Mo Lingbi ti Wara Adeba Nzoni ti Royaume

BAZENGELE Paul so ayeke Chrétien atene la ni ambeni kota yanga ti kodoro ti ngoi ti lo. Lo wara la ni mbeni fango ye so alingbi na ti kota da-mbeti ti ngoi ti e. Lo wara aye ti nzoni nga a-droit kue so mbeni zo ti Rome ayeke na ni. (Kusala 21:37-40; 22:3, 28) Aye so alingbi la ni ti mu lege na lo ti ga mbeni kota zo ti mosoro na zo so azo ahinga lo mingi. Ye oko, lo tene: “Ye so mbi wara ye dä, mbi diko ye so tongana ye senge teti Christ. . . . Mbi ba ye so kue tongana puru [“zende,” NW] si mbi lingbi wara Christ.” (aPhilippien 3:7, 8) Ngbanga ti nyen Paul asala la ni mara ti tene tongaso?

Kozoni a hinga lo na iri ti Saul ti Tarse nga tongana wasalango ngangu na “ambeni zo so ayeke ti Lege so.” Ye oko, na peko ti so lo wara suma ti Jésus so alondo na popo ti awakinda na yâ gloire, Paul aga mbeni wamabe. (Kusala 9:1-19) Na lê ti Paul, ye so asi na lo na lege ti Damas afa polele so Jésus ayeke Messie, wala Christ, ti zendo ni, lo so ayeke ga ande Mokonzi ti Royaume so azê. A sala nga si fini ti Paul agbian ngangu mingi, tongana ti so afa ni na lege ti kpengba tene ti lo so ayeke na nduzu ge. So ti tene, teti so Paul ayeke na bê ti mbilimbili nga nzoni, lo gbian bê ti lo.​—aGalate 1:13-16.

Na yâ ti Bible, a kiri fani mingi peko ti tene “ti gbian bê” na lege ti tene ti Grec so aye mbilimbili ti tene “ti hinga na peko,” so ayeke nde na “ti hinga kozoni.” Tongaso, gbiango bê ahunda mbeni gbiango ye na yâ bibe, bango ndo wala ye so mbeni zo aleke ti sala, kengo angbele salango ye ti lo tongana aye so ayeke na lege ni pepe. (Kusala 3:19; Apocalypse 2:5) Ti Paul, lo zia lege pepe na kota ye so asi na lege ti Damas ti ngbâ gi mbeni ye so andu bibe wala même so ahiri ni mbeni ye so asi na lege ti yingo. Ti lo, a yeke la ni mbeni ye so azi lê ti lo si lo hinga ngbele lege ti fini ti lo, so agbu nda ti tene ti Christ pepe, ayeke ye senge senge. Lo ba nga so ti wara nzoni na lege ti fini hingango ye ti lo na ndo Christ, a lingbi lo sala mbeni ye ti leke na fini ti lo.​—aRomain 2:4; aEphésien 4:24.

Gbiango Ye so Aga na Adeba Nzoni

Kozoni, Paul awara hingango ye ti lo na ndo Nzapa na lege ti bungbi ti aFarizien, so lo kue lo yeke na yâ ni. A wara na yâ tene ti mabe ti ala asenda-ndara nga na angobo ti salango ye mingi ti azo. Ndali ti sioni bibe na ndo ti alege ti vorongo, Paul afa la ni lege nzoni pepe na wâ nga angangu kue so lo sala. Atä so lo bi bê ti lo so lo yeke sala na Nzapa, ti tâ tene ni lo yeke tiri na Nzapa.​—aPhilippien 3:5, 6.

Na pekoni so lo wara tâ hingango ye na ndo Christ nga na ndo kusala ti Lo na yâ ye so Nzapa aleke ti sala, Paul alingbi la ni ti ba so lo yeke na gbele aye use: A lingbi lo ngbâ mbeni Farizien na lo wara lakue dutingo ti kota zo na yekiango ndo, wala a lingbi lo gbian fini ti lo na lo to nda ti sala ye kue so ahunda ti wara yengo dä ti Nzapa? Ye ti nzoni ayeke so Paul asoro ye na lege ni, teti lo tene: “Kamela asala mbi pepe teti Tene-nzoni so, teti a yeke ngangu ti Nzapa ti sö azo kue so amä na bê, aJuif kozoni, na aGrec nga.” (aRomain 1:16) Paul aga mbeni ngangu wafango nzo tene na ndo Christ nga na ndo Royaume.

Angu mingi na pekoni, Paul atene na afon lo Chrétien: “Mbi tene na bê ti mbi pepe mbi kamata ye so awe; me mbi sala gi ye oko​—mbi dabe mbi pepe na ye so ayeke na peko ti mbi, mbi lö tele ti mbi ti kpala ye so ayeke na li ni, mbi kpe ngangu ti si na nda ti lege ni ti kamata matabisi so Nzapa ahiri mbi na nduzu ti kamata na yâ Christ Jésus.” (aPhilippien 3:13, 14) Paul awara ye ti nzoni na lege ti nzo tene teti na bê kue lo zia lege ti ye so kozoni ague na lo yongoro na Nzapa na lo londo ti gi na bê kue aye so ague legeoko na ye so Nzapa aleke ti sala.

Fade Mo Yeke Sala Nyen?

Peut-être mo mä nzo tene ti Royaume a ninga pepe. Beku ti duti lakue lakue na yâ mbeni paradis so ayeke mbilimbili-kue anzere na mo? A lingbi ti duti tongaso, teti a dü e kue na nzala ti ngbâ na fini na ti duti na ngia na yâ siriri nga na nzoni dutingo. Bible atene so Nzapa azia “ye ti lakue lakue” na bê ti e. (Zo-ti-fa-tene 3:11) Tongaso, a yeke na lege ni teti e ti duti na beku so ngoi ayeke si ande so azo alingbi ti duti lakue lakue na yâ siriri nga na tâ ngia. Na a yeke ye so nzo tene ti Royaume azi lege na e ti wara.

Tongaso, ti sala si beku so aga tâ ye, a lingbi mo sala ngangu na mo hinga ye so nzo tene ni aye ti tene. Bazengele Paul amu wango so: “I lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.” (aRomain 12:2) Tongaso, na tapande ti Paul, na pekoni so mo wara hingango ye nga na gbungo nda ti ye, a hunda mo ti soro mbeni ye.

Na mbeni mbage, peut-être mo mä na bê awe na ambeni tene so andu kekereke ti mo. Dabe ti mo so Saul nga ayeke la ni na abango ndo ti lo na ndo ye so Nzapa aye kozoni si lo ga bazengele Paul. Me ahon ti tene mo ku mbeni ye ti kpene so alondo na Nzapa ti fa nda ni na mo, ngbanga ti nyen pepe ti gi nda ni na ziango atene ti mabe ti mo na mbage? Hunda tele ti mo: ‘Mbi hinga biani ye so bê ti Nzapa aye teti azo nga teti sese? Fä wa mbi lingbi ti mu ti fa na gigi so atene ti mabe ti mbi ayeke na lege ni? Fä so mbi mu alingbi ti luti na gbele gingo nda ni na lege ti Tene ti Nzapa, Bible?’ Tongana mo gi nda ti atene ti mabe ti mo na lege so, mo yeke wara ye ti sioni oko pepe. Biani, a lingbi mo duti na nzala ti sala ni teti Bible atisa e na ngangu: “I tara ye kue; i zia bê ti i na ye ti nzoni.” (1 aThessalonicien 5:21) Teti biani, kota ye ni ayeke ti wara yengo dä ti Nzapa, a yeke tongaso pepe?​—Jean 17:3; 1 Timothée 2:3, 4.

Amokonzi ti alege ti vorongo alingbi ti zê na e mbeni kekereke ti lakue lakue. Ye oko, tongana zendo ni aluti pepe na ndo ti afango ye ti Bible, a yeke mu ande maboko na e pepe ti wara adeba nzoni ti Royaume ti Nzapa. Na yâ Fango ye ti lo na ndo Hoto so azo mingi ahinga ni, Jésus agboto mê na ngangu: “Azo kue so atene na Mbi, Seigneur, Seigneur, fade ala kue asi na yâ royaume ti yayu pepe, me gi ala so asala ye so Babâ ti Mbi so ayeke na yayu aye.”​—Matthieu 7:21.

Ba nzoni so Jésus aluti mingi na ndo salango ye so Babâ ti lo aye tongana ye so ahunda ti wara adeba nzoni ti Royaume ti Nzapa. Tongaso, kusala so akpa vorongo Nzapa na bê kue aye pepe ti tene so lakue Nzapa ayeda na ni. Biani Jésus angbâ ti tene: “Na lâ ni kâ, fade azo mingi atene na Mbi, Seigneur, Seigneur, e fa tene na iri ti Mo pepe? E tomba ayingo sioni na iri ti Mo pepe? E sala miracle mingi na iri ti Mo pepe? Na lâ ni kâ, fade Mbi tene na gigi na ala, Mbi hinga i giriri oko pepe; i zia Mbi, i azo so asala siokpari.” (Matthieu 7:22, 23) A yeke polele so kota ye ni ayeke ti hinga biani so e gbu nda ti ye so nzo tene ti Royaume aye mbilimbili ti tene nga na pekoni ti sala ye alingbi na ni.​—Matthieu 7:24, 25.

Mo Lingbi ti Wara Mungo Maboko

Teti angu ahon 100, aTémoin ti Jéhovah ayeke fa nzo tene ti Royaume ti Nzapa. Na lege ti ambeti nga na tene ti yanga, ala yeke mu maboko na azo na ndo sese kue ti wara tâ hingango ye na ndo ye so Royaume ayeke, adeba nzoni so lo yeke ga na ni ande, na ye so a lingbi mbeni zo asala ti wara adeba nzoni so.

E wa mo ti yeda na tokua so aTémoin ti Jéhovah ayeke fa. Na yengo dä nga na salango ye alingbi na nzo tene ni, mo lingbi ti wara akota deba nzoni, pepe gi fadeso me nga na yâ ngoi so ayeke ga tongana Royaume ti Nzapa akomande na ndo sese kue.​—1 Timothée 4:8.

Sala kusala ni fadeso, teti adeba nzoni ti Royaume ti Nzapa aga ndulu!

[Foto na lembeti 7]

Na lege ti ambeti nga na atene ti yanga, aTémoin ti Jéhovah ayeke fa nzo tene ti Royaume ti Nzapa