zo ti mbilimbili-kue, biani koli so ahon tanga ti azo kue, Jésus alondo ti sala kusala ti fango nzo tene. Mbaï ti Bible so ayeke na Marc 1:14, 15 atene: “Tongana ala zia Jean na da ti kanga awe, Jésus asi na Galilée, Lo fa Tene-nzoni ti Nzapa. Lo tene, Lâ asi awe, na royaume ti Nzapa ayeke ndulu. I gbian bê ti i, i mä Tene-nzoni na bê.”

Ala so ayeda na tokua ti Jésus na afa na gigi mabe na yâ nzo tene awara adeba nzoni mingi. Jean 1:12 atene: “Azo oko oko kue so akamata [Jésus] na amä na bê na iri ti Lo, Lo mu lege na ala ti ga amolenge ti Nzapa.” Na dutingo amolenge ti Nzapa, ala yeke la ni na beku ti wara futa ti fini ti lakue lakue.​—1 Jean 2:25.

Me matabisi ti wara adeba nzoni ti Royaume angbâ pepe gi na azo ti kozo siècle. Tongana ti so a sala tene ni kozo awe, a yeke fa nzo tene ti Royaume ti Nzapa na a yeke fa nda ni na azo kue na ndo sese laso. Tongaso, azo alingbi lakue ti wara adeba nzoni ti Royaume. A lingbi mo sala nyen ti wara adeba nzoni so? Fade article ti peko ayeke fa nda ni.